Ads by Google Ads by Google

E FAI O LENEI AE O LENA


[ata: SN]

O LE TUPU ATAMAI MA LE GAOI

I aso a lava ua leva, na alu ai se tamaloa e suafa ia Siaosi e ave sana tagi i le tupu o le malo, ona ua gaoia e se tagata lana tupe.  O lenei tupu, ua a’ave tala i lona atamai tele.  E leai se fa’afitauli e tulai mai i lona malo, e le mafai e lenei tupu ona fofoina, po o se fesili foi, e na te le mafai ona taliina.

O le tulaga na matua’i ofo ai tele le tupu, ona o le fale lea e nofo ai Siaosi, o le matua’i malu puipuia tele lava.  Ona o Siaosi, o se tasi lea o minisita i totonu o le malo a le tupu.  Ma o lona fanua po o le lotoa a le alii minisita lenei o Siaosi, e siomia e ana leoleo, e o’o lava foi i totonu o lona maota, e le mafai ona so’ona savali ai se tagata, ona e tofu lava le tulimanu ma le leoleo o lo’o tu ai.

Ua oso le masalosalo a le tupu atamai lenei, i isi ana minisita, atonu o latou ua gaoia le tupe a le alii o Siaosi.

Ua faatonuina nei e le tupu ia ana auauna, e aumai le manu lenei o le Asini, ma ia saisai le asini i se pou.

Ona faatonuina lea e le tupu ia ana minisita uma, e o e sisi i luga le siusiu o le Asini ma fai upu nei, “Ou te le’i gaoia se tupe”.

A mae’a, ona toe faapotopoto uma atu lea i le maota o le tupu, i le aso e soso’o ai.

Ua faapena loa ona fai, ua aumai le Asini ma saisai i se la’au, ona ta’itasi lea ma agai atu iai minisita uma o le malo ma sisi i luga le si’usiu o le asini, ma fai upu nei, “Ou te le’i gaoia se tupe.”

O le aso na soso’o ai, sa faapea ona faapotopoto uma nei minisita i le maota o le Tupu.

Ma sa faapea ona faatonuina uma latou ina ia tu’u uma o latou lima i luma, e fa’asaga i lalo le tualima.

Ua fetilofa’i ia minisita, po o le a le uiga o nei mea e fai e le tupu.

Ua savali mai nei le tupu ma tilotilo i a’ao o ana minisita, ma ia vaaia, le uliuli uma o a’ao a ana minisita, seia vagana ai le alii o Kapeli, o lo’o mama lava ona lima.

Ua faapea mai loa le Tupu, “O le gaoi lea.”

Ua tau fai ofo uma tagata aemaise o minisita, ae ua oso le alii o Kapeli ma faapa’u i lalo ma ifo to’ese mai i le tupu ma alaga, “E faapefea ona e imautinoa?”

Sa tali le tupu ma faasino i le si’usi’u o le Asini, ma faapea mai, “Sa ou faatouina le vali uliuli o le si’usi’u a le Asini.  Aua na ou iloa lelei lava, e le taitai ona tago le gaoi i le si’usi’u o le Asini.”

Sa faapea ona atili ona ifo to’ele le alii o Kapeli ma faapea mai, “Faamolemole lau afioga i le Tupu, faamagalo mai a’u”.

[IA MANUIA FUAFUAGA O LENEI ASO]