Vaega e 40

Taeao Manuia.  Taeao Totoa, i le mamalu o le tatou aufaitau nusipepa, i lenei taeao fou.  Tatou te tau fai si’i le Viiga ma le Faamanu, i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafa’i i luma o nu’u, ae le o tua o nu’u, i lenei taeao fou.

E faafeiloa’i atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le soso’oga o le tatou Fagogo, “E SOLA LE AMIOLEAGA AE TULILOAINA”, i lona vaega e 40.

****************************************

“Soso atu i tua!” o le faapea atu lea a le teine o Selema, i le alii lea ua tulitulia o ia.  Le alii lava lea e tasi, na taumulimuli i le tamaitai pese o Repeka.

“E manaomia na ta talanoa,” o le augani atu lea a le alii lea ia Selema.

“Leai, e manaomia ona e alu ‘ese, aua a leai, o lona uiga, o lea  sau le tamaloa masosaoa lae, i le togi oe i fafo, ae o lea e tatou i le fogafale lona tolu, o le faletalimalo,” o le toe tali atu lea a Selema ma faasino ia Nero.

Na tilotilo mai Nero, i le faasino atu o le tamatamai lima a Selema, ma vave solomuli ai loa si alii lea sa i tua o Selema.

Ua toe fa’aauau ona savavali ia Nero i fafo o le faitoto’a o le faletalimalo, ae mulimuli atu ai Repeka, Susana ma Selema.

Ina ua mae’a ia le pati i lea afiafi, sa toe fo’i ia Selema ma Nero, e fa’afeao ia Repeka ma Susana, i lo la potu i le faletalimalo.

Sa fa’atofa le teine o Selema ia Nero, ma agai atu loa i le fale o ona matua, e siaki ia le taifau a Lafaele.  E alu atu Selema, ua leai se ta’ifau.

Ona toe oso lea o Selema i lana taavale ma fa’asasa’o atu i le fale a Mikaele.  E taunu’u le teine, o la e ola mai le moli pito i luma o le fale.  Sa fa’atu lana taavale ma savali atu i le faitoto’a ma taumafai e tatala i lana ki, ae ua sui e Lafaele ia loka o le faitoto’a.

Ona ‘o’omi lea e Selema o le logo o le faitoto’a ma ona lagonaina le tamo’e mai a le taifau i le faitoto’a.

E le’i umi ae tatala mai e Lafaele ia le faitoto’a o le fale ma savali atu i totonu ia Selema.  

Na muamua ona fa’atu i lalo ia Selema ma mili le ulu o le ta’ifau.  Ona ia savali atu lea ma saofa’i luga o le nofoa i totonu o le umukuka.

Ae ua savali atu Lafaele ma tu i le ogaumu.

“Ua e fia ‘ai?” o lana fesili lea ia Selema.

“Manaia foi,” o le tali mai lea a le teine.

Ua amata ona pisi le alii o Lafaele, i le kukaina o se mea.  Ae faapea atu loa Selema, “Mea sili ua sui loka o lou faitoto’a.”

“Ua leva na tatau ona sui.  Ou te le iloa po o ua fia ni tagata o lenei nu’u, ua tu’u iai e Felila le ki o lo’u fale,” o le tali mai lea a Lafaele. 

O Felila o le tausi fale a Lafaele.

“Aisea la na ou maua mai ai Popo, i tua o le fale analela?” o le fesili atu lea a Selema.

“Ou te le iloa.  Ae o se mea o lo’o o’u su’esu’e pea.  Ua uma ona ou fealua’i solo i totonu o le fale, e leai se me aua gaoia po o ua ave’esea.  Ona ou valaau lea i le aufaigaluega a Filipo, e o mai e su’e pe sa sau seisi, i le faapipi’i ni masini faalogo I totonu o le fale.  E leai foi,” o le tali mai lea a Lafaele.

[E FAIA PEA]