E FAI O LENEI AE O LENA
O LE PERENISE MA ONA TAUNU’UGA E TOLU
I aso a la ua leva, na iai se tupu ma se masiofo sa mo’omo’o lava mo se la pepe. Ma na lagona e le lagi a la talosaga ma o la mana’oga ma talia mai ai a la talosaga mo se la pepe.
Ua fanau mai se perenise i totonu o le malo. O se fiafiaga sili lea i le tupu ma le masiofo ma o la faatonuina ai le faia o se pati tele e faamanatu ai le soifua mai o le aloalii o le malo.
Ua ave tusi valaau i malo e tele ina ia mafai ona auai mai e fiafia faatasi ma lenei tupu ma le masiofo, aua le fanau mai o si a la pepe fou, le aloalii o lenei malo.
Ma sa o’o foi i faataulaitu o le vao, sa o’o atu foi ia i latou ia le malelega a le tupu, ina ia mafai ona auai mai, aua se faamanuiaga faapitoa mo lona atalii fou.
Ae peitai ane, e ui i le manaia o le pati ma le fiafia o tagata, ae ina ua o’o mai faataulaitu ma tilotilo atu i le pepe o taotooto mai i totonu o lona moega, sa va’aia e le tupu foliga faanoanoa o faataulaitu ma ia fesili atu iai, po o le a le mea ua tupu.
Sa fa’ailoa mai iai e nei faataulaitu, paga lea, e leai so latou mana e mafai ai ona sui le lumana’i o le aloalii. Ma na fa’ailoa atu iai e faataulaitu nei, o le 4 i le 5 tausaga o le perenise, o le a fasiotia ai o ia e se manu. E le Iloa tonu e faataulaitu, po o se kolokakaila, po o se ta’ifau ia po o se gata, o le a fasiotia le perenise o le malo.
O le mea lea na faatonuina ai e le tupu le lokaina o le perenise i totonu, e le o’o mai i fafo. Ma ua faatonuina foi le fa’atama’ia uma o kolokakaila, ta’ifau ma gata o le malo.
Ma ua faapena ona fai. Ua tausi le perenise i totonu o le maota o le tupu ma le masiofo, e le taitai ona o’o mai i fafo. E na ona avatu lava i le faamalama ma faatilotilo i fafo, ae le o’o mai i fafo.
O le lima o tausaga o le perenise, a’o tutu i le faamalama ma tilotilo mai i fafo, sa ia va’aia ai se ta’ifau. Ua fesili le perenise po o le a le la manu. Ma sa mana’o ina ia maua sana manu faapena.
Ia sa faapea atu le tupu, afai e mana’o le perenise i sana ta’ifau, ia ua lelei, o le a ave iai sana ta’ifau.
Ua aumai nei le ta’ifau laititi mo le perenise ma ua tupu faatasi ma le perenise. Ua avea ma uo mafana a le perenise.
Ua matua le perenise ona ia augani atu lea i ona matua, mo se avanoa e alu ai e va’ai I le lalolagi. Ua faapea atu le perenise i ona matua, ua na malamalama lelei i le valoaga e uiga i lona maliu. Ma e le mana’o e nofonofo i totonu o le fale, ae ia alu atu ma matamata i le matagofie o le lalolagi ae e le’i o’o mai lona oti.
Ua ioe nei iai ona matua ma ua alu loa le faigamalaga a le aloaliii i isi nu’u tuaoi. O iina na ia feiloai ai i se afafine a seisi foi tupu ma ua mana’o e fai lenei purinisese ma ona to’alua.
Ma ua saunia nei le faaipoipoga a lenei aloalii ma le purinisese. Ae sa faamatala iai e le aloalii i le purinisese ia le valoaga e uiga i lona maliu. Ma na fesili ai le purinisese pe aisea la e fealuai ai ma feaveai lana ta’ifau, ae o lea ua valoia lona maliu i se ta’ifau.
Ae peitai, sa le’i avea lea ma tulaga na ave’esea ai le alofa o lenei perenise i si ana ta’ifau.
Ma o le taimi atoa lava o le olaga o le perenise, sa sulu ai i ona sulugatiti se agaese ma’ai ma e le tu’ua foi e lana auauna ona tafatafa.
Ua mae’a le faaipoipoga a le ulugalii fou ma o le po muamua lava o le la ulugalii, na vaaia ai e le purinisese ia se ao pogisa i totonu o le la potu ma sa iloa lelei atu e le purinisese, o le gata le ao pogisa lea ua aga’i i le mea o lo’o moe ai le perenise.
Ua tamo’e faatopetope atu nei le purinisese ma ligi mai se ipu susu ma tu’u tonu lava i tafatafa o le moega ale perenise ma sa vaaia le se’ese’e mai o le gata ma tau mai i le ipu susu, ma fao ai loa i le inu. O le uma lava o le ipu susu, ma moe taagulu ai loa le gata.
Ua valaau atu nei le purinisese i auauna e o mai e pu’e le gata ma ave e faatama’ia i le togavao.
O leisi aso a’o savalivali le perenise ma le purinisese i tafatafa o se vaitafe, ae fa’ate’ia i la’ua i le oso mai o se kolokakaila mai totonu o le vaitafe. E le’i faatali le purinisese i lona oso atu ma se’i mai le agaese mai i le perenise ma tui tonu lava lalo o le manava a le kolokakaila ma pe ai.
Ma ua fa’asaoina ai loa le perenise mai i manu e tolu sa valoia o le a fasiotia o ia.
[IA MANUIA TOE FUAFUAGA O LENEI VAIASO]