O LE TEINE, LE LIONA MA LE PURINISESE LAUULU LANU AURO

I aso a la ua leva, sa iai se teine mativa e igoa ia Filomena.  I lona mativa tele, sa tele ina moe o ia i autafa o le alatele po o totonu o togavao.  Ma o aso uma, e fealuai ai le teine o Filomena i le sailiga o ni galuega mo sana meaai.

O se tasi aso, sa fa’afaigaluega ai o ia e se faifa’ato’aga, e alu e ave ana povi i le mea o iai le vao lafulemu, e ‘a’ai ai ana povi.  Ma o le galuega lea a Filomena ua fai i aso taitasi, o le usu e ave povi e fafaga i le mea o iai vao.  A o’o i le afiafi, ona toe aumai lea o povi e loka i le latou pa.

O se tasi aso, na fa’ate’ia ai le teine o Filomena, a’o leoleo ana povi, i le tagi leotele mai o se tagata.  Ua fa’agalo e Filomena ia povi, ae ua tamo’e fa’avave atu i le mea o lo’o lagona atu ai le leo o le tagi leotele.  Ae e taunu’u atu Filomena, e le o se tagata o lo’o tagi, ae o se liona o lo’o fa’ataitaio ona o le tiga o lona vae, o loo mau ai se la’au matuitui.

Sa tau fa’alatalata atu Filomena i le liona ma ia tago atu i le se’i ese le la’au matuitui mai lona vae.  Ai ona o le tigaina o le liona, sa ia le ano mai ai i gaioiga a Filomena, ae ua na o le eto o lona vae lea sa tu ai le la’au matuituia.

A’o tu le teine o Filomena ma tilotilo atu i le gaioiga a le liona, sa ia toe manatuaina ana povi ma ia toe tamo’e fa’ata’alise mai ai i le mea na tu’u ai.  Ae paga lea, e taunu’u mai le teine, ua fiu e saili, ua leai uma ni povi.

Na toe fo’i le teine o Filomena i le faifa’ato’aga ma lona fefe tele, ae peitai, na iloa e Filomena, e tatau ona alu e ta’u le mea moni i le faifa’ato’aga.

Sa matua’i ita tele le faifa’ato’aga ma otegia ma sasa si teine o Filomena.  Ona ia faapea atu lea, “Taeao e te alu e va’ai a’u pua’a.  Aua ne’i iai se pua’a e gaoia!”  Ma pe a ma le tausaga, o fai le galuega lea a si teine o Filomena, o le va’aia o pua’a a le faifa’ato’aga.

Ae o’o foi i leisi taeao, ae toe lagona foi e le teine le tagi leotele  lava lea e tasi ma ia toe tamo’e atu foi, ae ona vaaia le liona lava lea e tasi, o taoto mai ma ona foliga ua fa’amanu’alia, e pei na sasa e seisi.

Ua le toe fefe le teine o Filomena ae ua savali sa’o atu lava i le Liona ma amata ona togafiti ona manu’a. Ua fa’aaoga e Filomena ia lau ma a’a o la’au e sai ai foliga o le liona ma sa tilotilo mai foi iai le liona e pei o lo’o faapea mai, “Fa’afetai mo lou alofa.”

Ae toe manatua foi e Filomena ia pua’a, ma le toe tamo’e mai foi, ua leai ni pua’a.  Ua saofa’i ane nei i lalo ia Filomena ma tagi aueaue aua ua ona iloa foi lona i’uga pe a alu e ta’u i le faifa’ato’aga, ua ave e le tagata ia pua’a.

A’o tagi lotulotu le teine o Filomena, sa oso mai se manatu ia te ia, e alu e pe’a i luga o se la’au maualuga e tilotilo solo ai pe na te iloa atu po o fea ua o’o iai ana pua’a.  Ua faapena loa ona fai, ae e le’i lelei tele le saofa’i a Filomena i le lala pito maualuga lava o se la’au tele, ae ona va’aia se tulaga, na lago uma ai lava ia le sailiga o ana pua’a.

E tilotilo mai i lalo o le la’au lea o lo’o saofa’i ai le teine o Filomena, sa ia va’aia se alii talavou o savali tonu mai lava i le ma’a tele o lo’o i lalo o le la’au lea o lo’o saofa’i ma tago ua una’i ese le ma’a, ma iloa mai ai e Filomena ni sitepu e pei e alu agai i totonu o se ana tele lava.

