Ads by Google Ads by Google

Fa’aalia ata talafa’asolopito fa’amaumau measina Samoa - Fa’afoeina e Dr. Ingrid Ahlgren mai Iunivesite o Harvard


[ata: foa'i]

SEATTLE - O ata o le vavau ma tatou tua’a ua mavae ae maise o taimi o toe pulega fa’aleaganuu sa mautu ai le olaga o tagata Samoa a’o le’i sofa’i mai tu ma aga fa’apapalgi, o Measina ia o lo’o naunau i ai agaga o e fa’amaumauga lo tatou tala fa’asolopito.

 

Faafetai i le tamaitai Faiaoga o Dr. Dr Ingrid Ahlgren o le Harvard University i Amerika, aua o lea ua fa’atulaga e le Iunivesite Aoao o Samoa - le NUS - lana malaga e fa’asoa mai ai tala fa’asolopito ia. 

 

Dr. Ahlgren o loo nafa ma le tele o fa’amaumauga o mea na toe maua mai le eleele ma le gataifale o Samoa Atoa i le vaitau 1893 seia oo i le 1898. O le vaitau lea sa fa’aaunu’ua ai le afioga Mata’afa Iosefo mai Samoa ma toe taimi o le pulega a Tuimanu’a Elisala i le Manu’atele.

 

O measina nei e ao ina faamauina i loto ma agaga o tatou fanau talavou, ae ua toe fa’asoa mai e Dr. Ahlgren. O le Falemata’aga o mea na fa’asao mai e le Oceanic Collections i le Peaboby Museum of Archaeology & Enthnology i le Iunivesite o Harvard lea ua mafai ona fa’asoa mai mo i tatou nei measina taua.

 

O le vala’aulia fa’apitoa a le Ofisa Tutotonu o Aoaoga o le Tala fa’asolopito o Samoa a le Iunivesite o Samoa i Papaogalagala lea sa latou fa’atoga mo lenei avanoa lelei.

 

Ua fa’alauiloa e le pulega o Suesuega i le Tala Fa’asolopito o Samoa i le Iunivesite o Samoa, “o se vala’au sili ona taua, aua ua mafai ona utuvai malie lupe o le foaga aua taeao a Samoa i tala e ao ina silafia e i latou i na vaitau ae le’i taitai ona soifua a’e i Samoa.”

 

O le aotelega ua fa’alauiloa nei ua fa’ailoa mai o le “Measina” ma ua fa’alauiloa fo’i, “O le aotelega sili ona tele ua fa’amauina i fale Mata’aga i Amerika,” e pei ona fa’ailoa e le NUS i le aso 29 o Novema, 2022.

 

“O se mea sili ona taua ma o se faiva fo’i ua tuulima i le tama’ita’i o lo’o tuufa’atasia lenei fa’aaliga, Dr Ahlgren, o lona toe fa’afo’ia maia lea o nei Measina i Samoa e ala i lana malaga lenei, ma ua sili ona fa’afetaia le fa’asoa  e ala i folasaga ma ona tiute ua fa’atino i lenei vaitau mo tupulaga faia’e o Samoa na Lua,” o se toe tala mai le taitai o le Samoa Studies a le NUS.

 

Fa’ailoa e Dr. Ahlgren, “O le Measina o se tuufaatasiga o le tala fa’asolopito ua loa ona tausia ma fa’afailele mai e le Peabody Museum i Harvard University, ma o se tasi o fa’amaumauga sili ona tele ua tuufa’atasia, peita’i o lo’u tiute tuulima o se tausi Measina e ao ina ia ou toe fa’afeso’ota’ia lea tala’aga ma ona tagatanuu moni e fa’asinotonu i ai, o tagata Samoa i ona malo e lua.”

 

“O se mitamitaga faia’e ia te a’u, lo’u tu atu e fa’ailoa le amataga o lenei taumafaiga, ia soo le fau ma le fau i le talafa’asolopito ua fa’amauina. Ia fa’ataunuu le tautua mo Samoa na lua e afua i le aso,” o se tala lea a Dr. Ahlgren, e pei ona fa’ailoa e le NUS. 

 

O le masina lenei o le a faia ai lana tolasaga mo le NUS ia Tesema 6, 2022 i Samoa, ma le fa’amoemoe e uia i tatou i Amerika Samoa nei ia Tesema lava, ao le’i toe taliu o ia i Massachusetts.

 

O le folasga mo Amerika Samoa o le a fa’autu lava lea i toe taimi o le Pulega a Tuimanu’a Elisala ao le’i tuu aloa’ia atu le Manu’atele i pulega a Amerika le Malo Tele i le 1904.

 

O le potu fono o le NUS, Niule’a Building o le a faia ai lana ulua’i folasaga i le itula e 10:00 i le taeao ia Tesema 6. 

 

Ua fa’afeso’ota’ia atu le pulega o Tala Fa’asolopito a le tatou Kolisi Tuufa’atasi, pe ua mae’a logotala i latou i lea avanoa taua, peita’i ua faailoa mai ina ia fa’afeso’ota’ia le fa’auluuluga o Tautua ma Mataupu Tauavea a le fanau a’oga i le Kolisi, aua e le’i oo mai se fa’ailo e tusa o le asiasiga a lea tamaitai Tausimeasina a le Iunivesite o Harvard i le Kolisi Tuufaatasi.

 

“Ua iloga fo’i i le fa’asologa o lo ua fa’atulaga mo le toe masina o lenei tausaga e le’i logotala le pulega i lea asiasiga taua, aua o lo ua fa’atulaga mai na’o le fa’auuga o le fanau i lenei masina ma ona tapenaga uma, le a fa’ataunuu ia Tesema 16, 2022,” o se tala lea mai le susuga Aiono Okenaisa Fauolo o Suesiega & Fa’amaumauga Tau le Talafa’asolopito o Samoa ma atumotu o le Pasefika a le Kolisi Tuufa’atasi o Amerika Samoa.

 

Ua taumafai fo’i mo se avanoa e i le susuga Letupu ae le maua mai se tali i le taimi ua lomia ai lenei tala mo le silafia o se folasaga a lenei tamaitai foma’i i lo tatou atunuu.

 

O nisi ua fa’ailoa mai o latou manatu e aofia ai Tautiaga Junior o Amerika Samoa, ma ua ia fa’ailoa ai lona agaga fiafia tele, “Pe a maua sou avanoa e fa’afofogaina ai folasaga nei, aua e moni lava, “O toa nei sa tulai e mo tatou tagata i vaitau e le’i maua tele so tatou silafia o faiga mai fafo, o le a lofia ai a tatou tu ma agaifanua fa’asamoa moni.”