O PATOSINA MA LE LAAU O LE MATI

I totonu o se togavao, sa ola ai se laau tele lava e ta’ua o le Mati.  Ma o lenei laau o le Mati, e falala solo ona lala.  Ma i luga o lala o lenei Mati, e nonofo ai se aiga o Patosina.  Ma sa fiafia lava nei Patosina i le le gata i le malu o lo latou nofoaga i luga o lala o le Mati, ae faapea foi le malu.

Ae peitai, i lalo o a’a o le Mati, ua amata ona sosolo ai se vao.

Na faapea atu se tasi o patosina matua ma atamai, “O e vaai atu i le vao lena ua amata ona tavi’o mai i le tino o le Mati?  E iai le aso o le a avea ma faafitauli ia i tatou.  Na ou vaai o tupu le mea lava lea e tasi a o o’u laititi.  Afai e tatou te le vele eseina le vao lea, o le a o’o ina tupu tele ma lapo’a, ma I’u ina mafai ona pe’a mai ai se tagata fana manu ma faatama’ia i tatou.  Ua tatau ona tatou tapeina le vao le la.”

Ae ula mai ai leisi vaega o patosina.  “E, ua matua lava ma leaga le ulu o le la ia!  Se’i vaai atu lava i lena tama’i vao ae ua e ma’ema’ea lava iai.”

Ona tu’u ai lava lea o le vao e tupu, ma tupu, ma tupu!

I se tasi o aso a o agai atu nei patosina i le vai taele e taeele ma su’e mai se latou meaai, na savalivali mai se fana manu ma tau tonu mai lava i le laau o le Mati lenei ma le vao ua taamilomilo ai.  Ma ua pe’a nei le fana manu i luga o le Mati, i lala pito sili ona maualuga ma tatao ai sana auupega.  Ona toe fo’i mai lea i lalo, ma alu i le latou aiga.

A o agai mai i lalo le fanam anu, sa ia faapea ifo lana tala, “Ou te sau nei taeao ua tumu atu la’u auupega i patosina.”

Ina ua alu ifo i lalo le la i lona nofoaga masani, ae amata loa ona toe gasolosolo mai i uta o le togavao ia patosina mo malologa o le afiafi.  Ae na faate’ia i latou ina ua o latou lavelavea ma mau i le auupega a le faga manu.

“Oka o le a lenei mea ua tupu?” o le fetagisi a patosina.

“Ou te le i fai atu ea ia outou?” o le tali mai lea a le patosina matua.  “Na ou fai atu lelei lava le mea e tupu pe a le vele eseina le vao lea sa tupu i a’a o le mati.”

“O le a la le tatou mea o le a fai nei?” o le fetagisi mai lea a isi patosina.

Ua na o le nonofo o patosina ma fetagisi ma taumafai e faamaamulu mai i le auupega a le faga manu.

Ae toe faapea mai le patosina matua, “Ou te iloa le tatou mea e fai.  Ia tatou faataga mamate pe a toe sau le faga manu taeao.  A faapea le faga manu ua tatou mamate, ona ia tago lea togi tatou i lalo, ae ave lana auupega.  Ae aua lava ne’i minoi seisi, se’i tatou pa’u’u i lalo.”

O le vaveao o le taeao na soso’o ai, na toe fo’I atu ai le faga manu i le mati e siaki lana auupega.

Sa matua’i fiafia lava le faga manu ina ua vaai atu ua tumu le auupega i patosina.  Ae peitai, ina ua o’o atu le faga manu i luga i le mea na iai le auupega, sa faanoanoa lona loto, ona e foliga mai ua pe pe uma ia patosina.  E le i manao le fagamanu i ni manu ua pe pe.

O lea na tago ai loa le faga manu ua tauai ese mai nei patosina mai i lana auupega.

Sa leai ma se patosina na minoi seia mae’a ona tauai uma mai e le fagu manu patosina uma sa i luga o le laau.  Ona latou faatalitali lea, seia toe foi mai i lalo le faga manu mai luga o le mati ma savali ese atu.  Ina ua iloa e patosina ua mou ese atu le faga manu, na tu tu uma a’e i luga ma fe’ei i le fiafia.

Ua le faatali loa patosina ae ua faasaga atu loa, ua gali ese le vao tele lea sa ta’ai i le tino o le mati.  Ma ina ua mae’a ona o latou faamama eseina uma lava vaega o le vao.  Na o latou toe felelei loa i luga o le mati ma malolo ai ma le saogalemu.

IA MANUIA FUAFUAGA I LE FAAIUGA O LENEI VAIASO.