West Point New York - UNITED STATES

O se alo o le tatou atunuu na soifua a’e i Fagatogo, Amerika Samoa, ua fa’aeaina nei e le USArmy i le tofiga “Colonel” i le atoaga fo’i o le 22 tausaga o lana tautua i lea itu o le Vaega’au. O ia lea o Col. Ulu E. Porter. 

O lea sauniga mamalu sa fa’atautaia lava i West Point, New York ia Fepuari 01, 2024, o le aso soifua fo’i o lona tua’a ua mapu mai i ti’asa, Robert Porter. 

Sa auai uma atu si ona tina, Falefa ma uso ma tuafafine i lea sauniga mamalu, ma o se fiafiaga ia i latou uma fo’i fa’aeaga ua fa’ataunuu ma le fiafia.

Mai lona tofiga Lutena Colonel sa tautua ai muamua, e fa tausaga sa ia toe sailia ai lona tofiga Colonel ua fa’amanuia ai nei o ia.

Ua fa’ailoa mai e Ulu Porter, “E i ai aoaoga fa’apitoa e tatau ona ausia e le sui e toe sailia se si’itaga o tofiga e pei ona naunau i ai, peita’i, o le tele o taimi o lau fa’atinoga o ou tiute masani ma lou silafia ma taumafai e siitia atili lau tautua i na mea uma, e mafai ai ona mataituina lou agava’a o se ta’ita’i agava’a i tofiga nei, ma i’u ai ia te oe le tausinioga i le tulaga fa’aeaina e pei ona mautu nei i lo’u sui fa’atauva’a.”

Na soifua a’e lenei talavou i Fagatogo, peita’i, sa soifua a’e a’o itiiti i Kalihi Hawaii ma amata ai ana a’oa’oga, na toe taliu atu i Samoa ma ulufale i le vasega 7 i le Coleman Elementary i Pago Pago ma fa’ai’u ane ai ana a’oa’oga i Samoana, ma maua ai lana sikolasipi e ta’alo Football i le Rocky Mountain College i le Setete o Montana. O iina ina ua mae’a ana a’oa’oga na avea ma Totino o le “Football All American 1995!”  Na ausia fo’i e ia le fa’aeaga o le Sinia Alii sili ona Ta’alo Lelei i lona tausaga fa’au’u.

Na fa’ato’a ulufale ia Ulu Porter i le USArmy i le mae’a o lana Kolisi lea ua atoa ai le 22 tausaga a’o avea pea ma fitafita tiute i lana lea tautua.

O lona tomai sa fa’apito augafa i ai lana tautua i le USArmy o le MOS 91B, poo le Medic, ae le’i si’itia o ia e tautua o se ali’i Ofisa Sinia i le tausaga 2002 lea sa mua’i avea ai o ia o se Ta’ita’i mo le Medical Team e sapaia le 2nd Infantry Division, Korea.

Soso’o lea ma le si’itia mai i Washington i le tausaga 2004 i Fort Lewis o le Executive Officer mo le 514th Medical Company.

I le tausaga lava lea na toe tofia fa’apitoa ai Ulu Porter e avea lava ma Executive Officer e ta’ita’ia le 520th Medical Company ma siitia loa i Iraq i le taimi o le vevela mai o fe’eseeseaiga.

Na toe malaga foi i le tausaga 2006  e avea ma MiTT Advisor i le 4th Iraqi Army General Staff i Tikrit, Iraq. Ia Fepuari 2007 ua ia ta’ita’ia le Charlie Company 325th Brigade Support Battalion, 3rd Brigade Combat Team, 25th Infantry Division, FOB Warrior i Kirkuk, Iraq. Ma toe fa’aauau ai lava ona tau i latou i lea faga i le tausaga e 2008 ma siitia ane ai i le COB Speicher, i Iraq lava.

