E FAI O LENEI AE O LENA
“O LE TOEAINA NA SAILI LE FIAFIA ”
Sa iai se toeaina nofo toatasi i totonu o se nu’u, e mamao lava i tua o le togavao. O lenei toeaina, e le taitai lava fiafia e auai i mea fai a le nu’u. Ua fiu tagata o le nu’u e faauo ma faamasani atu ia te ia, ona e leai lava seisi na o ia lona fale, ae le taitai fia faauo pe faamasani mai o ia i tagata o le nu’u.
E le gata i le faau’u o lenei toeaina, ae o le tomumu ia. A timu le aso, ua tomumu i le susu ae a la foi, ua tomumu I le vevela. Na iai se aso na alofa atu iai se aiga tuaoi ma momoli iai se meaai o le sua i’a manogi ma se faalifu fa’i, ae leai ma se faafetai, ae ua na o le tomumu lava i le ivia o le i’a ma le o’ona o le faalifu.
Ua alu aso, sau aso, o fai lava le amio lenei a lenei toeaina. Ma ua o’o lava i tagata uma o le nu’u, ua fiu foi i amio a lenei toeaina. Po o fea lava le fiafia o tagata o le nu’u, e le atoa se minute e talanoa pe nofo ai i tafatafa o le toeaina, ae alu ese ua liua lona fiafia i le ita po o le faanoanoa.
O le mea lea, ua amata ona le toe valaaulia i mea fai a le nu’u ma ua amata foi ona le toe amanaia e tagata o le nu’u, ae ua tu’u ai lava o ia e fai lona le fiafia.
Ae i se tasi o aso, na va’aia ai e le nu’u, ua le toe ga se mai se tasi i lona fanua po o lona fale.
E ui lava ina e le o toe amanaia e tagata o le nu’u lenei toeaina ona o lana amio ae peitai, e iloa lava e tagata o le nu’u le taimi e ulufafo mai ai i lona fale faapea ai ma ana mea o fai ona e lagona atu lava ana galuega o lo o fai i totonu o lona fanua, ia po o lona ote foi i manu po o tagata feoa’i. E le gata i lea, e iloa atu lava e tagata o le nu’u, le ola mai o se afi i lona fanua, ma iloa e tagata o le nu’u, o lo o gaseseina sana taumafataga, a le o le taeao, o le aoauli, po o le po foi.
Ae peitai, o lea aso atoa, na fiu tagata o le nu’u e tau faalogologo mai i le pa’o atu o le fanua o le toeaina, ia po o le ote a le toeaina, e pei ona o latou masani ai, ae ua leai lava se mea e ga se i le fale ma le fanua o le toeaina.
Ua tau masalosalo tagata ole nu’u, pe ua iai se mea ua tupu i le toeaina, pe tatau ona alu seisi e siaki lona fale, po o lavea, po o manaomia se fesoasoani.
Ae peitai, sa leai ma seisi o le nu’u e fia solia fanua o le toeaina, aua ua o latou iloa lelei lava le mea e tupu pe afai ae latou solia le fanua o le toeaina, ae e leai se mea o tupu. O lona uiga, o le otegiaina lena o latou ma lafo mai e le toeaina ni tala e le fia faalogo ai seisi.
Ua lua aso e le o vaaia lava le tino o le toeaina lenei, ma ua amata ona popole tagata o le nu’u. Ma ua tonu ia i latou, a o’o i le aso e soso’o e le vaaia lava le toeaina, o le a faapea loa ona o latou o e saili.
Ae na fa’ate’ia le nu’u, e le i vivini toa o le taeao na soso’o ai, ae o latou faalogoina le patia pa ta mai o le fale o le toeaina.
O le mea na sili ona faate’ia ai tagata o le nu’u, ona sa o latou faalogoina se tagata o pesepese mai i le fanua o le toeaina.
Ua tamomo’e mai tagata o le nu’u e autilo po o ai lea e pa’o atu i le fale o le toeaina aua o se mea fou lea, o le faalogoina o se tagata e pesepese atu i le fanua o le toeaina, aua o le toeaina e ita tele ae pese seisi.
Na faate’ia le nu’u i le matala faafuasei mai o le faitotoa o le fale o le toeaina ae savali mai i fafo. O le tulaga na faate’ia ai le atunu’u ona e ui o le toeaina lea na savali mai i fafo, ae na o latou maofa, i le laufofoga fiafia o le toeaina ma valaau mai, “Taeao Manuia.”
Ua na o le fetilofa’I solo o tagata o le nu’u po o ai lea tagata. Ona e le faapea uiga o le toeaina lea e nofo i’i. Ae o foliga lava o le toeaina. Ua ata le toeaina ma faapea mai, “Ese le matagofie o lenei taeao, a ea?”
Ua toe fo’i tagata o le nu’u i o latou fale ma le le mautonu i lenei mea ua tupu. Ua o latou le talitonu. Fai mai nisi, e le umi lava ae toe foi le toeaina i ona uiga tuai. Ae peitai, na uma lelei le aso, o faalogoina lava e tagata o le nu’u le pesepese o le toeaina ma fai ana galuega. O ai lava seisi e savali atu i autafa o lona fale, ua valaau fiafia mai iai le toeaina.
E o’o lava i aiga tuaoi, ua faate’ia i le afea o latou fale e le toeaina, ma ipu meaai. E le gata i lea, o le tala a le toeaina e faafetaia ai i latou i lo latou onosai ma lo latou agalelei ia te ia, i na mau tausaga ua te’a atu, i ona uiga sa masani ona iai.
Ua o’o i se tasi o aso, ua faapotopoto le nu’u e fai se latou pati ma sa faapea ona auai atu ai le toeaina. Na fesili nisi o tama matutua i le toeaina, pe na faapefea ona suia ona uiga. Na tali le toeaina, “Ua atoa le 80 o o’u tausaga. I lena 80 tausaga sa fa’aaluina ai lo’u malosi e saili le fiafia. Ae peitai, sa ou le mauaina se fiafia. O le taeao na atoa ai le 80 o o’u tausaga, na ou ala ane ai ma ou faapea ai, o le a ou le toe alu saili le fiafia, ae o le a ou ola fiafia. Ma o le mea lea, ua le toe alu so’u malosi e saili le fiafia, ae o le a na o lo’u ola fiafia.”
IA MANUIA TOE FUAFUAGA O LENEI VAIASO.