O TAGIILIMA MA LE GALULOLO

Sa nofo se alii talavou e igoa ia Tagiilima ma lona aiga i se nu’u e faifa’atoaga alaisa.  Ua leva ona maliu le tama matua a Tagiilima, ae sa ia a’oa’oina ia Tagiilima i le auala e toto ai le fa’ato’aga, fofoina faafitauli ma ni isi lava tulaga i lona tuputupua’e.

O le tama matua a lenei alii o Tagiilima, o se toeaina sa fa’aaloalogia i totonu o le nu’u ma o se tagata mau’oa foi.  Sa tele ni fanua na faatauina e le tama matua a Tagiilima ae e le’i maliu o ia.

O le nu’u lea e nonofo ai Tagiilima ma lona aiga, e tu lata i le matafaga, i lalo ifo tonu lava o se mauga.

O se tasi aso, sa ta’alo’alo ai le alii o Tagiilima i luga o le mauga ma matamata ifo i lona nu’u, o lo’o pisi solo tagata i le tapenapenaina o se fiafiaga tele a le nu’u, o le a faia i lea afiafi,.

Ae fa’alogoina loa e Tagiilima le lulu o le lau’ele’ele.  E le’i malosi tele le lulu, ae na iloa lelei lava e Tagiilima le uiga o le mea ua tupu.  Aua e le o se taimi muamua lea ua fa’alogoina e Tagiilima le lulu o se mafui’e.  Ae pau le tulaga na uiga ese i le fa’alogo a Tagiilima, o le fai o le umi ae pei e fa’atosotosololoa le lulu o le mafui’e.

A’o tilotilo mai i lalo ia Tagiilima mai luga o le mauga, na ia va’aia le lulu o fale o le nu’u, ona le toe lagona lea o se minoi o se mea e tasi.

Ae o le taimi lea, ua va’ai atu Tagiilima, pei ua pogisa mai le sami, ua liua lona lanu mai i le lanumoana sa iai, ae ua lanu uliuli.  

Ma na va’ai atu ia Tagiilima, ua pei e mimiti atu e se tasi ia le suasami.  E pei ua tamo’e solomuli le la ma ave atu ai ma le sami, ae tu’ua ai na o le oneone ma amu.

Na fa’afuase’i ona manatua e Tagiilima se tala sa faamatalaina e lona tama matua ae e le’i maliu.  I se mea faapea foi na tupu a’o laitiiti o ia.  Ma na iloa lelei e Tagiilima le mea o le a tupu.

Ae o le taimi lea, ua vaai atu Tagiilima, ua taufetuli uma tagata o lona nu’u, aga’i i le sami e matamata i le mea maoa’e ua tupu i le sami.

Ua tu a’e nei Tagiilima ma tamo’e faatopetope atu i lalo i le nu’u ma tauvala’au, “Tamomo’e i le mauga! Aua tou te o i le matafaga! Tamomo’e i le mauga!”

Ua fiu Tagiilima e vala’au ma fai atu i tagata o le nu’u, ae ua na ona talie ma fai mai ua leaga le ulu o si tamaititi.

“Leai, tou te le malamalama,” o le tau ‘alaga lea a Tagiilima.  “E tatau ona tatou tamomo’e uma i luga o le mauga, i luga o se mea maualuga.”

Ae leai lava seisi e fia fa’alogo mai ia Tagiilima, ua na o le fetamoea’i solo ma ta’alao i’a ma figota ua ta’atitia mai i luga o le oneone.

Ua tu le alii o Tagiilima ma tau mafaufau seisi ana taga, ona liliu loa lea i le tamo’e agai i le fale ma u’u mai se fusi aulama ma tutu i le afitusi.  Ona tamo’e loa lea o Tagiilima i le mea o lo’o tutu mai ai fusi alaisa ua uma ona sele ma nonoa fa’a aputiputi, e tagata o le nu’u.

Ona tago loa lea o Tagiilima ua tu’u atu iai le aulama lea ua mumu ma amata ona susunu ia taufuifui alaisa nei, ma fa’asolosolo atu ai lava lea i alaisa uma.

Ua matua’i fa’ate’ia tagata o le nu’u, i le va’ai mai i ga’uta, ua talali atu le afi i tua o latou fale.  Ae ua tau fo no atu ia Tagiilima, “Tamomo’e i le mauga, o lea ua sosolo le afi!”

E fetaui lava le taunu’u o tagata uma o le nu’u i luga o le mauga, ae o latou va’ai mai i lalo, i se mea ofoofogia i tai i le moana.  O se galu pito sili ina maualuga, ua na ona agai mai lava i uta, fa’afao i luga o fale o le nu’u ma ta’alao atu aga’i i tai.

[IA MANUIA TOE FUAFUAGA O LE FAAIUGA O LENEI VAIASO]