“O PULUSI MA LE APOGALEVELEVE ”

Na iai se tupu o se malo, o lona igoa o Pulusi.  O se tupu e le gata ina toa le loto ae atamai tele.  O se tupu e le mana’o e to’ilalo i seisi ma e amata le tatou tala, ae o le taimi lea o lo o vevesi ai le taua i le va o le malo a le tupu o Pulusi ma se malo tuaoi.

O se taua maoae le finau, e fai o le musu e to’ilalo, ae sa vaaia foi le le solomuli o le tupu mai i le malo tuaoi ma lana au tau.  Ua o’o i le fa’a ono o osofaiga a le ‘au tau mai i le malo tuaoi.  Ua vaaia le faavaivai o le ‘au tau a le tupu o Pulusi.

Ua i’u ina ta’ape le ‘au tau a le tupu o Pulusi.  Ua sosola ana fitafita aga’i i le vao e lalafi ma to ai le sela.  Ua faapena foi ma le tupu o Pulusi, ua sulufa’i atu i se vaega o le togavao ma ia tau atu ai i se ana ma lafi ai loa.

A o taotooto le tupu o Pulusi i totonu o le ana, sa ia lagona lona le lava ma lona vaivai.  Ua o’o mai se manatu ia te ia, o le a si’ilima loa ma tu’u atu lona malo e pulea e le tupu o le malo tuaoi.

O mafaufauga ia o le tupu o Pulusi, ae ona vaaia loa se apogaleveleve i luga tonu lava o lona ulu.  Sa ataata le tupu o Pulusi ma fa’a’amuia atu i le apogaleveleve, ma ia faapea atu iai, ‘Amuia oe apogaleveleve, e leai se mea o e popole ai.”

Sa matamata le tupu o Pulusi a o pisi solo le apogaleveleve i le fausia o sona faamoega.  Na ia vaai alofa atu foi a o taumafai le apogaleveleve e soso’o atu lana faamoega i se pito la’au sa i leisi itu o le ana.  Pe fa’aono ona taumafai lenei apogaleveleve e soso’o atu lana faamoega i lea itu o le ana, ae peitai, sa le i faamanuiaina.

A o matamata le tupu o Pulusi i le taumafaiga a le apogaleveleve, sa ia faapea atu iai, “Ou te iloa lelei lava le mea o feagai ma oe, aemaise ou lagona i le taimi nei.”

Ae peitai, na vaaia e le tupu o Pulusi le le fo’i o lenei apogaleveleve.  E ui ua fa’aono ona taumafai ae le manuia ana taumafaiga, ae na vaaia e le tupu o Pulusi, le toe taumafai ma toe taumafai pea o le apogalevelve ma i’u ai lava ina manuia lana taumafai.

Ma a’o tilotilo atu le tupu o Pulusi ae ua faamae’a e le apogaleveleve le fausiaina o lona faamoega, sa faapea ifo le tupu o Pulusi i lona loto “O le a faapena foi ma a’u.  O le a ou le faavaivai.  O le a ou tau pea.”

Ua tu atu nei le tupu o Pulusi ma alu atu ma su’e mai lana vaega’au ma o latou faatulagaina seisi osofaiga.  Sa i’u manuia le osofaiga lona fitu a le tupu o Pulusi ma lana ‘au tau ma ua mafai ona o latou faatoilalo le tupu o le malo tuaoi ma lana ‘au tau ma toe fao mai lona malo mai i ona fili.

Sa faia se pati tele a le malo o le tupu o Pulusi, e sami ai le manumalo o lenei malo mai i le taua ma le malo tuaoi.

O lea lava afiafi, na faia ai se fa’aaliga aloaia a le tupu o Pulusi mo tagata uma o lona malo ma so’o se tasi e asiasi atu i le malo, e faasa ai ona faatama’ia pe tapeina e se tasi, o se apogaleveleve.

IA MANUIA TOE FUAFUAGA O LENEI VAIASO!