Ads by Google Ads by Google

FA’AAUAU & FA’ALELEIA ATILI AUAUNAGA FOMA’I MANU MO FAGAFAO A AIGA


Le tamaitai foma’i o manu Dr Barbara Kahl ua ia taumafai e fa’asino i le Samoa News ala e fa’atautaia ai le tuuina fa’alelei o meaola i totonu o pa ua saunia e le matagaluega e ala i le ta’avale e mafai ona fela’ua’i ai i latou. [ata: Leua Aiono Frost]

Pago Pago - AMERIKA SAMOA

 

I le Malae o le Suigaula a le Atuvasa i le vaiaso ua te’a sa fa’aalia ai le auaunaga a le tama’ita’i Foma’i Manu o Barbara Kahl ma lana aufaigaluega ina ia mafai ona tautuaina fagafao a aiga taitasi, e afua mai i ta’ifau e oo lava i pusi, ma isi meaola ua manatu le aiga ina ia fa’agafao ma tausia fa’atasi ma tagata uma i totonu o aiga.

 

O le tele fo’i o fautuaga mo le tausiga lelei o lau fagafao ina ia mautinoa lava o lo’o malosi pea i latou ma le maua i ni gasegase o meaola, ma fa’asolo atu ai ina lamatia fo’i le soifua maloloina o sui uma o le aiga.

 

Ua mafai ona faia tui puipuia o fagafao ta’itasi ma ua i ai fo’i taimi fa’atulaga e tatau lava ona faia ai, e fuafua fo’i i o latou tausaga o i ai. Ua eseese fo’i tui o meaola e faia ae ua tutusa i fa’ama’i o lo’o ua mafai ona a’afia ai lo latou ola i le tatou atunuu.

 

Ua fa’ailoa mai afai e fia faia le tui o le Leptospirosis, le fa’ama’i o meaola,  ua faia muamua lava nei tui puipuia mo meaola fagafao i totonu o aiga. Lona lua o lo’o ua i ai tui puipuia mo meaola e tatau ona tausia lelei, e mafaia ai latou ona soifua e aunoa ma le a’afia i nisi fa’ama’i fou.

 

O lo ua i ai le totogi mo nei tui puipuia, ae le o se tupe tele pe afai o lo’o e alofagia tele lau fagafao. “Pe afai e faia uma tui e tolu e tatau ona fa’atino mo lau fagafao, e totogia e oe le pili e $40. O se vaega tupe o le a e fa’aalu tatauina lea tupe, ae ola fiafia ai lau fagafao ma fa’amautinoa ai fo’i o lo’o le a’afia oe ma lou aiga mai fa’ama’i e ono a’afia ai ona o le tausia fa’atasi o i latou ma lau fagafao pele i lou loto,” o se tala lea a le tamaitai foma’i manu.

 

Ua matauina fo’i le latou ta’avale fou ua mae’a saunia lelei mo fela’ua’iga o meaola ua manatu le aiga  e tatau ona tuuina atu i le falema’i o meaola ina ia tausia lelei ai ma sailia ni o latou aiga e fa’afagafaoina i latou.

 

Mai le ta’avale sa i ai muamua, e oo mai i le ta’avale ua i ai nei ma fa’aaogaina e lea tautua, ua fa’ailoa mai e sui o lo’o fa’afoea lea tautua mo le foma’i manu ma le latou fo’i tautua, Ulim, Sa, Gus, Roy Ulufale ma Faitala Petelo, “Ua fa’afaigofie mea uma, ua le toe fiu e tulituli nai meaola, ua i ai meafaigaluega patino mo le galuega ina ia fa’ataunuu ma le toto’a ma ia le a’afia fo’i nai meaola i le taimi e pu’e mai ai.

 

Pe afai e oo uma atu pusi ma ta’ifau i le nofoaga, e tausia lelei ma faia fo’i o latou tui, ma sailia mai ai nisi e moomia ni a latou meaola fa’afagafao e fa’aauauina lo latou tausiga lelei, ma faia fo’i o latou tui i taimi e tatau ai.