Ads by Google Ads by Google

E FAI O LENEI AE O LENA


[ata: SN]

O LE MANA’OGA MULIMULI A SE TINA

Sa maua e le alii o Siaki se ofo manaia mai i le latou kamupani, e galue ai i se atunu’u I fafo, mo se tupe tele.  Ae peitai, sa le mautonu Siaki, ona o lo’o ia tausia lona tina ua matua, toe ma’i.

Sa fai le tonu a Siaki, o le a alu e ave lona tina i se nofoaga o lo’o tausi ai tama ma tina matutua.

Ua alu Siaki i lana galuega i atunu’u I fafo ae o faaiuga o vaiaso taitasi, e fo’i mai lava e asi si ona tina.

Alu aso, sau aso, ua amata ona pisi Siaki i lana galuega ma ua faafaigata foi ona sema se taimi e sau ai e asi si ona tina.

Ua le malolo Siaki mai i lana galuega, ua o’o lava i faaiuga o vaiaso, o galue lava le alii.

Ua si’i si’i foi le tupe maua a Siaki, ua lelei tele lona totogi ona o lona galue malosi.

Ua fai sina umi, e le i toe vaai Siaki i si ona tina.

O se tasi aso, na tatagi ai le telefoni a Siaki.  “Faamolemole sau e asi lou tina,” o le tala lea a le foma’i i luga o le telefoni.

Na lagona e Siaki le fati tauanau i le leo o le fomai i luga o le telefoni.

E taunu’u siaki i le nofoaga o lo’o tausi ai si ona tina, ua tigaina le gasegase o le tina.

Ua nofo a’e Siaki i luga o le moega i tafatafa o lona tina ma faapea atu i si ona tina, “Mama, ta’u mai po o le a se mea e tatau ona ou faia mo oe.”

Ua lagona e Siaki lona loto salamo i lona le sau e asi lona tina.

“Si o’u atalii,” o le tau musumusu atu lea a le tina, “tago e faapipi ni ili uila i luga o le fa’alo o le potu, e leai ni ili i totonu o potu.  Ma faatau mai se pusa aisa ma tu’u i totonu o le potu, e teu ai meaai ona o le tele o taimi , na ou fia ‘ai ai, ae e leai se pusa aisa e teu ai ni meaai.”

Na faateia Siaki i le manaoga a si ona tina.  “Mama, aisea ua e manatu ai i nei mea, ae ua le o toe umi sou taimi?”

Ua aapa atu le tina ma u’u le lima o Siaki ma faapea atu, “Si a’u tama pele, e ui ina sa ou vevela, fia ‘ai ma tigaina, ae sa ou gafatia lava nei mea uma.  Ae paga lea, o lea ou te mafaufau ia te oe, si a’u tama pele, pe a o’o ina e matua, o mai si au fanau tu’u oe i totonu o nofoaga faapenei, ou te le mana’o, e te vevela, fia ai pe tigaina.”

Ua tagi lotulotu le alii o Siaki ma tago atu fusi mau mai si ona tina ma aioi atu iai e faamagalo mai o ia, i lona tuulafoaiina o ia.

IA MANUIA FUAFUAGA I LE FAAIUGA O LENEI VAIASO!