O TAUVAGA A FA’ATAULAITU

I tausaga ua leva i le malo o tagata fa’ataulaitu, na faia ai se palota tele lava, e saili ai se tasi e avea ma Ulu o fa’ataulaitu.  I le fa’ai’uga o le iloiloga a fa’ataulaitu, na pa’u mai ai le fa’ai’uga i le va o ni fa’ataulaitu se to’alua.

Sa tutusa lelei le agava’a o nei fa’ataulaitu e to’alua ma sa fa’afaigata i fa’ataulaitu uma o le malo, ona filifili se to’atasi e pulea le latou malo.

O le tasi o fa’ataulaitu, o le fa’ataulaitu e igoa ia Fuarosa ae o leisi e igoa ia Aveolela.

O le vaega mulimuli o lenei tauvaga, o le a tu’u atu ai ia Fuarosa ma Aveolela, e la te faia se vavega uiga ese, o se vavega e le i faia lava e se faataulaitu.

O le vavega a Fuarosa, o lona faia lea o se Perenise e na te fa’ase’e ni tamaitai se to’atele, ae e le alu lona agaga i se tamaitai.  Ae o Aveolela, ua ia fausia se purinisese sili ona aulelei ma amio tausa’afia, e leai se tamaloa e le gagau atu lona loto i le purinisese, i le taimi e la te feiloai ai.

Ae o le tauvaga la e faapea, afai e mafai e le perenise a Fuarosa ona tete’e atu i le Purinisese a Aveola, ona manumalo lea o Fuarosa.  Ae a mafai e le Purinisese a Aveolela ona gagau le loto a le Perenise a Fuarosa, ona manumalo lea o Aveolela ma avea o ia ma Ulu o le malo o Faataulaitu.

O le tuaoi o le malo a fa’ataulaitu, sa iai se malo tele a se tupu ma lana masiofo ma se la pepe fou, o se Purinisese aulelei lava.  Ae peitai, i se tasi po na te’i valevale mai ai le masiofo mai i lana malologa, ona o sana miti e fa’atatau i le purinisese, e faapea, ua gaoia.

Sa faatopetope atu le masiofo ma ana galuteine i le potu a le Purinisese, ae paga lea, ua leai se purinisese.

Ma mai i lena taimi, sa ufitia le malo i le ao pogisa ma sa leai se mea na mafai ona toe fa’afiafia ai le loto o le masiofo.

Ae o se tasi aso, a’o nofonofo le masiofo i lalo o se la’au, na ia va’aia ni tamaitai se to’a 12, o agai atu ma ni ato ma sa o latou fa’asasa’o atu lava i le la’au o lo’o nofo mai ai le masiofo, ma o latou tu’uina nei ato i luma o le masiofo.

Sa faapea mai se tasi o tamaitai, “Lau afioga i le masiofo, matou te faamoemoe o le a avea nei meaalofa ma se faamafanafanaga i lau afioga.”

Ma le tago atu o le masiofo e tatala ia ato na o atu ma nei tamaitai, e tofu lava le ato ma se pepe tamaitai e tupulaga lelei lava ma purinisese lea ua gaoia.

Sa faapea ona ave e le masiofo ia nei pepe uma e to’a 12 ma tausi fa’amaoni ia i latou ma na tuputupu a’e nei tamaitai, ua ta’u lava i llatou o Purinisese e to’a 12.

[IA MANUIA FUAFUAGA O LENEI VAIASO]