Ads by Google Ads by Google

Fa’aauau tapunia Samoa mo le isi 14 aso - e pei ona saunoa i ai le Palemia


[ata: foa'i]
Ofisa o le Palemia a le malo o Samoa

APIA, Samoa - I le saunoaga a le afioga i le Palemia ia Fiame Naomi Mataafa ua fa’ailoa ai le fa’auauina le tapunia o le atunu’u mo le isi 14 aso e amata atu i le vaeluaga o le aso 23 o Mati seia aulia le vaeluaga o le po o le aso 5 o Aperila. 

 

Ua mafua lea tulaga ona o le alu pea i luga o numera o i latou ua maua i le Koviti-19 lea ua atoa le 247 talu mai le Aso Tofi o le vaiaso na te’a nei, ina ua sao i tua le faamai.

 

E faaopoopo i lea numera le 15 o i latou na taunuu mai i Samoa i le Aso 6 Mati, i le malaga mai Niusila na maua i a latou suega ua aafia i le faamai.

 

Ua faamaonia e toalima (5) i latou ua aafia i Savaii, a o le toatele o i latou ua aafia, o loo i Upolu.

 

O le “taofiofi o le soona feoai ma le tumutumu i nofoaga faitele, atoa ai ma le tausisia o aiaiga faalesoifua maloloina e pei ona taulogologo atu pea i a tatou faamanatu mai le Soifua Maloloina, e fesoasoani tele i le tau taofiofia o le pipisi o le faama’i, atoa ai ma ni o’oo’oga tugā e ono alia’e mai,” o se vaega lea o le saunoaga a Fiame. 

 

A o iai le atunu’u i le faaopoopoina o le piliota i lalo o le laasaga tolu, o le a tatala auaunaga moomia e pei ona i ai i le taimi nei i le lua (2) aso o le vaiaso. E afua atu i le Aso Lulu (23 Mati ona o le fetuunaiga ua auina atu ai lenei faasalalauga), Aso Toonai (26 Mati), Aso Lua (29 Mati), Aso Toonai (2 Aperila) ma le Aso Lua (5 Aperila).

 

O taimi faatulagaina e tatala ai auaunaga moomia e mai i le 8.00 i le taeao e o’o atu i le 2.00 i le aoauli. O isi aso o le lua vaiaso ua faaopoopo nei, e le tatalaina ai nei auaunaga.

 

“Le atunuu pelē, o le talosaga a le tatou Malo, ia tatou faitaulaga pea mo le taumafaiga o lenei galuega. O le mau a Samoa, e ui ina tatou lutia i Puava, ae mapu lava i Fagalele. E ui ina au’aoa la tatou folauga i to’atugā o le soifuaga nei, ae manino lava Fofoga alofa o lo tatou Atua i aso uma,” o se isi vaega lea o le saunoaga a le Palemia.