O SE AU USO FEALOFANI

Na iai se au uso e to’alua, ina ua maliu o la matua, sa o la mauaina ia fanua ma mea totino uma a o la matua.  Sa vaevaeina lelei lava e lenei au uso ia fanua ma fale ma mea totino, i lo la va.

Ona alu lava lea o le tagata e galue lona laufanua.

Ua faaipoipo le tama matua, ma maua ai se la fanau e to’aono.  Ae o le alii laititi, sa nofo to’atasi mo sina taimi umi lava.

Ua o’o i se tasi po, ua mafaufau le alii laititi lenei, i le toatele o le fanau a si ona uso o lo o tausi, ae ua na o ia lona aiga.  Ua manatu alofa le uso laititi i si ona uso ma faapea ifo, ua tele tele fua o faatoaga o lo o mauaina i lona fanua, mo na o se tagata e toatasi.

O le mea lea, na usupo ai lava lenei alii ma uta uma fua o lona fa’ato’aga faapea manu o lo o tausi i lona fanua, ma agai atu loa i le fale a lona uso.  Ma e aunoa ma seisi e na te iloa, sa faapea ona alu atu lenei uso laititi ma faatumu uma totonu o fale teu oloa a lona uso, mea o lo o teuina ai fua o fa’ato’aga.  Ma vave ona toe alu ‘ese, e aunoa ma le iloa mai e lona uso matua po o lona toalua.

Ae o le po foi lava lena e tasi, sa nofonofo ai foi le uso matua, ma mafaufau alofa mai i si ona uso laititi.  Ma sa ia faapea i ona mafaufauga, Talofa e i si ona uso laititi, e leai seisin a o ia lava.  Sa manatu ifo le uso matua i ona faamanuiaga, o lona toalua, ma le la fanau ma fanau o fanau.

Na manatu le uso matua, a o’o ina o la matutua ma lona toalua, o le a iai le la fanau e tausia i la’ua.  Ae a matua si ona uso laititi, e leai seisi e mafai ona tausia o ia.

O lea, na vave usu ai foi le uso matua, ae e le i oso ifo le mata o le la, ma ao fua o lona foi fa’atoaga, faatasi ma nisi o ana manu fafaga, ma alu fa’alilolilo i le fale o lona uso laititi, ma fa’atumu fale teu meaai a lona uso.

Ina ua toe fo’I mai le uso matua, ma alu atu i lona fa’ato’aga, i le mea o teu ai ana oloa po o fua o fa’atoaga e masani ona la’u i le maketi e fa’atau ai, ua matua’i fa’atumulia i so’o se fua o fa’ato’aga, faapea le alaisa.  Ua manatu ifo le uso matua, oka, o lea lava e lava a’u fua o faatoaga e ave i le maketi.  E mafai lava ona toe ave nisi mea ma si o’u uso laititi.

Ae o le uso laititi foi ia, u ausu atu i totonu o lona fale teu meaai, oka, ua matuai faatumulia foi i fua eseese.  Ma sa manatu le uso laititi oka, ua ova ma tele nei meaai mo na’o a’u to’atasi.  Se’i o’o nanei ona ou toe alu lea e toe ave nisi fua o fa’atoaga ia mo lo’u uso matua, aua e toatele lana fanau e tausi.

Ua o’o i le po, ona tapena foi lea o lenei au uso, a la’ua ta’avale solofanua, e la’u ai ni fua o fa’ato’aga mo leisi.  Sa fai fa’alilolilo lava ia gaioiga a nei au uso ina ia le iloa mai e seisi.

Ae toe malama foi le taeao na soso’o ai, ua matua’i paso lava nei alii, ina ua toe o atu foi e siaki a la fale e teu ai fua o a la fa’ato’aga, ua toe tutumu mai foi.

O le po lona tolu, ua toe sauni foi lenei au uso, e toe la’u nisi fua o fa’ato’aga mo leisi.  Ae a’o aga’i atu le tama matua i luga o le a’ega ma lana uta i lena po, ae ona va’aia se tagata ma sana taavale solofanua o lo o fotua’i mai.  Na iloa mamao atu lava e le uso laititi, o le ta’avale solofanua a lona uso lea o lo o tau a’e atu i luga o le a’ega.

Ina ua fetaui lenei au uso ma o la va’aia le uta a leisi lea o lo o la’u atu, ma o la malamalama i le mea o lo o tupu, sa talie lenei au uso ma feopoopoa’i i luga o le auala.

[IA MANUIA TOE FUAFUAGA I LE FAAIUGA O LENEI VAIASO]