“UA GALO PO O FEA E TU AI LO’U FALE”

Sa ou alu e fai sau mea’ai o le aoauli i le paka ananafi, ma ou va’aia ai se tama matua o nofo mai i se tasi o nofoa o le paka.  Ina ua ou saofa’i atu i tafatafa o lea tama matua, e ‘ai la’u meaai, ae o’u fa’alogo atu, o lo’o tagi masusu si toeaina.

Ua tu’u ‘ese la’u mea’ai ae ou fa’asaga atu loa i le tau fa’amafanafana i si toeaina ma sailiili le mafua’aga o lona fa’anoanoaga.

Ina ua ou fesili atu iai pe iai se mea ua tupu, sa faapea mai o ia ma le maligi o ona loimata, o lo’o iai sona to’alua e 22 tausaga le matua, o lo’o i le fale.  Ma o lana masani i taeao uma, o le lomi o le tua a le toeaina, ona alu lea e sauni lana ti o le taeao.

Ua tau toe alu a’e i luga le tagi a le toeaina i le fa’amalau o taumafa o lana ti o le taeao,  O panikeke, sosisi, o se esi po o se mago ia ma lana ipu kofe,

“O le a la mea ua e tutulu ai?” O la’u fesili atu lea i le toeaina.

Ae toe alu a’e i luga lana tagi ma fa’aauau lana faamatalaga. “Mo la’u mea’ai o le aoauli, e masani ona kuka e lo’u to’alua ia se supo, o masi keke ou te fiafia ai lava.  Ona ia alu lea e fa’amama le fale ae matamata a’u ta’aloga i luga o le TV.  A mae’a ana galuega, ona sau lea ma matamata TV fa’atasi.”

Ua ou toe fesili atu i le toeaina, “Ae aisea le mea ua e tagi ai?”

Ae ua toe soso’o mai le fa’amatalaga a le toeaina, e aunoa ma le tali ina o la’u fesili.

“A o’o i le afiafi, ona kuka lea e si o’u to’alua ia se mea’ai e pei o se mea’ai mai i se fale’aiga taugata lava, faatasi ai ma sa’u ipu uaina ia ma sina aisikulimi po o se keke e salani ai le ma taumafataga o le afiafi.

A mae’a lea ona ma opoopo lea se’ia o’o i le taeao e soso’o ai.”

Na fai sina umi o o’u fa’ataupupula atu i le toeaina pe toe fai seisi ana tala.  Ae ina ua ou iloa ua uma lelei lava lana faamatalaga, ae ua na’o le tagi masusu.

Sa ou toe fesili faatolu atu lea iai, “Ae aisea le mea ua e nofonofo ai i’i ma e tagi?”

Ae pupula mai si toeaina ma tau solo ona loimata ma faapea mai, “Ua galo po o fea e tu ai lo’u fale.”

[IA MANUIA FUAFUAGA UMA O LENEI VAIASO FOU]