Ads by Google Ads by Google

E LE O OE O SE SULI MONI

Vaega 130

 

Na motu fa’afuase’i le talanoaga a Meki ma lona to’alua ina ua vaai atu le ali’i ua emo emo mai le moli o lana telefoni, e fa’ailoa mai ai, o loo i ai le isi tagata o loo valaau atu i lana laina. “Honey, fa’atali mai i luga o le laina, se’i tali atu le isi laina ona ou te talanoa atu ai lea.” O le tala lea a Meki ia Lucy, ona ia poloka lea o le laina sa talanoa ai ma lona to’alua, ae tali le laina lea o loo emoemo atu. E fa’alogo atu Meki, o le isi o ana tama fa’amoemoeina lea o loo valaau atu. “Boss, o lea fa’atoa uma lava ona talanoa mai le Tamaloa o Pulusi ia te a’u, e fa’ailoa atu ia te oe, o loo i ai ni fa’amatalaga lililo o loo mana’o e fa’ailoa mai, pe afai e maua se avanoa e toe fa’asa’oloto ai o ia.” Na nofo Meki mo ni nai sekone e le gagana, ona ia faapea atu lea i lana tama fa’amoemoeina lea. “Vaai oe, tapena ane le tamaloa ma avane i luma o le nofoaga e masani ona faia ai fonotaga ma tagata e taofia, se’i mae’a le ma talanoaga ma si o’u to’alua, ona ou aga’i sa’o atu loa lea iina.”

 

Na ona mae’a lava o le talanoaga a Meki ma lona to’alua, ma fa’ailoa uma i ai gaioiga e faia pe a taunu’u atu Ianeta ma Laneselota i le fale, liliu loa ma le ta’avale a le Ta’ita’i ae aga’i sa’o atu loa i le nofoaga lea o loo taofia ai le tamaloa o Pulusi. E a’e atu loa le ta’avale a  Meki i le isi pioga e sosoo ma le pito mauga lea e afe ai i tua i le nofoaga o loo taofia ai Pulusi, ae toe tatagi lana telefoni, ma le vaai atu o le tamaloa o Meki, o lana tama lea e lafi i le nofoaga o loo i ai le fale o le fafine saua o Mekala. “Sole, o a mai lena itu.” O le fesili lea a Meki, ae tali ane lana tama fa’amoemoeina lea, “Boss, o lea ua maua atu i le uaealesi, ua valaau le fafine o Mekala i lana vaega faatupu fa’alavelave ina ia fai se auala e mafai ai ona toe fa’asao mai le ola o lona to’alua o Pulusi, pe afai e mae’a le aso lenei e leai lava se fa’ailoga e atagia mai ai le toe fa’asa’olotoina atu o ia.” Na ataata Meki ma faapea atu i lana tama Leoleonana lea, “Son, o lea ua ou aga’i atu i le nofoaga o loo taofia ai Pulusi, ma ua ou manatu fo’i e toe fa’asaoloto le tamaloa, ona o lea ua toe fa’asaoina mai le ola o si a’u fanau.”

 

E taunu’u Meki i le nofoaga ua leva ona sauni mai ana Leoleonana atoa ai ma le tamaloa o Pulusi, lea o loo saofa’i mai i luga o le nofoa ma le ipu meaai i ona luma. Na savali atu Meki ma faatalofa i le lima o Pulusi ma faapea atu i ai, “O a’u o Meki, o le ta’ita’i o le Vaega o Leoleonana a le malo.” E lei tali Pulusi i se upu, se’i vagana ai le maligi o ona loimata. Sa toe faapea atu Meki, “E i ai se mea e te fia talanoa mai ai ia te a’u, ae aisea fo’i ua e mafatia ai.” Na ea i luga le tamaloa ma vaaia ai e Meki foliga fefe o Pulusi. “Ua ou iloa ua uma ona toe fa’asa’oloto atu lau fanau i ou lima, o le mafua’aga fo’i lena o la’u talosaga, mo se avanoa e mafai ai ona toe fa’asa’oloto a’u, ao lea ua ou sauni e fa’ailoa atu fa’amatalaga uma e fa’atatau i ni isi o fa’alavelave lililo e oo mai lava i le taimi nei e le o mafai e Leoleo Faapitoa a le malo ona latou suesueina.” E lei uma lelei mai le tala a Pulusi ae oso atu le fesili a Meki, “O  ai na fasiotia le Tamaloa Meauli o loo tanu i tua o le pa o le lua fanua.” E lei uma lelei atu le fesili ae oso mai le tali a Pulusi, “O sui o le vaega faatupu fa’alavelave.” Na pupula to’a Meki i mata o le tamaloa o Pulusi, ona ia toe fesili lea i ai, “O ai e ta’ita’ia le vaega faatupu faalavelave na fasiotia le Tamaloa Meauli.” Ae na tali le tamaloa o Pulusi, “O Mekala.”