Na va’aia e Filomena le savali o le alii talavou lenei i totonu o le ana ma toe se’e atu ai le ma’a ua toe tapuni le gutu o le ana.  Ua tonu nei ia Filomena, o le a fa’atalitali se’i toe sau i fafo le alii lea.

O le taeao na soso’o ai, na fa’ate’ia le teine o Filomena o lo’o tautulemoe i luga o le la’au, i le toe gase o le ma’a.  Na fa’atalitali le teine i le savali mai i fafo o le alii talavou, ae na toeitiiti pa’u mai i lalo, ina ua va’ai mai, o le liona lea sa ona lavea’iina fa’alua, lea o lo’o savali mai i fafo mai le ana.

Ua alu ifo faatopetope ane nei i lalo ia Filomena ma savali atu i le ma’a ma taumafai e u’una’i ma sa faigofie ona se’e ese le ma’a ma savali atu loa i totonu le teine o Filomena.  E le’i umi lava na savali Filomena ae ona tau atu i se fale tele ma le manaia ma ia alu ai loa i totonu.

Na fai sina leva o fealualua’i solo Filomena i totonu o le fale e matamata o potu eseese, e fai o le tetele ae o le matagofie ona teuteuina.  Sa tau atu foi Filomena i se potu o iai ni fata tusi ma ia saofa’i loa i lalo ma amata ona faitau.  Ina ua mae’a lea, sa agai atu loa le teine i totonu o le umukuka ma amata ona ia kukaina se mea’ai.

Ina ua uma ona ‘ai le teine, sa ia tago loa tu’u le tusi sa ia faitauina faatasi ai ma vaega na totoe o le mea’ai sa ia kukaina, i luga o le laulau ma fa’apulou.  Ona ia toe savali atu loa lea i le mea na sau ai, ma toe tapuni le gutu o le ana i le ma’a, ona toe pe’a foi lea i luga o le la’au.

Ina ua amata ona fo’i le la i lona nofoaga i lena afiafi, na iloa atu e le teine le toe savali mai o le liona i le mea o iai le ma’a i lalo le la’au lea o lo’o nofonofo ai, ma savali agai i totonu o le ana.  E le’i umi lava, ua pogisa le lalolagi, ae toe va’aia e Filomena le toe se’e ese o le ma’a mai i le gutu o le ana, ae savali mai i fafo le alii talavou.  Na tu le alii ma tilotilo i lona itu taumatau faapea lona itu tauagavale, ona savali loa agai i totonu o le togavao.

O isi aso e lua na soso’o ai, sa toe faia foi e Filomena le mea lava e tasi.  O le nofonofo i luga o le la’au seia matala i le taeao ma sau i fafo le liona, ona alu lea o ia i totonu ma nofonofo i totonu o le fale ma faitau tusi, ma kuka, ma ‘ai ona toe alu’ese lea, ae tu’u le tusi na ia faitauina i lea aso ma se mea’ai, e faapulou i luga o le laulau.

O le po lona tolu, ina ua se’e ese le ma’a ae agai mai i fafo le alii talavou, sa fa’atopetope loa ona sese’e mai i lalo mai i le la’au le teine o Filomena ma valaau mai, “Faatali! O ai lou igoa?”

Na fa’ate’ia le alii talavou i le tilotilo atu i luga o le la’au o lo’o tu ai i lalo, ae puna mai loa i lalo ia Filomena.  “O oe lea sa e faitau tusi ma saunia mea’ai i lo’u fale?”  O le fesili lea a le alii talavou.  “Ioe o a’u.  O ai oe?  Ma e te iloa se mea e uiga i a’u pua’a?” o le tali atu lea a Filomena.

Na fa’amatala e le alii talavou, o ia o se perenise.  Ae ina o laititi o ia, sa fetu’u ai o ia e se aitu.  A o’o i ao ona liu liona lea.  Ma sa faapea atu le perenise, “Fa’afetai lava mo lou lavea’iina o a’u faalua.  Ae o au pua’a ma au povi, sa gaoia e le aitu, ona o lona ita i au galuega lavea’i sa e faia mo a’u.”

Ua fesili atu nei Filomena i le perenise pe faapefea ona ave’ese le fetu’u mai ia te ia.  Na tali le perenise, “E na o le tasi lava le auala.  O le aumai o se lauulu mai i lauulu lanu auro a le afafine o le tupu ona gaosi ai lea o se pulupulu mo le aitu.”

