Ads by Google Ads by Google

E FAI O LENEI AE O LENA


[ata: SN]

“O LE LAPITI VELOVETA”

Sa iai se lapiti veloveta lapo’a ma le matagofie sa tu’uina e matua o Ioane i totonu o lana totino meaalofa lea sa tautau i luga o le fao i le vaveao o le Kerisimasi.  Na iai foi ma isi tamai meaalofa laiti na iai i totonu o le totigi meaalofa, e pei o se taavale afi, o lole sukalati, ae o le lapiti veloveta, na sili ona manaia atu i lo na meaalofa uma.

Ma na faapena ona feaveai ma alofa ai le alii o Ioane mo le na o le lua itula, ae na matuai faagaloina e le alii o Ioane ina ua ia maua nisi meaalofa se tele mai tagata o lona aiga.

Na umi se taimi o teu le lapiti veloveta i totonu o le fata pito aluga o le kapoti, i le mea o lo o teu ai ma isi meataalo a le alii o Ioane.  Na iloa e le tele o meataalo na iai i totonu o le kapoti, le le amanaiaina o si nei lapiti e Ioane ma na avea lea na tulaga ua o latou ula ma faifai ai I si lapiti.

E na o le pau lava le meataalo sa agalelei i le lapiti, o se solofanua meataalo.

O lenei solofanua, ua leva tele ona iai i totonu o le kapota ma na faatau mai o ia, e lanu paepae lona tino ae peitai, ua amata ona liu enaena.

“O le a le uiga o le iai o sou tino moni?” o le fesili lea a lapiti i le solofanua, ona ua leva atu o ia i lo so’o se meataalo i totonu o le kapoti ma o lea, ua sili atu ai lona atamai i lo so’o se meataalo.  

“O le iai o sou tino moni, e le o se mea e tupu ia te oe.  Ae o se lagona e maua e tamaiti mo oe,” o le tali mai lea a solofanua.

“E tiga?” o le toe fesili atu lea a lapiti.

“O nisi taimi,” o le tali mai lea a solofanua.  “Ae a iai sou tino moni, e te le toe ano lava i na mea o tiga.”

“E tupu i le taimi e tasi, e pei o le taimi e vili ai le taavale e fa’aalu i le atoa, pe tupu taitasi?” o le toe fesili lea a lapiti.

“E le tupu uma i le taimi e tasi.  Ae e fai sina umi o tupu.  O le tele o taimi, e maua lou tino moni, ae ua toulu lauulu o lou ulu, pe ua pa’u ese faamau na e fai ai ou mata.  Ae peitai, e le kea iai fanau lea o lo o fiafia i meataalo,” o le tali lea a solofanua.

“O lona uiga ua iai lou tino moni?” o le fesili atu lea a lapiti ia Solofanua.

Ua na o le ataata o le solofanua. 

“Na iai lo’u tino moni.  Ae ua fai sina leva.  E maua loa lou tino moni, e le mafai ona e toe foi i le mea na e iai muamua,” o le tala lea a solofanua.

Ua mafaufau loloto ia lapiti, po o afea o le a tupu ai lea mea ia te ia.  Na naunau lapiti ia maua e ia lea mea o le tino moni.  Ae na fefe i le faamatalaga a solofanua e faapea, e liua ai o ia, e auleaga ai.

Na iai se fafine e igoa ia Nana, o ia sa pule i le potu lea e teu ai meataalo.  Ma o afiafi uma e na te teuina uma ai meataalo a Ioane i totonu o le kapoti. 

O le tasi po, na sauni ai Ioane o le a moe, ae ua fiu e su’e lana tamai maile meataalo lea sa masani na la momoe faatasi, ua leai se mea.  Ua paie foi Nana e su’e le tamai maile.  Na tau atu ona matai ia lapiti ma tago ua toso mai ma faapea atu ia Ioane, “Ia lea, momoe ma lapiti nanei.”

O le po muamua na moe ai lapiti i tafatafa o Ioane, sa fai sina le manaia o lana faalogo ona o le mau o le fusi a le tamaititi i lona ua.  Ma o nisi taimi sa tau le mafai ona manava pe a uunai o ia agai i lalo o aluga.  Ma ua amata ona ia misia le kapoti sa la nonofo ai ma solofanua ma talatalanoa.

Ae e le i umi lava ae amata ona fiafia i le feaveai o ia e Ioane, ona o isi taimi e talatalanoa atu ai Ioane ia te ia.

IA MANUIA TOE FUAFUAGA O LENEI VAIASO.