O LE OFU LANUMUMU A TINA

E iai se ofu lanumumu a lo’u tina, ou te fiafia lava iai.  E fai o le umi, ae o le manaia ia le mafanafana.  Ae o le mea pito sili ona manaia i le ofu a lo’u tina, ona e manogi manaia, e pei lava o Tina.

Oute alofa tele i lo’u tina ma o lo’u fiafia ia e fai faatasi a ma galuega.  E pei o le kukaina o meaai, o le veleina o le matou togalaau po o le faamamaina o le matou fale.  

O so’o se taimi lava e tu’ua mai ai la’u a’oga, ua leva ona faatali atu lo’u tina ma sa’u mea’ai ma e muamua lava ona fusi atu a’u, pe a ou taunu’u i le fale.

A o’o i le po, ou te fiafia lava e faalogologo a’o pesepese malie ma ma momoe faatasi i lo’u ta’inamu.

Na o’o i seisi aso, ae faapea mai lo’u tina ia te a’u, “Faalogo mai oe si a’u tama.  O lea o le a ou alu ou te faigaluega, e su’e mai se tupe e fesoasoani i le tatou aiga.  Ma o la’u galuega, e amata atu lava i le aso Gafua se’ia o’o i le aso Faraile.  Ae o aso Toonai ma aso Sa, ou te nofo ai i le fale, e toe fai a ta galuega ma ta tafafao.”

Sa va’ai e si o’u tina le fa’anoanoa o o’u foliga ma le maligi o o’u loimata.

“Ae o ai o le a faatalia a’u ma tapena la’u mea’ai pe a tu’ua mai la’u a’oga?” o la’u fesili atu lea i si o’u tina.

Sa faapea mai loa lo’u tina, “Ae a pe afai ae tu’u lo’u ofu lanumumu lea e te fiafia ai lava? So’o se taimi lava e te misia ai a’u, ona e tago lea e ofu ma e te lagona ai lo’u alofa tele ia te oe.”

Ua ou fiafia lava ma ou tago i le fetosofa’i solo le ofu lanumumu a lo’u tina, i so’o se mea ou te alu ai.  Ina ia ou faalogoina lona mafanafana ma lagona le manogi o lo’u tina.

Ma so’o se taimi lava e tu’ua mai ai la’u a’oga ae e leai lo’u tina, ona ou tago lea ofu lona ofu lanumumu.  So’o se taimi ou te ta’alo ai i fafo ma ou misia lo’u tina, ona ou tago lea ofu lona ofu lanumumu.

E o’o lava fo’i pe afai ou te alu e vele vao i fafo i le ma togala’au, ae ou lagonaina lo’u fa’anoanoa i le leai o lo’u tina, ou te lagona lava lona faatasi mai, pe a ou alu e aumai lona ofu lanumumu, ou te ofu ma vele vao ai.

I po, pe a tuai ona manava mai lo’u tina, ou te lagona ai fo’i lo’u faanoanoa ma ou misia lo’u tina.  Ona ou tamo’e lea toso mai lona ofu lanumumu ma ou ‘ie ‘afu ai, ona ou le toe faanoanoa lea.

Ua o’o i se tasi aso, a’o o’u ofuina le ofu lanumumu a lo’u tina, sa ou taumafai e sosogi lona manogi, ae peitai, ua sui le manogi o le ofu.  Ua manogi i mea’ai ma vaiinu e masa’a ai i luga i taimi ou te ‘ai ai.  Ua manogi palapala i taimi ou te aveina ai i fafo pe a ou alu e ta’alo ma vele le ma togala’au ma tina.  Ae le gata i lea, ua manogi pefua, i lo’u fetosoa’i solo, i luga o le palapala.

Sa ou alu loa toso le ofu lanumu a lo’u tina I le paipa ma tu’u i totonu o se pakete vai ma sasa’a ai se moli ta lavalava, ma ou tago loa i le nuti malosi, ma tatau ese le vai ona avea lea i le tautau i le uaea i tua o le matou fale.

Ae peitai, e le’i umi lava ae sau se matagi malosi lava ma lelea ‘ese ai le ofu lanumumu a lo’u tina mai i le uaea.

Ua ou tamo’e saoasaoa atu e tuliloa le mea ua lelea atu iai le ofu lanumumu a lo’u tina.  Ae sa ou te’i lava ina ua pa’u tonu lava le ofu lanumumu a lo’u tina, ae taunu’u mai ma lo’u tina i le fale.  Ma na a’apa atu lo’u tina ma u’u mai lona ofu lanumumu ma fa’amaulu loa.

[IA MANUIA FUAFUAGA O TOTOE O LENEI VAIASO]