O LE GAOI I TOTONU O LE POTU TEU AI MEA’AI

I aso a la ua leva, sa iai se nu’u, sa nofo ai se isumu.  Ma o le amioga a lenei isumu, o le fiafia lea e alu i fale o aiga.  O se isumu e fia iloa mea uma ma e fiafia e asiasi atu i nofoaga fou.

O se tasi aso, na tau atu ai le asiasiga a lenei isumu i se potu e tumu i mea’ai eseese ma sa fiafia tele le isumu ina ua ia mauaina lea potu.

Sa le iloga le mea na o’o iai le fiafia o le isumu ina ua ia va’aia le tele o fata o le potu, ae tumu uma ia fata i mea’ai ‘ese’ese, e pei o sisi, falaoa, fualaau aina ma le tele o isi mea’ai felanulanua’i.

Ua amata ona soso atu le isumu ma ‘ai loa le sisi.  Ma ua le gata ina na’o le ‘ai, ae ua faapea foi ona amata ona gaoi e le isumu ia mea’ai mai totonu o le potu, ma la’u i le nofoaga o lo’o fa’amautu ai.

Sa amata le gaoi a lenei isumu, o fai ma le fa’aeteete ae peitai, na amata ona maitau e le aiga e ana le potu mea’ai, e foliga mai o lo’o ave e se tagata a latou mea’ai.  E ui ina o latou le iloa po o ai lea faia lea amioga, ae na latou iloa ua iai le mea o lo’o tupu i a latou meaai.

O se tasi aso, a’o toe faia foi le sauniga a le isumu i totonu o le potu mea’ai a le aiga, sa fa’ate’ia o ia i lona fa’alogoina o se pa’o.  Ma le liliu mai o le isumu, oka se pusi lapo’a lea o lo’o tilotilo atu ia te ia.

Ua oso le fefe a le isumu ma ia faapea mai i si ona leo tetetete, “Lelei pusi, o e fia ‘ai?”

Sa te’i le pusi i lona faalogo atu o talanoa mai le isumu ia te ia.  Ma o le tala moni lava, o la foi e fia ai ma le pusi.  “Ua lelei, o le a ta a’ai, ae pau o le mea, ia e folafola mai e te le toe gaoia mea’ai mai i le potu.”

Ua luelue le ulu o le isumu ma folafola atu i le pusi, o le a ia le toe gaoia mea’ai mai i le potu meaai a le aiga.  Ona a’ai loa lea o le to’alua lea ma fefa’asoaa’i e uiga i a la galuega e fai i aso uma.

O le mae’a o le taumafataga a le pusi ma le isumu, na o la fa’amavae ai loa ma sa amata mai lena aso, e le’i toe gaoia lava e le isumu ia mea’ai a le aiga ma e le’i iloa lava e le aiga po o ai sa gaoiga a latou mea’ai.

Ae na amata mai ai foi lena aso, le faigauo a Pusi ma Isumu.  Ma o so’o se taimi lava e fia ‘ai ai le Isumu, e sau lava asi mai lana uo o Pusi ma fai se la taumafataga i totonu o le potu mea’ai.

[IA MANUIA FUAFUAGA O LE FAAIUGA O LENEI VAIASO]