O LE NUANUA A OLEVIA

I aso a la ua leva, sa iai se teineititi e igoa ia Olevia ma o se teineititi e lapopo’a ona mata lanu enaena ma e umi sasa’o lona lauulu. 

O le fiafia ia o Olevia i lona lauulu umi ma o aso uma e fiafia lava le teineititi, e nofonofo ma seluselu lona laulu, ona e faigofie lava ona noatia ona o le umi.

Ae o le tasi aso, atonu ona o le tulaga leaga o le tau, sa fai ai lava sina le fiafia o le tamaitai o Olevia.

“Ua ou fia alu lava i fafo ou te ta’alo ai, ae matua’i leaga tele foliga o le tau,” o le tala lea a Olevia a’o tilotilo i fafo o le faamalama i le fa’aauli mai o le lagi, e foliga mai o le a timu.

“E mafai faapefea ona ou tago e toe sui le tala o le tau, ina ia lagi mama ma susulu mai le la?” o manatunatuga ia a le teineititi o Olevia.

Ae o le taimi lea o lo’o saofa’i mai ai le tina matua a Olevia i seisi nofoa i totonu o le potu.

“Afai e mafai ona e iloa atu se nuanua, o lona uiga o le a toe lagilelei le aso,” o le valaau mai lea a le tina matua.

Ua fiu Olevia e saili se nuanua ae na te le iloa atu lava se foliga o se nuanua.

Ona o’o mai ai lea o se manatu ia Oleva ma tamo’e faatopetope loa i totonu o lona potu ma su’e mai se pepa, o ni vali ma se seleulu.

“O le a ou gaosia se nuanua ina ia mafai ona matafi ese ai la ao pogia i luga o le lagi,” o le tala lea a Olevia ma punou ifo loa ma galue malosi.

“Mama, o a lanu o le nuanua?” o le valaau atu lea a Olevia i lona tina matua.

“E lanu mumu, lanumoli, samasama, lanumeamata, lanumoana, ma le lanu viole,” o le tali mai lea a tina matua.

Na fai sina umi o se taimi, ua le toe pisa ia Olevia, ae ua pisi lava ona tamatama’ilima e tusi ma valivali lana nuanua.

Ina ua mae’a le tusiga o lana nuanua, ua fiafia iai, ona tamo’e atu loa lea o Olevia i le faamalama ma u’u i luga lana nuanua e faasaga agai i fafo i le lagi.

“Atonu e fesoasoani pe a pese,” o le tala ata mai lea a tina matua.

Ua ata tina matua ma faapea mai, “Timu, Timu, alu ese, toe sau i seisi aso.”

Ae ua faapea atu le teine o Olevia, “Ae a pe a sui le faaupuga mulimuli e faapea, - Timu Timu alu ese, ua fia ta’alo Olevia”.

Ua talie leotetele ia Olevia ma lona tina matua.

Ona toe tago loa lea o Olevia ma fa’au lana nuanua agai i le lagi ma pese leotele lana pese ma sa faapea ona pese atu ai foi ma tina matua.

E le’i leva lava ae va’ai atu Olevia ma tina matua, ua ata mai se nuanua tele lava i luga o le lagi.

Ma na atili ai ona talie Olevia ma tina matua, ma leotele ai le la pese.

[IA MANUIA SAVALIGA O LENEI VAIASO]