“…O USO MO ASO VALE”

“Savaliga! Sole Savaliga! Sau e alu i le fale a Kagielu e aumai le ko’i a le koeaiga lea ga sau faagoi aku, lea lava e le’i  koe aumaia, ae e fia usu le koeaiga i ga’uka kaeao e fail aga galuega,” o le valaau mai lea a si loomatua o Vineta i si ana tama o Savaliga.

“Faakali se’i uma ga ou ‘ai!” o le tali valaau mai lea a Savaliga ma punou lava i luga o le laulau e faauma lana mamoe sa falai i le maukeni ma le faalifu talo, ae salani i le ipu koko Samoa.

“Makua’i leva ga gofo le la koeaiga ae le fai mai e aumai laga ko’i ae le’i po le mea,” o le tomumu lea a Savaliga.

Ua talie ona uso o Moli ma Niumata ma si ona tuafafine o Moana i le tomumu a Savaliga ona ua latou iloa lelei le mafuaaga e musu ai Savaliga e alu i le fale o Tanielu, e aumai le to’i a lo latou tama.

“Ae a pe a kakou o,” o le augani atu lea a Savaliga i ona uso.

“O le a le mea e ke pala’ai ai? E leai lava seisi e fia avea oe,” o le tali mai lea a Moli.  “ Ae magakua e ke faakulou pe a pasi aku i luma o le fagua kagu,” o lana tala lea ma ‘eu le ulu a Savaliga. 

“A valaau mai seisi ia oe, aua ge’i e kilokilo iai, aua e ke kilokilo loa iai, maua loa ma oe ae koso oe,” o le faaopoopo mai a Niumata.

“Ku’u loa lua kala ua le malie,” o le tala ita lea a Savaliga.

“Shhh, ku’u loa le kama ae o ifo e kapega ipu gae,” o le fesoasoani atu lea a si teine o Moana i si ona tuagane laititi.  “Aua e galo ona e alu ma ave le moli uila, Savaliga.”

“Ioe, vaai le moli uila i galo, aua e fefefe le vaega le la i le malamalama,” o le tala lea a Moli ma featai leotetele ma Niumata.

Ua uma le toe fia ‘ai o Savaliga i ulaga a Moli ma Niumata, ae ua tu loa i luga ma alu atu aumai le moli uila mai luga o le sefe ipu ma savali loa i fafo o le faitoto’a.

“Vaai a kago aku seisi ia ke oe, aua ke kamo’e!” o le valaau mai lea a Niumata ma toe alua’e i luga le la talie leotele ma Moli.

O le fale a Tanielu, e le mamao tele mai i le fale a le aiga o Savaliga, ae o si ona pona, e fai o le leai o ni fale i le va o fale e lua, ae e leai se moli o le auala galue e malamalama ai le ala.  Ia ma leisi mea, e ui atu le auala i tafatafa o le fanua tanu a le nu’u.  Ae o si tama o Savaliga, o le sifi o pala’ai i le pogisa.

Ua alu le tama o Savaliga ma lana moli uila, a uma na ki i luma, ua ki i autafa, ona ki lea i tua, ua ki i luga o ‘ulu ma niu.

Ua latalata atu le alii o Savaliga i tafatafa o le fanua tanu, ae o le taimi lea, ua le manofo lelei le ta ta vale o le fatu o le alii.  Ua tilotilo solo ona mata pe na te iloa atu seisi e la te savavali faatasi.  E leai ma seisi.  Na amata lemu le savali a Savaliga, ma faasolo atu lava ina faatopetope lana savali, ae ua le toe tilotilo solo le alii, ae ua ki faasasa’o i luma lana moli uila. 

Ua fa’alogo ifo Savaliga, ua amata ona tutu laulu pito i tua o lona ulu, ae ua na lagonaina foi e pei ua fefete ifo lona ula.  Ae na ona lagona lava e Savaliga le pa’o o ma’a o le fanua tanu, na le i toe tu’ua i seisi itu, ae ua pefu ma le atoa.  E muliga foi le faga a le loketi, i le pamuga o vae o Savaliga i lana melefoni agai i le fale o Tanielu.

Na fa’ate’ia Savaliga, ua alu atu le talie a tagata i le mea lea o lo o iai le fanua tanu.  Ua faatutu taofi a Savaliga ma ki mai lana moli i le mea lea e alu atu ai le taliega a tagata.  Ma lona vaai mai, o ona uso o Moli ma Niumata lea e nonofo lelei i luga o leisi fanua oti ma talie atu ia te ia.

IA MANUIA LE FAAIUGA O LENEI VAIASO!