O PATI MA ONA USO

I aso ua leva na iai se faifa’ato’aga mativa lava ma ni ona atalii e to’atolu, e igoa ia Peteru, Paulo ma Pati.  O se tasi aso, sa faapea atu ai le faifa’atoaga i ona ataii e to’atolu, “O mai si a’u fanau, o mai i na o, ona ua leai se manuia o toe maua i le tatou aiga.  Ae o mai e o e saili so tou manuia i le lalolagi.”

O le atunu’u lenei e nonofo ai le faifa’atoaga ma ona atalii, e pulea e se tupe, e tu lona maota i luga o se mauga maualuga.  Ma sa fiafia lava le tupu ona o lona maota, e sulugia i ‘ave o le la i aso uma.

Ae peitai, sa iai se la’au tele, ua tupu i tafatafa o le maota o le tupu, ma i’u ina punitia ai fa’amalama ole maota o le tupu ma le toe ati mai ai le susulu o le la.  Ma ua pogia uma totonu o le maota o le tupu.

Ma ua salalau le malelega a le tupu, i se taui tele mo se tagata e mafai ona ia tatu’uina lenei la’au tele, ua punitia ai le la mai le toe susulu atu i totonu o lona maota.

Atonu sa fa’afaigofie i le toatele o tagata le fanoga a le tupu, ae peitai, o se tulaga sa o latou le malamalama ai, e fa’afaigata le manaoga a le tupu.  Ona o taimi uma lava e ta ese ai se lala o le la’au, e toe ola mai ai ni lala se lua. 

 E le gata i lea, o le mauga lea o lo’o tu ai le maota o le tupu, o lo’o tanumia ai ni papa tetele ma ua le mafai ona toe sao atu ai se vai mo le fofoga taumafa a le tupu.  

Ma o lea na finagalo ai le tupu, e le gata o le ta ese o le la’au tele ae ia eli se vai ‘eli e mafai ona ia maua ai se vaitaumafa. 

Ma ua ia malie e tu’uina atu le afa o lona malo mo so’o se tasi e mafai ona faia ia galuega e lua.

Ae o le taimi lea, ua tu’ua ai e le alii o Pati ma ona uso o Peteru ma Paulo ia lo latou aiga mo le sailiga o se manuia.

E le’i umi ona savavali le auuso ae fa’alogoina e Pati se pa’o, e foliga mai o lo’o tatu’u e seisi ni la’au.  Ua faapea mai Pati i ona uso, “O le a le la pa’o?”  Ae fai atu ona uso, “E se soia e te faitatala.  Sau tatou o e su’e se tatou meaai.”

Ae peitai, ua savali le alii o Pati agai i le mea o lo’o ia lagona atu ai le pa’o.  Ma na fa’ate’ia o ia ina ua tau atu i se to’i, o lo’o sasa mai ni la’au, ae ua fiu Pati e tau autilo po o ai o lo’o fa’aaogaina le to’i, ae e leai seisi na ia iloa atu.

Ua fesili atu nei Pati i le to’I, “Ae o fea lou matai?” Ua tali mai le to’i, “E leai so’u matai, o lea sa ou faatalitali atu mo oe.”

Ua tago loa Pati ma se’i mai le to’i mai i le la’au ma tu’u i totonu o lana ato fa’afafa.

Ua toe fa’aauau le savaliga a Pati ma ona uso, ae le’i umi foi ae toe fa’alogoina e Pati ia seisi pa’o.  Ua tu ma ia fesili i ona uso, “O lua lagona atu le pa’o le la?”

Na liliu mai Peteru ma po le ulu o Pati ma faapea mai, “Soia ia, matua’i e faitatala tele lava.  Faatopetope mai tatou o i po le mea.”

Ae peitai, ua liliu Pati agai i le mea o ia lagona atu ai le pa’o ma sa toe fa’ate’ia o ia, ina ua o’o atu iai, ma ia va’aia se su o, o lo’o eli ma’a ae leai foi se tagata o ia.

“Oi, ua e sau?” o le fesili mai lea a le su o ia Pati, e foliga mai sa faatalitali ia Pati.

[IA MANUIA FUAFUAGA O LENEI VAIASO]