Ads by Google Ads by Google

E FAI O LENEI AE O LENA


[ata: SN]

IA TAUI LE ALOFA I LE ALOFA

“Elena, suga Elena! Nofo loa i luga ua lava lega moe, ua o’o i le kaimi e ke saugi ai i le a’oga,” o le tau fagufagu atu lena a si tina o Fipe i si ana tama teine. “Kope loa sau e alu e kaalao le lauulu i luma fale, ga e sau lea e ke kaele ma igu lau ki.  Faakope i e kuai i le a’oga!”

Ua nofo a’e i luga Elena ma maulu ese mai i totonu o le tainamu lea o lo o puipui ai lona moega mai i namu o le po.  Ua savali tautevateva atu i luma o le fale ma saofa’i ifo i luma o le pae ma’a o le latou fale ma tilotilo aga’i i tai i le sami.

“Suga Elega! Ga fo’i ua e gofogofo ae le faakope le kalaoga o le lauulu ma e sau e saugi i le aoga!” o le toe valaau mai lea o Fipe.

“Makua’i kele foi gei feau! Vaai ia Susaga la e le kaikai a kuli mai e loga kiga e sau e kaalao se okaoka! Ga o le ala a igu laga ki ma alu i le aoga.  Ai foi o ai se fuamoa falai a Susaga!” o le tomumu lea a Elena ma tu a’e i luga ma amata loa ona taalao lana otaota ma aga’i atu loa e sauni mo le aoga.

O le aiga o Elena, e na o ia ma nai ona matua o Fipe ma Toma.  E nonofo i se faleo’o i lo latou nu’u ma o se aiga e le tele se tamaoaiga.  E ola i le maumaga a Toma ma lana mata tao.  Ia a’o le tina o Fipe, o le taulasea lea o le nu’u.  Ua toatele tagata o le nu’u ua lavea’i i le fofo a le tina o Fipe. 

O Fipe ma Toma o ni tagata galulue malosi, o ni tagata loto alolofa ma le lima foa’i, ma o ni tagata tautua faamaoni foi.  Ua iloa uma e tagata o le nu’u uiga lelei o lenei ulugalii.  Ma o se ulugalii alofagia foi.  O le tele o taimi, e tete’e ai e Fipe ia tupe mai i ma’i na te fofoina, ma o lea, e tele lava ina foa’i mai iai e ana ma’i ia meaai, o lavalava ma isi lava mea, e fa’aali ai lo latou agaga faafetai i lenei tina ma lana taleni.

O se ulugalii e alolofa tele i si a la tama teine toatasi, o Elena.  E la te tausi faapelepele ia te ia.  O le a lava le mea e mana’o iai Elena, e taumafai lava si tamaloa o Toma e saili mai.  O nisi o taimi, e otegia ai e Fipe ia si ona to’alua, ona o le leaga o le faiga e Toma o le teineititi o Elena.

O le tuputupu a’e o Elena, sa amata ona maitau le eseesega o lona aiga ma aiga o le toatele o ana uo.  O ana uo, e o mai i le aoga ma tupe e faatau ai latou meaai.  Sa ia maitauina foi, le tele o tausaga, e fou ai toniga a ana uo, ae o lona toniga lava e tasi e ofu i tausaga uma.

Ua amata ona iai uiga fa’aalia o Elena, o le ma i nai ona matua.  Aemaise le taimi e sau ai si fafine o Fipe e aumai ana meaai i le aoga, i totonu o se taga pepa.  Ua amata na fai ma Elena le masani, o le lafi mai lona tina pe a alu atu ile aoga.  Na i’u lava ina ona faatonuina si fafine o Fipe, e aua le toe alu atu e avatu se meaai, e fo’i mai lava i le fale ‘ai ai.

Na vaaia ma le faanoanoa e Fipe ma Toma uiga suia o si a la tama teine, ae ui i lea, sa le’i tu’ua ai lo la alolofa ma lo la tausi faamaoni ia te ia.

Ua i’u manuia a’oga a le tamaitai o Elena, ma na faamaualuga i manatu o Fipe ma Toma, o le a alu Elena e su’e sana galuega e fesoasoani ai i si o latou aiga, ona ua matutua foi i la’ua.  Ua le gafatia i lo la malosi ona toe faia ni galuega mamafa.

Ae peitai, ua augani le teine o Elena, o ia e fia alu i se Iunivesite i atunuu i fafo. O le totogi o le su’ega e ulufale ai Elena i le a’oga o lo o naunau lava iai, e selau tala.  E ui ina o lo o iai iunivesite e taugofie ma isi a’oga e leai se tupe e totogia, ae na viga lava le teine e fia alu i le iunivesite taugata.  Na fiu si loomatua o Fipe ma si toeaina o Toma e taumafai e sui le mafaufau o Elena, ae ua le mafai lava le teine.

