O LE AURO NATIA

I aso a la ua leva, sa iai se tamaloa e igoa ia Falaoa, sa nofo i se a’ai i tafatafa o le sami.  O Falaoa o se tamaloa galue malosi tele ma e le fiafia e so’ona fa’aalu sana tupe maua.  E sefe lelei e Falaoa ana tupe, e ui lava i lona mativa ae e na te le fa’aaogaina lava se tupe tele, ona o lo’o iai sona popolega, ina ne’i iloa e tagata o lo’o iai ana tupe, ona o mai lea ua gaoi atu ana tupe.

Ua o’o i se tasi po, ua tago Falaoa ma ao uma lana auro ma tu’u i totonu o se ato, ona sa’esa’e loa lea i fafo atu o le a’ai, ma tanumia ai i lalo o se la’au.

O le aoauli na soso’o ai, na toe alu ai Falaoa e asi le nofoaga sa ia tanumia ai ana auro i lalo o le la’au. 

Ae paga lea, ua fiu Falaoa e eli solo lalo o le la’au, ua leai ana auro, ua gaoia.

Ua fa’alogo ifo Falaoa i lona fatu ua pei ua nuti ma ua alu a’e le pogisa i ona mata, ma tau puni lana manava.

A’o nofonofo Falaoa ma tagi lotulotu i le gaoia o ana auro, sa pasi ifo ai se toeaina o le nu’u, ma o lenei toeaina, o se alii faipisinisi ma e atamai tele.

“O le a le mea ua tupu ua e nofonofo to’atasi ai na’o oe ma ou foliga e pei sa e tagi?” o le fesili atu lea a le toeaina ia Falaoa.

Ua tago nei Falaoa i le faamatala uma le mea na tupu i ana auro, i le toeaina.  Sa fesili atu iai le toeaina, “Atonu na iloa mai oe e se tagata o e tanumia au auro i lalo o le la’au.”

Ae na tali Falaoa, e leai lava seisi na iloa mai o ia i le pogisa.

“Ia atonu o se tagata na ui mai i autafa o le la’au ma ona va’aia le suaina o le palapala, ma iloa ai o lo’o iai se mea o tanumia i lalo o le la’au,” o le toe faapea atu lea a le toeaina.

“Sa ou tanu fa’alelei a’u auro, ma toe fai faalelei le ele’ele ina ia aua ne’i iloa e seisi sa suaina,” o le tagi tautalatala lea a si tamaloa o Falaoa.

Ona nofonofo ai lea o le toeaina mo aso e sefulu ma tau mafaufau le fa’afitauli a Falaoa.  Ua o’o i le aso lona sefulu ona ia alu atu lea ia Falaoa ma faapea atu, “Ua uma ituaiga mafaufauga o tau sailiili le mafuaaga o lau faafitauli ma po o ai foi, ae paga lea.  Ua leai se mafaufauga ua o’o mai ia te a’u.”

A’o talatalanoa Falaoa ma le toeaina, sa fa’ate’ia i la’ua ina ua savali atu se tamaloa o le nu’u.  O lenei alii, e faaigoa e tagata o le nu’u, o le vale.

Ua ia fesili atu nei ia Falaoa ma le toeaina, po o le a le mea o lo’o la tau musumusu ai.  Sa fa’ate’ia Falaoa ina ua liliu mai le toeaina ma faamatala uma le mea na tupu, i le vale a le nu’u.  Ae o le taimi foi lea, ua savali atu ai ma se tamaititi ma fa’alogologo i talanoaga a le toatolu lea.

Na tete’i Falaoa ma le toeaina ina ua mae’a ona faamatala atu le mea o pagatia ai Falaoa, i le vale a le nu’u, ae tali mai le vale e faapea, “O le tagata sa eli ina a’a o le la’au mo se vailaau, o ia foi lea na aveina le auro natia.”

[IA MANUIA LE ALO ATU I PALOTAGA]