E SOLA LE AMIOLEAGA AE TULILOAINA


[ata: SN]

VAEGA 61

E toe fa’atalofa atu i a tatou pa’aga i so’o se tulimanu o le kelopo o lo’o maua mai ai lenei auaunaga.  Aemaise i nai o tatou tama ma tina matutuale  i Amerika Samoa.

E tatou te tau fai si’i faatasi ia le viiga ma le mua, i lo tatou Tapa’au Sili i le Lagi, ona o Lana pule faasoifua ma Lana tausiga alofa, ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, mo le fa’aauauina o le tatou Fagogo – E SOLA LE AMIOLEAGA AE TULILOAINA, i lona vaega e 61.

******************************

Ua sauni ia le osofaiga a Selema, Lula ma le tamaitai pese o Repeka, e saili mai ia se tamaitai e igoa ia Malia Tuese, lea na misa ma lana uo tama.  Ae oso lana uo tama i luga o le taavale ma taumafai e taofi ia Malia, mai lona alu ‘ese.

Oso loa Malia i totonu o le taavale, fa’aola le taavale ma agai ese atu ai, ae o lo’o iai pea lana uo tama i luga o le taavale.

O le osofaiga a Selema ma Lula, ona o se vaega a le latou ofisa, o le su’e mai o tagata e le o atu i a latou fa’amasinoga.  

Ae o le alu a le tamaitai pese o Repeka, ona o lea o le a pu’e le ata o le faatinoga o le latou galuega.

“Sa valaau muamua seisi ia Malia,” o le fesili atu lea a Selema i le aufaigaluega a le latou ofisa.

“Na ou vala’au iai,” o le tali mai lea a le failautusi o le ofisa.  “Ae na fa’amalie mai, ua galo ia te ia, ia le aso o lona faamasinoga.”

“Lelei tele,” o le tala lea a Melema.  “E faigofie lava la le tatou mataupu.”

“E pei lava e le manaia se ata e mafai ona pu’e mai i le o e su’e mai ia Malia,” o le tomumu lea a Repeka.  Aua o lea lava ua o’o i fana, ua fa’asa e Selema ona alu seisi ma ave.

“Ae a pe a tatou o e su’e se alii faamalosi teine po o ni tagata faapena?” o le toe fesili atu lea a Repeka.

“Oi kalofae, o le tali mai lea a Selema, “ua sioki a makou i kagaka leaga faapena.”

“E manaomia ona iai se tatou fuafuaga, i le auala e pu’e ai Malia,” o le faapea atu lea a Lula ia Selema.

Ona ia fesili atu lea ia Repeka, “O iai ni au loka lima ua saunia?”

“E leai,” o le tali mai lea a Repeka.

“E tatau ona iai ni au loka lima.  E mafai faapefea ona e lokaina se tagata, pe a maua?” o le toe faapea atu lea a Lula.

Ua liliu atu Repeka ma ‘e’e atu i lana failautusi, “Susana, aisea le mea e leai ai ni a’u loka lima?”

[E FAIA PEA]