“O LE PATO ULIULI”

Ua le manofo lelei le Pato Tina, i luga o ana fuapato, i lona fiafia ona ua lata le taimi o le a ia vaai ai i nai ana tama’i pato.  Ae o le Pato Tama ua na o le savalivali solo ma oteote e pei o la e mimita solo i luma o isi pato ona o lea o le a maua le la toloai.

Ua o’o i le taeao fou, ae amata ona ta’ei fuapato, ua malagalaga mai i fafo ia tama’i pato.  1, 2, 3, 4, o le faitau leotele lea a le Pato Tina, 5, 6, 7, 8…oka ua leotele le tauvalaau a le Pato Tama.  Ua tau i le lagi le fiafia o Pato Tama ma Pato Tina.  E to’avalu le la toloa’i.  Ae toe tilotilo atu Pato Tina i totonu o lona faamoega, o lo o iai se fuapato e tasi e le’i matala lava.  Ua popole le loto o le Pato Tina, ma sake leotele.  E le i umi lava, ae tu mai i luga le ulu o le tama’i pato mulimuli.  

Na toeititi matapogia le Pato Tina ina ua vaai atu, oka, e fai o le uliuli o fulufulu o le pato mulimuli ae ese lava lona tino tele, mai ana tama’i pato lanu auro toe laiti lea na fanau muamua.  Ua liua le fiafia i le faanoanoa.  Ae o le taimi lea ia Pato Tama, ua ita tele i le vaai atu i lana ui’i ma le ese o ona foliga.  Ua uma le leotele i le fiafia, ae ua leotele i le ita ia Pato Tina, i lona fia malamalama i le uiga o lea mea ua tupu.

Ua tuputupu ifo tama’i pato e to’avalu ma si o latou uso ese lea e lanu uliuli ona fulu.  E pei o se mea talie a le latou nu’u, pe a sau le savaliga a le Pato Tina ma lana toloa’i e aga’i atu i le vai mo auauga i aso taitasi.   E aulelei ma lanu auro mai lava le laina pato, e amata mai le tina, se’ia o’o mai loa i le faasiusiuga o le laina, lea o lo o savali atu ai si pato lanu uliuli.  O le tele o taimi, e taumafai le Pato Tina e tuli ese si pato uliuli mai le latou laina ma si ana fanau.  A o’o foi ina momoe i le po, e tau faapupu’u atu foi si pato uliuli, ae tago le Pato Tama ua tuli e alu e moe i leisi tulimanu.

Na o’o lava i se tasi o aso, ua vaaia e tamai pato le ese o le faiga o si pato uliuli lenei, na i’u ai lava ina o latou faapena foi, le faaese o si pato uliuli.  Ua le toe faataga e sau i a latou taaloga, ua tuli e alu e ai toatasi na o ia, ma na i’u lava ina faasa ona toe alu atu i le latou laina pe a aga’i atu i le vai.

Ua tu si pato uliuli ma le maligi o ona loimata, a’o aga’i atu le laina a lona tina ma nai ona tei laiti i le vai.  Ma liliu ese atu loa, ma alu loa e saili se nofoaga e nofo ai na o ia.

Ua sau aso, alu aso, ua nofo toatasi si pato uliuli.  Ua le gata ina inosia o ia e lona aiga, ae ua faapea foi le tele o manu o latou nonofo faatasi.  E ala i le tagi, e moe i le tagi si nei manu.  Ua tuputupu a’e le manu ma o se tasi o aso, na fa’ate’ia o ia, ina ua ia vaaia, ua amata ona suia le lanu o lona tino.  Oka, oka, ua mafaufau ane si pato, na inosia o ia, e na o le tasi lona lanu, ae o lenei ua amata na pei e matafi ese atu le lanu uliuli, ae vaaia le lanu eseese mai o lona tino.  Oka, o le a atili inosia o ia.

Ua na o le lafi o si pato mai i manu o le latou pito nu’u.  Ae e le gata i le suiga i lona lanu, ae maitau foi e si pato uliuli, lona tupu tupu tino maualuga, aemaise o lona ua, e matua’i umi lava.  Ua matua’i le mautonu si pato pe aisea ua tupu ai lenei mea ia te ia.

Seia o’o lava i se tasi taeao, ina ua ala mai le pato uliuli ma ia vaai atu i ona fulu, oka, ua liu pa’epa’e uma.  Ua matafi ese atu le lanu uliuli ma isi mau lanu na iai, ae ua paepae sinasina ona fulufulu.  Ua galo i si pato ona lafi, ae ua tamo’e televave atu i le vai, se’i ona vaai i ona foliga ma le suiga matagofie ua tula’i mai i lona tino.  Ua vaai mai manu uma sa faifai ma tauemu mai ia te ia, ma ua o latou maofa i le suiga aulelei ua iai le pato uliuli.  Ua liua le inoino i le fia faauo mai i le aulelei ua iai si pato uliuli.  Na o’o lava i le Pato Tina ma le Pato Tama ma le la fanau lea sa tuli’esea si pato uliuli, ua lotoleaga mai i le maualuga ma le sinasina o fulufulu o si pato uliuli.

IA MANUIA FUAFUAGA O TOTOE O LENEI VAIASO!