Vaega 131

Na ona uma atu lava o le fa’amatalaga a le tamaloa o Pulusi, tu loa i luga ma le Tamaloa o Meki ua savali aga’i i le isi itu o le fale o loo latou talanoa ai, ona ia valaau mai lea i le isi ana tama fa’amoemoeina e alu atu. “O le a sau fa’alogo i le fa’amatalaga a le tamaloa o Pulusi lea ua tuuina mai, e fa’amaoni lana molimau pe leai.” O le fesili fia malamalama lea a Meki sa tuuina atu i se tasi o lana vaega. E lei tali lea ali’i, se’i vagana ai le luelue o lona ulu e fa’amaonia mai ai, na te lagolagoina le molimau a Pulusi. Na ona mae’a lava o le tama’i talanoaga lea a Meki ma se tasi o lana vaega, ona toe savali atu loa lea o le Tamaloa ma nofo i lona nofoa, fa’afesaga’i lelei lava ma le nofoa o Pulusi i luga o le laulau. “O le aso lea sa faamoemoe e faaoo ai le oti ia te oe, talu ai le tele o mealeaga ua faia e lou to’alua i totonu o le malo. Ua oo lava fo’i i la’u fanau o loo fa’aauau pea ona taumafai lou to’alua e fa’aleaga ma fa’aumatia. Ae talu ai ua ou maua le loto fa’amagalo, o le a le oo le oti ia te oe, ae o le a fa’asa’olotoina oe.” Na ona mae’a lava o le fa’amatalaga lea a Meki, tula’i loa i luga ma savali aga’i i lana ta’avale, ae ua toe ta’ita’i ese atu e lana vaega le tamaloa o Pulusi aga’i i totonu o le potu o loo taofia ai o ia. “Fa’asa’oloto o ia, ave i ai se mea’ai ma fa’asauni lelei, ona toe momoli lea i luma o le pa e ulufale ai i lona fale.” O le fa’atonuga mulimuli lea a Meki, ao lei oso i totonu o lana ta’avale ma aga’i ese atu loa mai le nofoaga lea. E fetaui lava le aga’i ese atu o le ta’avale a Meki ae tatagi loa ma lana telefoni, e vaai atu, o lana tama lea e lafi i totonu o le fanua o le fafine o Mekala. “Boss, o lea fa’atoa uma nei lava ona faia le fono a Mekala ma isi sui o lana vaega faatupu fa’alavelave, ma ua i’u le fa’aiuga, latou te le faia lava se isi gaioiga e toe fa’alavelave ai i fuafuaga a Leoleonana ma Leoleo Faapitoa o le malo, ae o le a tuu atu lava i le latou faitalia, poo afea ua latou manatu e toe fa’asa’oloto mai ai si ona to’alua.”

E le i toe i ai lava se isi mea na fa’alavelave i le mafaufau o Meki, a o lea ua fa’asasa’o loa i le fale e fia feiloa’i i si ona afafine o Ianeta ma lona to’alua, lea fa’atoa maua mai talu le 2 vaiaso na aveese faamalosi atu ai e le vaega a le fafine saua o Mekala. Na ese lagona o Meki i lea afiafi ina ua taunu’u atu i le fale, ma tau atu lana vaai i le nonofo to’atolu mai o lona to’alua, o Ianeta ma Laneselota i luga o le laulau ma loimata, a o fa’amatala e le tama’ita’i ma lona to’alua i le fafine o Lucy sau’aga ma faiga fa’apologa sa faia ia tei laua e le vaega fa’atupu fa’alavelave. “Talofa Dad”. Pau ia o upu na mafai ona lafo mai e le tama’ita’i o Ianeta ina ua ia vaaia lona Tama ua ulufale atu i totonu o le fale. Na galo uma tiga ma le mafatia o le mafaufau sa i ai, ina ua maua le avanoa o Meki e toe mafuta ai ma si ana fanau. Na amata atu lava i le afiafi le talanoaga seia aulia le leva o le po, ona momoe lea ma malolo le aiga, ma toe fa’aauau ai i le isi aso na sosoo ai. O le itu o loo naunau Meki e fia iloa, o le a se auala e mafai ai ona taofia faiga saua ma le solitulafono o loo faia e Mekala ma lana vaega. Ua fa’atino galuega masani o le olaga, o le ala usu lea o Meki i lana galuega, ae fa’amuli atu Lucy, o Ianeta ma Laneselota i le fale, aua o lea fo’i ua oo i le vaitau e tuua ai aoga i totonu o le atunu’u.

I se tasi taeao ao pisi Ianeta ma Laneselota e tapena le ipu ti o le taeao, ae fa’afuase’i loa ona tatagi le telefoni. O le Tina o Laneselota lea ua toe vili mai e asi si ana tama ma si ona to’alua. Ua alu ai lava le talanoaga ma ua molimauina fo’i le leo o le fiafia. I le faaiuga o le talanoaga pe lata i le 30 minute le umi, na fa’alogoina ai loa e Ianeta ma lona Tina o Lucy le suia fa’afuase’i o le talanoa a le ali’i o Laneselota, e foliga mai ua melotagi o ia. Ua na o le tutu o Lucy ma Ianeta ma tilotilo ia Laneselota, a’o talanoa pea le ali’i i luga o le telefoni i lona Tina, ma faapea atu ana toe upu, “Tina, fa’amolemole, fa’atali mai mo a’u.”