O LE POVI NA SE, O FE’ILAFI

Sa iai se povi e igoa ia Fe’ilafi ma sa nonofo faatasi ma nisi manu i se nofoaga tausi manu.  O lenei nofoaga e tata’a solo ai manu male sa’oloto.  E leai ni pa e tau taofiofi mai ai latou.

O le povi lenei o Fe’ilafi, o se povi tamaitai ma o le fiafia ia i fugalaau, aemaise lava pe afai e tago ia le pato o Lusi e fili pei o se pale, ona e vaai lea i le mimita o le povi o Fe’ilafi e pale ai.

O se tasi o aso, na va’aia ai e Fe’ilafi ia ni fugalaau mananai lava, i luga o se tamai pupu vao ma sa ia savalivali atu loa iai.  Na fa’ate’ia Fe’ilafi ina ua taunu’u atu i le mea na va’aia ai nei fugalaau, i lona va’ai atu, oka se tele o isi fugalaau matagofie o lo’o tutu solo mai.

Ma sa faapena ona savalivali solo Fe’ilafi ma sogisogi atu i lea la’au, ua tago atu i le u mai leisi fugalaau ma sili i lona taliga.  Ae peitai, sa le’i faamalieina ai lona loto ma ia oso atu i leisi fugalaau, ma leisi fugalaau.

Ua oso mai le lelava o Fe’ilafi, ona ta’oto ifo loa lea i lalo ma fai sana malologa.

Ina ua te’i ifo i luga ia Fe’ilafi mai i lana malologa, ua pogisa le lalolagi atoa.  Ua oso le fefe o Fe’ilafi, ua fiu e tilotilo solo, ua na leiloa atu le fale o lo’o nonofo ai manu.

Ua amata nei ona savali Fe’ilafi, e vaai pe na te iloa atu seisi.  Ua manatu Fe’ilafi, atonu o lo’o saili o ia e lona matai.  Ua fiu Fe’ilafi e savali, ae leai lava seisi e la te fetaui.  Ua amata ona popole tele le loto o Fe’ilafi, o le a le toe vaai i ana uo ma lona matai.

O le taimi lea ua amata ona tagi Fe’ilafi, “Moooooooo! Mooooooo!” o le tagi leotele a Fe’ilafi.

E le’i umi lava ae faalogoina e Fe’ilafi, le ou mai o se ta’ifau.  Ua tu nei Fe’ilafi ma fa’alogologo atu i le itu o lo’o ou mai ai le ta’ifau ma ia tamo’e saoasaoa atu loa iai. 

E alu lava la i le atoa ia Fe’ilafi ma tagi leotele “Mooooooo! Mooooooo!”

Sa oso maualuga i luga ia Fe’ilafi ina ua fetaui ma le ta’ifau, o Sole ma faapea mai iai Sole, “Ua matou fiu e su’e oe.”

[IA MANUIA TOE FUAFUAGA O LENEI VAIASO]