“Ia ua lelei, o le a ou alu i le maota o le tupu,” o le tali atu lea a Filomena.

Ua agai atu nei lenei teine lototele i le maota o le tupu ma maua ai sana galuega i totonu o le umukuka.  Sa alofagia tele lenei teine ona e le gata i lona galue malosi, ae o le agaalofa, lotomaualalo ma le lototele.  Ma i’u ai lava ina salalau atu tala e uiga ia Filomena i le purinisese.

Ua a’ami mai nei e le tupu le teine o Filomena ona ua mana’o lona afafine, po o le purinisese, e aveatu e fai ma se tasi o ana teine faigaluega.  Ma o se tasi o tiute taua a Filomena, o le selu ma teu fa’alelei le lauulu lanu auro a le Purinisese.

Ua fai sina umi o galue le teine o Filomena i lalo o le vaavaaiga a le Purinisese ma ua mafana foi le la mafutaga.  Ua o’o i se tasi o aso, a’o seluslu e Filomena le lauulu a le Purinisese, sa faapea atu ia Filomena i le Purinisese, “O oe o se tamaitai faamanuiaina tele.  Toatele o tagata e le faamanuiaina i ni lauulu e mafanafana ai o latou ulu i vaitaimi o le malulu.”

Na fa’ateia le Purinisese i le faamatalaga a Filomena ma ia faapea mai, “E iai se auala e mafai ona ou fesoasoani ai i na tagata?”

Ua faapea atu loa Filomena, “Aumai se vaega o lou lauulu e ave ma latou, aua e mafai ma e vave ona toe tupu mai lou lauulu.”

E ui i le faigata o le mea sa fai atu ai Filomena i le Purinisese, ae na ioe lava o ia.  Ae peitai, sa ia faapea atu ia Filomena, “O le a ou ave atu se vaega o lo’u lauulu, ae ia e folafola mai ia te a’u, o le a e fesoasoani mai, e saili mai se Perenise e fai ma o’u to’alua.”

Ua faapea ona ioe faatopetope le teine o Filomena ma ia toe fo’i loa i le vaomatua ma fa’aali i le Perenise le lauulu lanu auro a le Purinisese o le malo ma na faapea loa ona saofa’i le teine o Filomena e gaosi le pulupulu mo le aitu.

Ina ua mae’a lea, sa fa’atonu loa e le Perenise ia Filomena e alu loa e momoli i le aitu o lo’o nofo i le tumutumu o le mauga.  Ma sa faia uma e Filomena nei mea uma.  Ma na matua’i fa’amalieina le loto o le aitu i lana pulupulu na gaosia i lauulu lanu auro ma ia ave’esea ai loa le fetu’u sa tu’u i luga o le Perenise.

E le gata i lea, ae na toe fa’afo’i foi e le aitu ia pua’a ma povi a le faifa’ato’aga lea sa galue ai ia Filomena.

E toe taunu’u mai i lalo ia Filomena mai luga o le mauga, o lo’o tu fa’atali atu le Perenise mo ia.  Ua feiloai ma le fiafia le to’alua lea.  Ae paga lea, sa manatua e Filomena le mana’o a le Purinisese lea sa ia folafola iai, e na te sailia se Perenise e fai ma ona toalua.  E ui lava la i lagona alofa o le teine o Filomena i le Perenise ae peitai, sa ia folafola i le Purinisese o le a ia su’eina atu sana Perenise.

Ona o le alofa foi o le Perenise i le teine o Filomena, sa ia ioe ai o le a ia faaipoipo atu i le Purinisese o le malo, e fa’amaonia ai le folafolaga a Filomena, mo le lavea’iina o lona ola.

Ua aga’i atu nei Filomena ma le Perenise i le maota o le tupu, ae peitai, ina ua o la taunu’u atu i totonu i le mea o lo’o nonofo mai ai le tupu ma le masiofo faapea le Purinisese, na fa’ate’ia Filomena ma le Perenise, ina ua tilotilo mamao mai lava le masiofo ma ia tamo’e mai ma opo atu le Perenise ma tagi leotele ma faapea, “Oi talofae, o si a’u tama lea na ave e le faataulaitu!”

[IA MANUIA FUAFUAGA UMA O LENEI VAIASO]