O LE LIONA MA LE ALOPE ATAMAI

Sa fa’alauiloa atu e le Liona i manu uma o le vao, lona gasegase tele ma ia talosagaina ia i latou uma, e o mai e asi mai lona gasegase, ae e le’i maliu o ia.

Ma sa faapea loa ona fai le tonu a manu o le vao, o le a tofu le aso ma le manu, e alu e asi le Liona i totonu o lana ana.

O le aso muamua, na alu ai le asiga a le ‘Oti ma na fiu manu o le vao e toe fa’atali, ua le toe sau i fafo ia le ‘oti mai totonu o le ana a le Liona.

O leisi aso, alu ia le mamoe ma sa faapena foi ona le toe fo’i mai fafo ma le ana.  Ona soso’o atu ai lea ma le povi ma na faapena foi ona le toe iloa atu lona tino.

Sa iai se alope atamai lava i le vaomatua.  Ina ua amata ona le toe fo’i mai ana uo, po o manu ia na o i totonu o le ana e asi le Liona, sa amata ona masalosalo ia le alii o ‘alope, i le ma’i a le Liona.

O se tasi asi, sa alu ai loa le ‘alope lenei i le ana a le Liona, ae e le’i alu  i totonu.

Ae o le taimi lena, o lo’o nofonofo ai le Liona i luma o le gutu o le ana.  Na iloa mai e le Liona ia le ‘alope, ua fai sina leva o nofonofo i fafo.

“O le a le mea ua e le sau ai e fa’ataunu’u lau asiasiga?” o le fesili atu lea o le Liona.

“Ou te fa’amalie atu,” o le tali mai lea a le ‘alope, “Ae ua ou va’ai atu, e leai ma se manu na alu atu e asi lou gasegase, ua toe fo’i mai fafo ma lau ana.”

“O lea ou te va’ai atu i fa’ailoga vae a manu na o i totonu, ae ou te le o va’ai atu o iai ni fa’ailoa, na toe fo’i mai i fafo,” o le tala lea a le ‘alope.  “Ma ua ou iloa, ua uma ona e ‘aia ia manu ia sa o mai e asi lou gasegase.  O lea la la’a ou alu e ta’u i manu uma o le vao, ia le mea lea ua tupu.”

Sa faapena loa ona alu le ‘alope ma fai atu i manu uma o le vao, “Afai e tou te le toe fia feola, ona fa’aauau pea lea ona outou asiasi i le Liona.”

O iina, na le toe iai lava se manu ua toe alu i le ana a le Liona.  Ae ua avea lea ma tulaga, ua le toe iai se meaai a le Liona ma i’u ai lava ina mate i le fia ‘ai.

[IA MANUIA FUAFUAGA O LE FAAIUGA O LENEI VAIASO]