O LE FAIFA’ATO’AGA MA ONA ATALII E TO’AFA

Na iai se faifa’atoaga, sa iai sana fanau tama e to’afa.  Ae o nei alii, o le fe’aina’i ia.  E fiu si faifa’atoaga e fa’afealofani ona atalii, ae pei e atili ai ona fe’aina’i, ua pei ni ta’ifau.  Na fiu le faifa’ato’aga e faufautua i lana fanau, ina ia nonofo fealofani ma ia alofa le tasi i leisi, ae peitai, na matua’i tutuli lava taliga a nei alii i fautuaga a le latou tama.

Sa avea lenei tulaga ma mafua’aga ua atugalu ai le mafaufau o le faifa’ato’aga.

O se tasi aso, ua le lelei le fa’alogo a le faifa’ato’aga.  Ma ua iai sona manatu, atonu o le a mafai ona nonofo fealofani ai ona atalii.  Ma o lea na ia valaau atu ai i ona atalii e o mai, ma aumai ni fasi la’au.

Sa faapea ona faia e nei alii e to’afa.

Ina ua saofafa’i ifo atalii o le faifa’ato’aga i autafa o lona moega, ma tu’uina atu i le latou tama ia a latou fasi la’au, sa faapea ona tago le faifa’ato’aga ua saisai fa’atasi ia fasi la’au a lana fanau.

Ona ia tago lea ua tuu atu ia i latou ma faapea atu iai, ia outou taitasi ma taumafai e gagau ia le fusi la’au lea.

Na auaua’i ia lana fanau e taumafai e gagau ia le fusi la’au lea, ae na uma o latou malosi, e le taitai ona gaui la’au ia na saisai faatasi e le toeaina.

Ona toe ‘a’apa mai lea o le faifa’atoaga ma toe avatu le fusi la’au, ona ia toe tatalaina lea ma toe tufatufa ta’itasi ia fasi la’au i ona atalii, ma ina ua tofu i latou ma fasi la’au e ta’itasi, sa fa’atonuina loa i latou e le faifa’atoaga, e fetagofi e gagau.

Ma e le’i tele se malosi a nei alii na alu i le gagauina o fasi la’au a le tagata.

Ona faapea atu lea o le faifa’ato’aga, “Sa ou mana’o e fa’aali atu ia te outou, le mea e tupu pe a tasi outou.  A tu’u fa’atasi o outou loto ma le malosi, e leai se tasi e na te mafaia ona fa’ato’ilaloina outou.  Ae afai e fa’aauau ai pea lo outou fe’aina’i ma taua’imisa, o le a fa’afaigofie lava ona fa’ato’ilaloina outou e tagata.

Ma na amata mai i lena aso, e le’i toe fa’alogo ia le faifa’ato’aga o toe misa lana fanau.

[IA MANUIA TOE FUAFUAGA I LE FAAIUGA O LENEI VAIASO]