O FASILA’AU FAATAULAITU

Ina ua feoti matua o le alii o Iosua, sa ave o ia e le tuagane o lona tina e tausi.  Ae peitai, e le i umi, ae maliu foi le tuagane o le tina a Iosua.  Ae sa iai se uo a le ‘uncle’ a Iosua, sa ia aveina Iosua ma tausi, e ui ina e le i fiafia iai lona to’alua, i lea faaiuga.  Sa iai se talitonuga i le fafine, e leai lava se mea lelei e maua i le tausiga o si tama o Iosua, na’o le tele ai o le gasu.

Sa tuputupu a’e si tama o Iosua ma lenei fafine agaleaga, i le tau leai o ni mea’ai e fafaga ai Iosua.  E o’o i lavalava a Iosua, e masaesae ma palapala.  Fai mai lenei fafine agaleaga, ua tuai na o’o mai le aso e alu ese atu ai lenei tamaititi mai i le la fale, ua alu tupe i le fafagaina ma faalavalava.

Ua o’o i se tasi o aso, ua salalau le tala, i le osofaia e se tagata o le fale a se tamaloa mau’oa ma gaoia ni meafale sa i totonu.

Ae ua oso foi i luga le fafine agaleaga lenei ma faapea mai, “Ai foi o Iosua lea na gaoia le fale o le mau’oa”.  Ma ua salalau solo le faamatalaga lea a le fafine agaleaga, o si tama o Iosua na gaoia le fale a le mau’oa. Ma e le i umi  ae le toe vaaia si tama o Iosua i totonu o le nuu.

Ua le iloa e Iosua po o fea o le a alu iai.  O le mea lea na alu ai loa agai i totonu o le togavao.  E le i umi na savalivali Iosua i totonu o le togavao, ae ona tau atu i se maea o taatia mai i lalo o se la’au.  Ua tago atu nei ia Iosua ma piki i luga le maea ma ua oso se manatu ia Iosua, e manaia le maea e faai’u ai lona ola, aua e o’o mai le pogisa, e osofaia nei o ia e manu feai.

Ua savali atu nei Iosua ma le maea e su’e se la’au e mafai ona fa’aaoga e saisai ai le maea.  Ae faateia Iosua i lona vaai atu i ni moli, o emoemo mai i se vaega o le togavao.  

Ua savali faatopetope atu nei iai Iosua ae o le taimi lea ua fafa leisi tatalo i luga o leisi tatalo, ina ia agalelei ni tagata o lo o nonofo i le mea o sau ai le mumu o moli.

Sa matua’i faate’ia Iosua ina ua pi’o atu i le pi’oga e tau i le mea o mumu mai ai moli, ae feto’ai ma se manu vae fa, e fai o le maualuga ae o le tino lapo’a.  Ma i luga o le ulu o le manu, o iai ni seu ma’ai lava.

“O fea e te sau mai ai?  Na faafefea ona e o’o mai i le nu’u o manu?” o le fesili mai lea a le manu lenei.

“Na ou iloa mai le ola atu o moli mai i le la’au lale,” o le tali lea a Iosua.

“Sa le tatau i le la’au lena ona faasino atu ia te oe le a’ai a manu,” o le toe faapea mai lea a le manu tele lenei.  “E tatau ona e toe fo’i i le mea na e sau ai.”

Na matuai faanoanoa le loto o Iosua ma ia taumafai e toe su’e lona auala e toe fo’i mai ai i fafo o le togavao.  Ae e fiu lava Iosua e savali, ae e toe i’u lava lana savaliga i le mea lea e mumu mai ai moli, i le ‘a’ai a manu o le vao.

Sa tu loa Iosua ma tilotilo solo ma ia iloa atu se fale tele lava, na tolotolo atu Iosua ma tu i le faamalama ma tilotilo i totonu. 

“O le a amataina le fonotaga, faamolemole faama ma mai le tatou pisa,” o le tala lea a le manu o lo o tu i le pulela’a.  Ma le vaai atu o Iosua, o se pua’a lapo’a lea o lo o sasa mai le samala.

“O a ni mea mamana fou e mafai ona fa’aali i lenei afiafi?” o le valaau mai lea a le fagafao lea o lo o tu i le pulela’a.

“Faamolemole, pe mafai ona tatou agai atu i fafo?” o le fesili mai lea a le elefane.

Ua vaaia e Iosua le ulufafo uma atu o manu ia sa i totonu o le fale.  Ma ina ua i fafo uma, sa piki loa e le elefane se lala la’au ma gagau ma togi i lalo, ma na maofa Iosua ina ua vaai atu ua liu fale ia le lala la’au lea.

Ona tago lea o le elefane ma toe piki i luga seisi lala la’au ma gagau ae togi i luga o le fale, ma na taufai ofo uma manu ina ua nimo le fale.

Ua faapea atu le elefane i isi manu, “O mai e faata’ita’i.  Mafaufau i so’o se mea e te mana’o iai.”

Ua faapena ona o mai manu, ma tofu ma le lala la’au, ua gagau ona togi lea i lalo, ona tino mai lea o mea o lo o latou mananao ai, e pei o ofu, o ula, o tautaliga, o meaai.

I le leva o le po, sa faapea loa ona ta’ape ia manu ae ua toe ai nei o le alii o Iosua ma sa ia savali atu loa ua u’u mai se lala la’au maneta ma gagau ma togi i lalo, a’o mafaufau i mea’ai, ona ua leva na fia ai si tama.  Oka se tele o mea’ai na liu iai ia le lala la’au lea na gagau e Iosua.  Ma sa le faatali loa le alii ae ua saofai ifo i lalo ma fai loa lana taumafataga.

Ina ua uma na ai le alii, sa ia tago atu loa i le u’u mai nisi lala la’au ma tu’u i lana taga ma savali ese atu loa ma lafi i se pupuvao.

[IA MANUIA TOE FUAFUAGA O LENEI VAIASO]