Vaega e 12

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 12.

****************************************

Na matua’i le fiafia Filipo ona ua le ‘ai lana faufauga leaga lea sa taumafai iai, o le pule i lona ola, e ala i le fa’aoso o le pasi a’oga e taia i seisi ta’avale, i luga o le auala.  E ui ina iloa e Filipo, e maliliu atu ai ma tamaiti a’oga, ae faigata o le tagata ua pulea e fuala’au faasaina le mafaufau, ua le kea iai.

E le gata i lea, o lo’o manatu Filipo, e na’o le pau lea o le taimi e mafai ai ona ia fa’atupu ai se faalavelave, e fa’auma ai lona ola.

“Se’i faatope le suiga o le pa’u ae fa’atopetope atu tamaiti a’oga i le a’oga,” o le vala’au mai lea a le alii inisinia lea na alu atu e fesoasoani ia Paulo.

“Ma ia e iloa, o le a fesiligia o ia i le mafua’aga ua o’o mai ai lau pasi a’oga i lenei itu o le auala.”

“Ia ua lelei,” o le tali ita atu lea a Paulo ma punou ifo i lalo e fa’aalu lona ita i le ave’esea o nati mai i le pa’u lea ua pa.

A’o faia le galuega a Paulo ma le inisinia a le aoga, ae o le taimi lea, o lo’o alu atu ai le taavale a le tamaitai o Epifania, i luga o le alatele.  E ave lava le ta’avale a Epi, ae o le taimi lea ua matua’i pogisa atoa lona mafaufau, i lona ita tele.

Ono masina na la fa’auo ai ma se alii, ae o lea ua tago le alii i le fa’amuta mai le la faigauo, i se ‘text’ i luga o le telefoni.  

O le ita o Epi, ona o le pala’ai o lea alii ma fa’auma mai le la faigauo i luga o le telefoni, ae le talanoa mai e pei o tagata e toa le loto.

Ma e ui ina sa fai mai le alii ua mana’omia ona fai sina la malologa, ae na iloa lelei e Epi le mafuaaga tonu ua fia malolo ai le alii.  Ma ua iloa lelei lava e Epi le igoa o le tamaitai la e i le Kolisi, ua mafua ai ona fa’auma e lana uo, le la mafutaga.

[E FAIA PEA]