O LE ALOFA FAATINO UA SILI ATU LEA

O se aiga fiafia le aiga a le ulugalii o Samasoni ma Isapela ma si o la pepe tamaitai o Moira.  O Samasoni, o se alii Kamuta ae o Isapela o se Loia I se tasi o Ofisa Loia ta’uta’ua o lea aai.

Ua tuputupu a’e le tamaitai o Moira I le tausiga alofa a ona matua, ae peitai, I le 10 o ona tausaga, ua amata ona ia va’aia suiga I totonu o lona aiga I le va o ona matua.  O le tele o taimi, ua faatuai mai ai lona tina I le fale.  Ua na o la’ua lava ma si ona tama e fai’aiga I afiafi.

O nisi o taimi, I le leva o le po, e faate’ia ai Moira mai I lona moega, I leo leotetele o finauga a ona matua.  Ma e la te le iloa mai le tu tu o si nei alualutoto I fafo o le faitoto’a o le la potu moe ma le maligi o ona loimata, a’o avau lava le la finauga.

Ua o’o I se tasi o aso, na tu’ua atu ai le aoga a Moira, o tu se atopa’u I tafatafa o le faitoto’a o le fale.

Sa savali atu Moira I totonu o le potu malolo o nonofo mai ai ona matua ma na lagona e Moira le maniti o lona tino, e pei o iai se mea ua tupu.

I le faaiuga o le latou talanoaga, na tu ai Moira I le faamalama ma le maligi o ona loimata, a’o ia vaai atu I si ona tama, o tu’u lana atopa’u I totonu o le taavale ma oso I totonu o le taavale.  Ua na o le tagi o Moira ma valaau le igoa o si ona tama.

Ua savali I le 3 tausaga talu ona tete’a le ulugalii a Samasoni ma Isapela ma ua fai foi le toalua fou a Samasoni, o le tamaitai o Masela.  Ae o Isapela ua avea ma se tasi o Loia ta’uta’ua.  Ae peitai, sa vaaia pea lava pea e Moira le le suia o uiga o lona tina I totonu o le la aiga.

Ua eseese fafine e totogi e Isapela e o mai e tausia Moira.  O le tele o taimi, e pe na o le faalua pe faatolu I le vaiaso, ona faafesaga’I Isapela ma si ana tama teine.

O se tasi o aso, na sagisagi fiafia mai ai le tamaitai o Moira mai I le a’oga ona ua filifilia o ia e le aoga e tauva I se sikolasipi.  Ina ua manava mai Isapela I lena afiafi, na tamo’e atu Moira ma lona fiafia tele e faasoa atu lana tala fiafia I si ona tina.  Ae o le taimi lea o lo o talanoa lava Isapela I luga o le telefoni.  Na fiu si teine o Moira e faatali le taimi e uma ai le telefoni a lona tina, ae peitai, na toe savali ese si teine o Moira, o la lava e ili le laau a Isapela I luga o le telefoni.

Ua alu atu nei Moira tu’u le tusi mai I le aoga I totonu o le ato a lona tina ma tusia upu nei I luga o le tusi, “Tina, ou te manaomia lau fesoasoani faamolemole”.

O le aso na soso’o ai, na valaau mai ai Isapela I le telefoni a Moira ma faailoa mai iai ua uma ona ia faitau I le tusi a Moira ma ia faapea mai ia Moira, “E te silafia lo’u pisi tele I le taimi nei.  E leai seisi, pe o se faiaoga e mafai ona fesoasoani ia te oe?”  Na maligi loimata o Moira I le faamatalaga a lona tina.

I se tasi o afiafi, na vave manava mai ai Isapela I le fale ma sa lagona le fiafia o Moira ona ua manatu o le a maua se avanoa e la te talanoa ai ma lona tina.  Sa faapea atu Moira I lona tina, “Mom, ou te fia talanoa lava ma oe”.  Sa saofa’I ifo Isapela I lalo ma fesili, “E iai se mea ua tupu?”  Ae tatagi loa ma le telefoni a Isapela.  Ua tago atu Isapela I le tali lana telefoni ma ia faapea atu I le tagata o lo’o I le telefoni, “Oka, ia ua lelei, lea o le a ou alu atu.”  Sa ia liliu mai ia Moira ma faapea, “Faamalie si a’u tama, e taua tele le faatasiga lea ua valaau mai ai le tagata lea.  Se’I ta talanoa I seisi taimi.”  Ma tula’I lava Isapela ma alu ese atu.

O le faaiuga o le vaiaso lena, na sauni ai Moira, e alu I lona tama aua o faaiuga o vaiaso, e faatasi atu ai o ia ma lona tama.  

Ina ua feiloa’I Moira ma lona tama, sa ia faamatala I lona tama le tala fiafia e uiga I lana sikolasipi.  Sa fa’aali le agaga fiafia ma le faafetai o Samasoni I le taumafaiga a lona afafine.  Ma sa ia faapea atu I lona to’alua fou o Masela, “O tatou, o le a tatou o I se faleaiga e sami ai le taumafaiga a si o’u afafine.”

A’o fai le meaai I lena afiafi, na vaaia lava e Masela, e le o fiafia le tamaitai o Moira.  Sa ia fesili atu ia Moira, “E iai se mea o mamafa I lou mafaufau?”  Sa tali Moira, “E iai le suega e tatau ona ou su’e ai, e mafai ai ona ou mauaina le sikolasipi.  Ae e leai seisi e mafai ona fesoasoani mai ia te a’u e su’esu’e mo lenei suega.”

Sa tali Masela, “Aua e te popole.  O le a ou fesoasoani ia te oe.”

Sa le’I vale le faamatalaga a le fafine o Masela.  I lena vaiaso atoa sa o latou faatasi ai ma Moira, sa fesoasoani malosi Masela ia Moira I lana tapenapenaga mo le suega.  E o’o I le leva o le po, e le moe Masela I le tau sailiga mai I luga o aupega tafailagi, nisi o fesoassoani mo Masela I lana suega o loma nei.

O le masani lava lea a Masela pe a sau Moira e latou te nonofo, e alu lona loto ma lona taimi atoa I le tausiga o lenei tamaitai.  Ai ona o le le’I maua o se la’ua pepe ma Samasoni, ua fuli ai Masela e fa’aali lona alofa ma lana tausiga lelei o Moira.

Ua o’o I le taimi o le su’ega.  Ua I’u manuia le taumafaiga a Moira ma o se fiafiaga tele lea ia Samasoni ma Masela ina ua faailoa atu iai e Moira, ua maua e ia le sikolasipi.  

Sa faia se pati, na tu’ufaatasia e le aoga, e faalauiloa ai I latou ua faamanuiaina I sikolasipi.  Ma sa auai atu iai Isapela ia faapea ma Samasoni ma si ona toalua o Masela.  

O se vaega o lenei sikolasipi e totogi ai e le aoga ia se tafaoga mo le tamaititi po o le teineititi aoga ua maua le sikolasipi ma seisi o lona aiga e na te filifilia.  Ina ua valaau mai le igoa o le tamaitai o Moira, sa tula’I fiafia Isapela ma lona manatu o ia o le a filifilia e lana tama teine e la te o I le malaga lea.

Ae peitai, na liliu mai Moira ia Masela ma faapea mai iai, “Ou te mana’o e ta te o I le malaga lea.”

IA MANUIA LE ALO ATU I LE FAAIUGA O LENEI VAIASO!