Pago Pago - AMERIKA SAMOA

Na teena e sui o le Task Force ia Sandra King Young ma Motusa Tuileana Nua ripoti e faatatau i le moomia lea o soo se tagata Manu’a e lesitala miuamua i le TalofaPass faatoa mafai ai ona malaga i Manu’a.

Na taua e King Young i luma o le Komiti o le Soifua Maloloina a le Maota o Sui i le vaiaso na te’a nei, e leai se faaiuga a le Task Force faapea ua i ai, e le iloa fo’i poo fea e aumai ai nei mau faamatalaga le sa’o.

Pau le itu na talanoaina e le Task Force, o se auala e puipuia ai Manu’a pe afai ae sao i ai le siama o le faama’i o le KOVITI, atoa ai ma le auala e mataitu ai e le Task Force i latou e aafia i le faama’i i Manu’a, ona agava’a ai loa lea o le fuafuaga e pei ona talanoaina, o le lesitala lea o soo se tagata Manu’a i le Talofa Pass ao lei malaga atu i Manu’a, ina ia mafai ai ona maua e le Task Force faamaumauga atoa ai a nofoaga e maua ai i latou ua aafia i le fa’amali.

Na faatulaga le iloiloga a Faipule ma le Task Force, ina ia maua ai le avanoa e faamanino ai le mataupu lea ua to’atele tagata o le itumalo o le Manu’atele ua faasea ai, i le muamua lea lesitala o latou suafa i le Talofa Pass ona faatoa mafai lea ona maua le avanoa e malaga ai i le va’alele mo Manu’a.

Saunoa le Sui Fofoga Fetalai, afioga Fetu Fetui Jr e faapea, ua toatele tagata o lona itumalo ua faasea ma tu’u fesili i le mafua’aga ua ala ai ona lesitala fua tagata Manu’a i le Talofa Pass ona faatoa mafai lea ona malaga i Manu’a.

Na faaigoa e Fetu lea faaiuga o se faaiuga ua matua mata’utia toe faavalevalea. Sa ia fia iloa poo ai o le Task Force na faia lea faaiuga ina ia lesitala muamua tagata Manu’a i le Talofa Pass ona faatoa mafai lea ona malaga i Manu’a.

Fai mai Fetu, afai ua lesitala tagata Manu’a i le Talofa Pass, ina ia mafai ai ona iloa poo aafia i latou i le faama’i o le KOVITI, e tatau fo’i la ona lesitala ma tagata o lo o galulue i le kamupani i’a ae o mai i tulimanu eseese o Tutuila.

Mo se faataitaiga e pei ona saunoa Fetu, afai ua mafua ona a’e se manatu e lesitala tagata Manu’a i le Talofa Pass ina ia mafai ai ona manino i faamaumauga poo maua i latou i le faama’i, e tatau fo’i ona faapena tagata faigaluega a le kamupani mai nu’u i tua e pei o Fagalii ma Amanave, e tatau fo’i ona lesitala i latou i le Talofa Pass ona faatoa mafai ai lea ona oso i le pasi ma aga’i atu i le kamupani e faigaluega ai, ina ia mautinoa e le o maua se isi i le fa’ama’i.

Na siisii le si’ufofoga o Fetu ao saunoa e faaleo lona le fiafia i le fai fua o lenei faaiuga e lesitala ai tagata o lona itumalo i le Talofa Pass. Sa ia taua le to’atele o tagata o lona itumalo sa fuafua e malaga i Manu’a i le 2 vaiaso talu ai, ae na toe faafo’i uma i le fale ina ua alu atu le faatonuga mai le Task Force, e leai se va’alele e alu i Manu’a, sei vagana ua lesitala tagata Manu’a i le Talofa Pass ona faatoa mafai ai loa lea ona alu le va’alele.

“O ai o le Task Force na faia le faaiuga lea ina ia lesitala tagata o lo’u itumalo i le Talofa Pass,” o le fesili fia iloa lea a le afioga i le Sui Fofoga Fetalai.

Na faamanino e King Young e faapea, o taeao uma lava ao lei faatinoina tiute o aso taitasi, e feiloa’i ai sui o le Task Force mo le auiliiliina o le ripoti mai le aofa’i o tagata ua aafia i le faamai mai le aso ua tuana’i.

