Pago Pago - AMERIKA SAMOA

O loo faaauau pea su’esu’ega a le Matagaluega o le Puipuiga o le Saogalemu Lautele i se tagata sa taumafai e talepe meatotino o le lala i Tafuna o le faletupe o le Territorial Bank of American Samoa, le TBAS, i le masina ua te’a. 

E pei ona lipotia e le Samoa News i se taimi ua fano, o lo’o masalomia se pagota na sola ese mai le toese i Tafuna sa ia faia lea tulaga. 

Ma o lo’o masalomia se pagota sa sola mai i tua o le toese mataupu. 

“Matou te le’i maua uma mau mai le faletupe, o le mea lea ua tuai ai ona faia le moliaga o lenei mataupu. Na pau lava le mea e mafai ona ou fai atu ai, o lo o fa’aauau pea su’esu’ega ma a mae‘a loa ona tuulima atu lea o le faila i le Ofisa o le Loia Sili mo le faia o moliaga,” o le saunoaga lea a le ta’ita’i o leoleo ia Poua‘amea Tuaolo Supapo e tali mai ai i fesili a le Samoa News e uiga i lenei mataupu o lo’o fesiligia pea e nisi o le mamalu lautele.

O le masina ua te’a na te’a na iloa ai tu’uaiga e fa’apea o le ali’i pagota ia Joeita Fa’aaliga na sola ese mai le toese i Tafuna ma masalomia le taumafai e talepe meatotino a le TBAS - le masini tupe, ATM, peita’i e le’i manuia. Ma sa toe maua o ia e leoleo ma fa’afoi i le toese. 

O se pepa o faamatalaga na tuuina mai e le TBAS sa fa’ailoa ai e fa’apea, e leai ni mea totino a le faletupe sa ave eseina aua sa taunu’u sui o le Saogalemu Lautele a o fa’agaolo le taumafaiga o le gaoi ma saisaitia ai le o lo’o masalomia i lenei mataupu. 

“O lea ua toe fo’i le pagota i lalo o le vaavaaiga a leoleo ma e le mafai ona ou toe fai se faamatalaga ona o loo fa’agasolo su’esu’ega” a leoleo, ma o le pagota o loo fesiligia ma masalomia i lenei mataupu i lo’o i lalo o le va’ava’aiga a leoleo, o se fa’amatalaga lea a Poua'amea i le Samoa News. 

E pei ona lipotia e le Samoa News i le masina o Iulai, o lo o tumau pea le le mautonu o le Matagaluega fou a le malo, American Samoa Corrections Agency i le leai o se fa’aaliga fa’alauaitele e tuuina atu i le atunu’u i le taimi na sola ese ai se pagota mai le Fale Toese i Tafuna.

O se ata o le ali’i pagota, o Fa’aaliga na salalau i luga o le Facebook, ma o lo o tu’uaia ai lona talepeina o fale o aiga i Tafuna i se vaitaimi ua te’a.

E oo lava foi i le taimi na pueina ai o ia, e leai se faaaliga

fa’alauaitele na tuuina atu e tusa ai o lenei mataupu.