O LE TOA NA FEFE I LE USU MAI O LE LA

I luga o se mauga, i se nu’u e tu lata i le nofoaga e masani ona alu ifo ai i luga le la, sa iai se toa e igoa ia Tolo.  O lenei toa, o se manu e sili ona matagofie i le va’ai.  Ona o le tele toe maualuga o lona faitino.  O ona fulumoa, e sesega mumu pei se afi, ma lona leo malosi e mafai ona fafagu ai i luga se vaitafe lafu lemu.

Ae o le fa’alavelave ia Tolo, e musu e vivini.  E leai ma seisi i totonu o le nuu, ua fa’alogo o vivini ia Tolo i se taeao, i le alu a’e i uga o le la.

Na o le pau le mea e fai e le toa lenei, alu a’e loa i luga le la ma tatafa mai le malamalama o le taeao, ona fa’apuna lea o le toa ma le gatete o lona tino.

“Sole, o oe o le toa.  A e le vivini, o ai o le a fa’ailoa mai ia matou le taunu’u o le taeao fou,” o le vala’au atu lea a ‘oti.

“O oe sa fanau mai, e fafagu le lalolagi,” o le sa ke atu lea a Matuamoa.

Ae leai se ma se tala a le toa.

Ua mafua faapea le toa lenei o Tolo, ona o aso la ua leva, ina o avea o ia ma tama’i to’a, ma o lo’o tau a’oa’o lana vivini.  O le ulua’i taimi lava na vivini ai Tolo, ae taia ai loa le fale o lo’o nonofo uma ai manu, i le ‘emo o se uila mai i le lagi.

Ma na avea lea ma tulaga ua faapea mai ai manu matutua, ua mafua lea faalavelave.  O iina, na le toe fia vivini ai lava lenei toa.  Ma e o’o mai lava i le aso, ua masani lava le nu’u i le feala lava latou ia, e aunoa ma se vivini o se toa.

Ae o se tasi la aso, sa fiu le nu’u e toe fa’atali le usu mai o le la i le taeao, ae ua na’o ao pogisa ua ufitia ai le nu’u, i taeao ma afiafi.  Ma ua avea lea ma tulaga, ua le toe iloa ai e tagata o le nu’u, le taimi sa’o e nonofo ai i luga, e fai a latou galuega masani.

Ua amata ona fa’aletonu ia fa’atoaga.  Ua o’o lava foi i tagata faifaiva, ua le iloa tau le taimi e pe ai le tai ma sua mai, aua a latou faigafaiva.

Ma ua le mautonu le nu’u.  Ae sa fa’ailoa mai e le lulu mata ‘ivi ma le atamai, a le toe fa’afo’I mai le taeao, o le a le toe fo’i le nu’u i se lelei.

O lea po, na faapea ona tolotolo atu ai le laumei toeaina, i le la’au o lo’o moe mai ai le toa o Tolo.

“E te silafia le mea e tupu pe a le toe peseina se pese?” o le fesili atu lea a le laumei toeaina ia Tolo.

“E mou malie atu?” o le tali mai lea a Tolo.

“Leai, e pese leotele i totonu o oe, se’ia o’o ina e mu ai,” o le tali lea a le laumei toeaina.

Ua puni mata o Tolo ma sa ia lagonaina, le alua’e o se pese i totonu o lona fatafata, e pei o se afi.  “Ia fa’amasino a’u e le lagi,” o le tala lea a Tolo.

Ma o le vaveao na soso’o ai, ina ua amata ona tatafa mai ata o le la, sa faapea ona pe’a le toa o Tolo i le fale pito sili ona maualuga, a le nu’u ma tu ai.  Ua ia tilotilo a’e i luga o le lagi.  O lo’o va’aia pea fetu o le po.  

Ona mimiti lea e Tolo, i totonu o lana manava, ma vivini leotele mai.  Ae ai ona o le leva e le toe vivini Tolo, sa fai sina pa’ulua o lana vivini.  Ua ia toe mimiti leisi manava, ma toe feula mai i fafo, i seisi vivini, sili atu ona malosi ma leotele.

Sa va’aia le matafi filemu ese atu o ao pogisa ma va’aia le alu a’e lemu ifo i luga o le la.

Ma ua lagona i totonu o fale ta’itasi, le malagalaga ifo i luga o tagata o le nu’u.  Ua lagona pesega a fanau iti.  Ua toe lagonaina le ta o pa te o le taeao ma le toe tafe o vaitafe.

Ae o le taimi lea i le Toa o Tolo, ua maligi ona loimata.  Ona o le matagofie o lana va’ai ma lana fa’alogo i lea taeao segisegi.

Ma na amata mai i lea taeao, e le’i toe misi lava on ausu Tolo e vivini, ina ia fafagu ma fa’afeiloa’i le lalolagi.

[IA MANUIA FUAFUAGA O TOTOE O LENEI VAIASO]