O le tele o taeao, e maitauina ai e le Task Force le aga’i pea i luga o le aofa’i o tagata ua aafia i le faama’i. Ae o le agaga atoa o le Task Force ma le Taitaifono, le afioga i le Lutena Kovana ia Talauega Eleasalo Ale, ia malu puipuia pea Manu’a, e aua nei sao i ai le faama’i.

I se tasi o taeao e pei ona saunoa King Young, na fesili atu ai Talauega ia te ia, poo le a sona finagalo ae lesitala atu ai ma tagata e fia malaga i Manu’a i le Talofa Pass, ina ia mautinoa e mafai ona tuli mata’i i latou e aafia i le faama’i, pe afai ae sao le faama’i i Manu’a. Na taua e King Young lona faapea atu i le Lutena Kovana, e sili pe a taoto atu i le Soifua Maloloina le mataupu lea, o i latou e tatau ona auala mai ai se fautuaga.

“O le agaga maualuga o le Lutena Kovana, ia malu puipuia pea Manu’a e aua ne’i sao atu i ai le faama’i, peita’i, afai ae sao le faama’i i Manu’a, o le a la se gaioiga a le Task Force fai ina ia puipuia ai ma faaitiitia le pipisi o le faama’i,”o le saunoaga lea a King Young.

E leai se faaiuga maumaututu na faia e le Task Force e faatonuina ai tagata Manu’a e lesitala loa i le Talofa Pass e pei ona salalau ai faamatalaga ma tu’uaia ai le Talofa Pass i lea tulaga. 

Saunoa King Young, ua na o se manatu lava na faatula’i e le Lutena Kovana, o ia fo’i lea o le Taitaifono o le Task Force, ina ia mautinoa ua i ai se ta’iala a le Soifua Maloloina ma le Task Force e faataoto e tua i ai pe afai ae tula’i mai se faama’i i Manu’a.

Na taua e King Young le maofa o le loto ina ua salalau i tua lenei tala le sa’o, ae o lo o nonofo sui o le Task Force o i latou e faia le faaiuga. 

E le i malie le finagalo o Fetu i le faapupulaga a King Young. Sa saunoa Fetu e faapea, o lo o molimau le tamaitai faigaluega a le kamupani va’alele a le Samoa Airways i le Malaevaalele i Tafuna, o ia lea na faamaonia atu ia te ia, o le faatonuga mai le sui o le Task Force lea na mafua ai ona le oo le malaga a le vaalele mo Manu’a i le aso Gafua ma le aso Faraile o le vaiaso na te’a nei.

Na taua e Fetu le faamomoi loto o le vaai atu i tagata o le itumalo o fetagisi i le Malaevaalele ina ua le taunu’u ona malaga le va’a.

“Ou te faapea atu, ua matua tiga lava lo’u loto i le fai faapea o tagata o lo’u itumalo. Ua soona fai faapea tagata o lo’u itumalo.”

Na mae’a le saunoaga le fiafia a Fetu aga’i ia King Young, ona faatutu lea o lona le fiafia i le susuga a Motusa. 

Saunoa Fetu e faapea, ua fai ma masani a le afioga i le Faatonu le fiu e vili atu lana telefoni ona o le fia maua o se fesoasoani mo tagata o le itumalo, ae le taitai talia lana telefoni. E i ai fo’i taimi e tali mai ai e Motusa lana telefoni, ona ia faalogologo lea ae fai talanoaga a Motusa ma isi tagata.

Na faaigoa e Fetu lea ituaiga amioga o ni tu ma amioaga le mafaufau.

“O le mea tonu lava lena e ta’u o le le mafaufau i lo tatou va nonofo, ae mafua ona ou telefoni atu o le fia maua lea o se fesoasoani mai lau afioga e tusa ai o manaoga o le itumalo,” o le saunoaga lea a Fetu.

Na faamalulu Motusa ma King Young i le Sui Fofoga Fetalai pe afai ua le tusa le tautua ma le tulaga o loo i ai manaoga o le itumalo.

Saunoa Motusa e faapea, o lona loto atoa fo’i o le puipuia lea o le itumalo e pele i lona loto ina ne’i aafia i le faama’i.