Ia ua mae’a ana aoaoga fa’apitoa ma tiute i le tausaga e 2013, ona tofia fa’apitoa loa lea o Col Ulu Porter e avea ma Senior Behavioral Health Officer  i le 2nd Combat Aviation Brigade i Korea ma o’o ai ina avea ma Chief Special Operations Embedded Behavioral Health  e puipuia tonu lava le vaega fa’apitoa a le 2-75th Ranger Regiment ma le 4-160th Special Operations Aviation Regiment i le 2014.

I le 2017 ua tautua o ia e avea ma Fa’atonu o le Psychological Health mo le National Training Center ma e pulea fo’i le Matagaluega o le Behavioral Health mo le Weed Army Community Hospital, Fort Irwin, Kalefonia. Ua fa’amae’a lelei fo’i e ia lana kosi e lua tausaga le umi na a’oa’oina ai i mataupu tau le va fealoa’i o Aiga, va o ulugali’i ma va o matua ma fanau [Family Social Work Clinic].

 Na auai o ia ma fetufa’iga o tomai ma ala e mafai ai ona fa’afo’ia fa’afitauli i le Walter Reed National Military Medical Center i le tausaga e 2021. I le taimi nei ua avea o ia ma Fa’atonu o le Matagaluega o le Psychological Health ma o le Ta’ita’i fo’i o le Behavioral Health, lea fo’i sa mafai ai ona malaga atu e tiute i le Baltic Region Behavioral Health Consultant e fesoasoani malosi i le taua ma fevesia’iga i Kosovo i le tausaga 2022.

I le soifua a’oa’oina lelei o Col. Ulu Porter e sapaia ai ona tofiga fa’ata’ita’i i vaega ‘au fa’apitoa mo togafitiga fa’apitoa o e fa’amanu’alia  ma e a’afia i taua sa tautua ai e aofia ai lona fa’ailoga Doctrate - Social Work mai le Iunivesite o Southern California, Los Angeles, Kalefonia. Na mua’i maua fo’i lona fa’ailoga Master Social Work mai Fayetteville State University - Army MSW, JBSA. 

Ua mae’a umia fo’i e Col. Porter lona fa’ailoga fa’apitoa o le Master - Marriage & Family mai le Pacific Lutheran University i le Setete o Uosigitone. Mua’i umia fo’i e ia lona fa’ailoga Bachelors of Arts  i Mataupu Fa’apolotiki mai le Rocky Mountain College i Montana.

O ia lea sa fa’amanuiaina lana taumafaiga i le na’o le tasi le tausaga sa ia sailia ai lea tusi pasi ina ua mae’a ausia uma e ia agava’a e pei ona moomia ai: e aofia i nei kosi e auai i le aoaoga fa’apitoa a le Command General Staff College, Leavenworth, KS: Health Services Plans, Operations, Intelligence ma le Security Courses.

 Mai lona tofiga ua fa’ailoa atu ai o ia e ta’ita’i poo le fa’atonu fo’i o auaunaga uma tau le toe fa’afo’ia o le mafaufau tonu i fitafita uma sa malaga atu i nofoaga o taua ma a’afia ai o latou mafaufau i tiute sa latou faia i tafa o taua.

O le tapenaga o nei tautua uma e tatau ona fa’auia uma atu i le susuga Col. Porter mai le Dept.of Behavioral Health i Keller Army Community i  West Point, New York.

O mea uma e fa’aaogaina mo togafitiga e oo i le kilivaina atu e ao ina fa’atonu ma fa’amautu mai uma i le laulau a le susuga le ta’ita’i Col. Porter.

O lo ua i ai lava sui ta’ito’atasi e ao ina fa’aoo i ai lenei tautua ma ua ia fa’asoaina mai fo’i le aufaigaluega galulue mo nei tautua uma ia mautinoa ua fa’ataunuu lelei tiute.

Ona o lo’o avea fo’i o ia ma fa’atonu o le Psychological Health, o lons uiga o lona tiute mautinoa lava o le fautua a’ia’i mo i latou uma ua avea ma ta’ita’i i galuega fa’ataunuu uma vaega eseese o le auaunaga mo fitafita e tatau ona fa’ao’o i ai le tautua ma togafitiga tau le mafaufau.

