O LE TEINE O SUNEMA MA LONA OFU FOU

“Ua leai lava so’u ofu e toe ofi!” o le tomumu leo tele lea a le teine o Sunema, ina ia lagona mai e lona tina.

“O na e tele ou ofu na e i totonu o lau pusa,” o le valaau mai lea a lona tina.  “Faatope toeititi sau le pasi.”

O le taeao lea o lo o tapena ai le teine o Sunema e o ma lona tina e aso tina matua o lo o i le falemai.

Na vave usu lava le tina o Sunema e fafagu le tamaitai ina ia vave sauni ma inu lana ti, ae e le i sau le pasi muamua o le taeao.

Ua faamaulu le ofu tino ae fai mai Sunema, “E matuai tele foi nei fa’amau!”  Ua tui le ofuvae ae toe faapa’u i lalo ma faapea mai, “E, matua’i fufusi tele lenei ofuvae.”

Ua se’i mai le lausakeke, ae ua le fetaui foi ma le faalogo a le teine o Sunema.

Ua o’o lava i le mitiafu ma le ofu talaloa, ua matuai le fetaui lava ma le fa’alogo a Sunema. 

“Sunema faatope!” o le vala’au mai lea a lona tina.

Ua savali mai nei Sunema u’u atu le mitiafu ma le ofuvae a lona tuagane ma tui, ae le i umi ae toe tatala, e le malie lava lona loto.

Ua liliu atu i le lausakeke a lona tina ua toso mai i le tui, ae se’i mai le mitiafu fou a lona tama, ua tui.

Oka Oka, ua leai se mea e faamalieina ai le finagalo o le tamaitai o Sunema.

A’o tu Sunema i luma o le fa’ata, sa vaaia le susulu mai o ona mata ma ua amata ona ata’ata aga’i i lona ata i le fa’ata.

“Sunema, sau loa, o lea ua sau le pasi!” o le toe valaau atu lea a Tina.

“Ia ua lelei, lea ua ou alu atu,” o le tali mai lea a Sunema ma savali mai i le mea o iai lona tina.

“Auoi Sunema!” o le e’e lea a lona tina.  “O le a lena ofu e te ofuina?” 

“O lo’u ofu fou!” o le tali mai lea a Sunema, “E a? E manaia?”

O le tina ua tu ma faataupupula atu ia Sunema, ua na le iloa pe ata pe ita.

Ae o le taimi lea ua savali mai ai Sunema, o lo o ofu mai i le mitiafu fou a lona tama, o lona sakeke mumu, o se’evae a lona tuagane, ma le sikafu a lona tina.

“E manaia lo’u ofu fou?” o le toe fesili mai lea a Sunema.

IA MANUIA TOE FUAFUAGA O LENEI VAIASO.