O LE LOOMATUA O LOME MA LANA OGAUMU FAATE’ITE’I TAGATA

I aso a la ua leva sa iai se loomatua lapo’a e igoa ia Lome.  Sa nofo na o ia ma lana pusi ma ana povi.  

I se tasi taeao na usupo ai lava Lome, ona o le aso lea e tao ai ana falaoa.  

Na muamua lava ona alu atu Lome e la’u mai ni fafie e fai ai le afi i totonu o lana ogaumu lea o le a tao ai ana falaoa.

A’o agai mai Lome i le mea o iai le ogaumu, sa ia va’aia le matala o le faitotoa o le ogaumu.  Ua tau mafaufau Lome pe aisea ua matala ai le ogaumu.

Sa ia tago atu ua se’i mai la’au ma taumafai e salu mai fafo le pefu po o ni lau la’au po o ni fasi la’au mai totonu o le ogaumu, ae peitai, na taia le la’au a le loomatua i se mea o i totonu o le ogaumu.

Ua punou nei Lome e siaki po o le a le mea o lo o i totonu o le ogaumu.  Na ona tau lava o le va’ai a Lome i le mea o i totonu o lana ogaumu, na vave lava ona oso ese ae tapunia pa’o le faitotoa o le ogaumu, ma tamo’e fa’avave atu i fafo mai i le fale.

Ua tamo’e Lome agai i le fale o lona tuaoi ma ia va’ai atu o lo o tu mai i le vai eli o lo o tau asu mai sana pakeke vai.

“Felise! Felise! Sau faamolemole! E iai le mea la e i totonu o la’u ogaumu!”  O le tauvala’au atu lea  a Lome.

“O le a?” o le fesili mai lea a Felise i le tamo’e atu a Lome.

“O le manu foi lea manu leaga lava la e i totonu o la’u ogaumu?” o le tali tau selasela atu lea a Lome.

“Ae le o lau pusi?” o le fesili mai lea a Felise.

“E leai, e leai se kosi pa’epa’e i luga o le papatua a la’u pusi,” o le tali atu lea a Lome.

“Ia ua lelei, se’i ave muamua la’u pakeke vai lea i le fale, o’u alu atu ai lea,” o le faapea mai lea a Felise.

Ua liliu Lome ma toe tamo’e agai atu i le fale o lo o soso’o atu ma le fale a Felise.

“Luisa! Luisa! Sau vave!” o le tauvalaau atu lea a Lome.  “O la e iai le manu magu sauga foi lea i totonu o la’u ogumu!”

“Ailoga se manu, ai o sou ofu tuai ua e tago togi i totonu o le ogaumu,” o le valaau mai lea a Luisa.

“Ae o le a le mea o le a ou togiina ai se ofu i totonu o le ogaumu?” o le finau atu lea a Lome.

“Ia ua lelei,” o le tali ata mai lea a Luisa.  “Se’i uma na fafaga a’u moa ona ou alu atu lea e vaai.”

Ua liliu nei Lome, ma toe auselasela atu foi i le fale o leisi ana tuaoi, o Samuelu.

“Samuelu, Samuelu, o fea oe?” o le tauvalaau atu lea a Lome.

“O le a le mea ua e auselasela mai ai lenei taeao po?” o le fesili lea a Samuela.

“Se’I sau lava faamolemole e vaai le manu magu sauga la e i totonu o la’u ogaumu,” O le tala lea a Lome.

“E, ai o lou ata lafoia na sa e vaai iai i totonu o le ogaumu,” o le tali mai lea a Samuelu.

“E fai se si’usi’u o se ata lafoia?” o le fesili lea a Lome.  “E fai o le iai o le si’usi’u, ae o nifo ma’ama’ai.”

“Ia ua lelei, se’i uma na vele a’u vao, na ou atu lea.” O le tali mai a Samuelu.

Na faapena ai lava lea ona fetamoea’i solo Lome i lena taeao, i fale o lona tuaoi ma augani i ona tuaoi e o atu e siaki le manu lea e i totonu o lana ogaumu.

Ina ua toe foi atu Lome i lona fale, na ia vaaia ai ua taunuu atu foi Felise ma Luisa.  E le i umi, ae taunuu atu Samuelu ia ma  le toatele o ana tuaoi na alu iai.

Ua tago atu nei se tasi o ana tuaoi ma tatala le faitotoa o le ogaumu ma tilotilo i totonu.

“E sa’o a si loomatua,” o le tala lea a le tuaoi.  “O la e iai le manu i totonu o le ogaumu.”

“Ua outou talitonu la i la’u tala na fai atu,” o le ote mai lea a Lome i ona tuaoi.  “O le a la le mea e fai?”

“Se’i o’u tamo’e i lo’u fale e aumai la’u fana e faatama’ia ai,” o le tali atu lea a Felise.

“Auoi, e leai faamolemole.  A pe le manu lena i totonu o la’u ogaumu, o le a le toe mafai ona tao ai sa’u falaoa, ona o le a manogi leaga uma le ogaumu,” o le tala lea a Lome.

“Ae a pe a aumai se maile e tago e tuli mai i fafo?” o le fesili lea a se tasi o tuaoi.

“E leai, a fefe le manu ona tago lea faga lona manogi sauga i totonu o le ogaumu, oka, lona uiga e toe fa’atau seisi ogaumu fou,” o le tala lea a Lome ma saofai ifo i lalo ma ona foliga faanoanoa.

Ua tau fai tutu uma tuaoi ma tilotilo atu i foliga faanoanoa o Lome.  Ae savali mai loa se alii faavasivasi o le nu’u.

“Samasoni! Samasoni! Sau si a’u tama faamolemole, pe mafai ona e ave’esea le manu lea e i totonu o la’u ogaumu,” o le valaau atu lea a Lome i le alii talavou lea o lo o savali mai.  Ae alu le talie a tuaoi ona ua o latou iloa lelei Samasoni, e pei e faavasivasi ma lana amio.

“Ia ua lelei,” o le tali mai lea a Samasoni ma savali atu i le ogaumu, ua punou i totonu ma talanoa i totonu o le ogaumu.

E le i umi lava ae vaaia e Lome ma ona tuaoi le savali mai i fafo o le manu ma agai sa’o atu lava i le togavao.

Ua tau fai ofo uma le vaega lea, ma tilotilo atu ia Samasoni.

“Na faafefea na e faia le mea lea?” “O le a lau tala na fai i le manu?” o le tu’ufesili atu lea a tuaoi ia Samasoni.

Ua ata Samasoni ma faapea atu, “Na ou fai iai e sau loa i fafo, aua toeititi lava a manogi falaoa ona o le ogaumu lea e tao ai falaoa a Lome.  Afai la ae manogi falaoa, e le toe fiafia iai se manu o lona ituaiga ona ua ese lona manogi.”

IA MANUIA TOE FUAFUAGA O LENEI VAIASO!