E tatau fo’i ona mataituina suiga aoga o so’o se togafitiga e toina atu mo fitafita ma fuafua i ai le fa’asologa o latou togafitiga e soso’o mai se’ia oo ina mautinoa ua toe sologa lelei o latou mafaufau e mafai ai ona toe soso’o tiute masani fa’afitafita.

O se matagofie ma le lelei, ina ua fa’ailoa mai e Col. Ulu Porter e toe fo’i mai lava i lona atunuu pele o Amerika Samoa ina ia aoga i ai. O ana aoaoga ma tomai ua ia maua e tautua ai le Vaega Au, o lo ua fa’amoemoe o ia e toe taliu mai i Samoa e tautua ai nai ona tagatanuu. 

“O gasegase eseese o le Mafaufau, e ogaoga lava ma e tatau lava ona togafitia lelei, ina ia toe sologa lelei mafutaga i totonu o aiga uma o si o tatou atunuu pele. Poo le a fo’i se manuia tau tomai ua maua ona o le taumafaiga e saili manu aua o tatou tagata, e tatau lava ona toe taliu atu i fanua ma aiga e fa’atino ai se sao e tautua ai i lo tatou atunuu.”

O lenei alo o le atunuu o se alo e fa’asino i le tua’a ua mapu mai i ti’asa, Robert Porter, sa loa lana auaunaga i le Malo o Amerika Samoa, o le Ofisa Sinia i le Ofisa o Femalaga’iga a le tatou Malo. O lona tina o Falefa Tela Iuvale.

Ua fa’aipoipo lelei Col Ulu i le tina o le Aiga, DeLayne mo le 31 tausaga lenei ma e to’afa o la’ua alo, Danae, Ulu Jr, Ethan ma Isaac ma ua i ai fanau a lana fanau e to’alua o Elle ma Samson.

Fa’ailoa mai le agaga fa’afetai Col. Ulu i le tapua’iga mau a si ona tina ma le pa’ia o aiga i ona itu na lua, ae maise lava i le atunuu e pele i lona agaga o Samoa. 

“Poo fea lava e feavea’i ai lo’u nei sui fa’atauva’a, e mautinoa lava lo’u mitamita e fa’ailoa o a’u o le Samoa mao’io’i lava. Ou te mitamita i la’u aganuu ma a’u agaifanua e iloga ma tu’ese ai Samoa i so’o se mea. E ola fa’atuatua ona tagata ma fa’aaloalo i tagata matutua ma e ua mautofiga, e fa’aaloalo i ona ta’ita’i, aua o e ua tofia faatasi ma le pulega a le Atua mo faiva eseese ae maise i ana Ekalesia. O lo ua ia te a’u le agaga me’eme’e ma le fa’afetai, ina ua toina mo a’u lenei tofiga muamua i le tulaga o le Colonel in USArmy Medical Profession, o se taumafaiga e le’i faigofie ae ua ausia ona o le fa’atasi mai o le Atua i le taumafaiga ma tiute fa’atino e ausia ai. O se tofiga sa mua’i taumafai ai le tamaitai o Evelyn Langford lea na ausia e ia le Lt. Colonel. Fa’afetai ona so’o le fau ma le fau, ma ua gafatia e la outou auauna ona toe fa’asili atu le isi taumafaiga e tumati’e ai le avea ma Colonel.”

O lo ua to’ai taunuu le tusi vala’aulia fa’apitoa o le susuga Col. Ulu E. Porter e saunoa ai e fa’amalosi’au i le vasega faau’u a le University of Kentuckey-Army Masters in Social Work.

Amerika Samoa tatou tatalia lupe o le foaga sa tatou fa’alele ma tuuina atu i talosaga ina ia fa’aauupegaina i latou i tomai eseese o gasegase tau le mafaufau pea toe taliu mai i fanua, ua maua fo’i e tatou tali o tatou talosaga!