Ua lata i le aso e faagata ai le totogiina o le su’ega ulufale a Elena ae e le’i maua lava le tupe.  Ua le tu’u le tauanau pea a Elena i nai ona matua.  Sa le i fia malamalama Elena, o nai ona matua ua matutua, ua le toe talavou.  Na o le pau lava le mea ia Elena, o ia e fia alu i le iunivesite taugata, e mimita atu ai i ana uo.

O se tasi o taeao, na ala ifo ai Elena, ua usu si toeaina o Toma.  Na fesili Elena po o fea ua usu iai lona tama.  Na tali Fipe, “O la e alu e su’e mai se taui’a e su’e ai le totogi o lau suega.”  Ua fiafia le loto o Elena o le a maua le mea sa ia mana’o iai.  Talofa e, sa le’i iloa e Elena, o si toeaina o Toma, o lo o ma’i, ae na faamlosi lava i lena taeao, e usu i tai e fagota mai se taui’a e su’e ai se tupe e fai ai le mea o mana’o ai si ona afafine.

Ua a’e manuia mai le faiva a le toeaina o Toma.  Ma ua alu si loomatua o Fipe e tu i le auala e faatau ana tau i’a ma e le’i umi lava ae taulia uma taui’a a Fipe.  Ma ua maua ai ma le tupe e totogi ai le su’ega a le teine o Elena.  Ua ova i le masina le fiafia o Elena.

Ae o lena po, a’o momoe le aiga, na faate’ia i luga Elena mai lona moega, ina ua faalogo mai o tau fafagu atu o ia e si loomatua o Fipe.  “Elena, Elena, sau e alu e aumai se lauti se’i fofo si ou tama.”  “O le a le mea ua tupu?” o le fesili lea a Elena.  “O lea ua oso lona maalili,” o le tali mai a Fipe.  “Faakope, alu e aumai se lauki!”

Na umi se taimi o lena po o lomi e si loomatua o Fipe ia le toeaina o Toma.  A’o nofonofo lava Elena ma tilotilo atu i foliga o si ona tama.  “E ke iloa lava o ga e ke ma’i a e oso lava i kai i le sami, ia ua a la!” o le ote lea a Fipe ma lomi lava Toma.  “Oi, sa ma’i tama?” o le fesili lea a Elena.  “Ioe, ga ala mai agalela, e le o lelei le faalogo.  Ae ga maga’o lava e alu e su’e mai se i’a e faakau oga ua laka le aso e faagaka ai le kupe o le su’ega o lau a’oga.” O le tali lea a Fipe.

Na alu lena po, a’o taumafai si loomatua o Fipe e togafiti si ona to’alua, o nofonofo le teine o Elena ma tagi i luga o le ulu o si ona tama, ma toe faasolo ona mafaufauga i le tausiga alofa a si ona tama ia te ia.  E ui i le mugala, o le timuga, o le lelava ae sa tu lava i luga ma alu e su’e mai le mea sa ia mana’o mai.  Mai lava i lona laititi, o le a lava le mea e tagi atu ai i si ona tama, e le talitualimaina lava e si ona tama ona manaoga, lea ua o’o lava ina ma’i ona o le tau sueina o le tupe e totogi ai le iunivesite taugata, ona o lona mana’o lava e fia faaliali atu i ana uo.

O le vivini o toa i le taeao na soso’o ai, na te’i ane ai i luga le loomatua o Fipe ua leai Elena mai i lona moega, ae o lo’o moe pea si toeaina o Toma, fa’ato’a maua sana malologa.  E le’i umi lava ae sosolo atu se taavale i luma o le fale, o se tasi o tamaloa o le nu’u, o lo’o o atu ma Elena.  “Tina, sauni mai tatou o e ave tama i le falemai,” o le valaau atu lea a Elena.  “Lea ua sau Iakopo tatou te o i le falemai.”

Ua tilotilo mai le loomatua o Fipe, ua amata ona maligi ona loimata.  “Elena, leai, lea ua ok lou tama.  Faatigaina fua Iakopo ae lea ua moe Toma.  Ma leisi mea, e leai se tupe e totogi ai le falemai.” O le tali mai lea a Fipe.

“Aua e te popole Tina,” o le tali atu lea a Elena.  “O lea ua iai le tupe e ave ai tama i le falemai.”

Ua faatopetope atu nei le aiga e ave si toeaina o Toma i le falemai.  Ua i’u manuia togafitiga a foma’i ma ua te’a mai i tua Toma ma le manuia mai i le falemai.  Na fesili Fipe i si ana tama o Elena, “O fea sa maua mai ai le tupe na totogi ai le pili o le falema’i?” Ua ataata le teine o Elena ma faapea atu, “O le tupe lea sa tu’u e totogi ai la’u su’ega i le a’oga.  Ou te le manaomia ona ou alu i se Iunivesite taugata.  O lea ua maua la’u galuega e fesoasoani ai i le tatou aiga.  Ma e maua ai foi ma le avanoa e ave ai ni a’u vasega i le iunivesite a le tatou malo.”

IA MANUIA LE FAAIUGA O LENEI VAIASO!