Pago Pago, AMERIKA SAMOA

Na fa’aalia e le afioga i le tamaitai Faipule mo le laumua i Uosigitone ia Uifaatali Amata lona agaga faafetai i le tapuaiga a Amerika Samoa, e pei ona toe filifilia ai o ia mo le nofoaga o le atunu’u mo le isi 2 tausaga. 

“Faafetai Amerika Samoa. Ua ou inu malie i lou finagalo faaalia, lau tapuaiga ma lau faaaloalo i lenei nofoaiga o le a mavae atu. Ou te fia tutu pea le sulu o le tautua mo oe le atunuu pele na ou ifo ai i lena 6 tausaga o le a mavae atu. Ou te talitonu i le taui e aumau faalilolilo i faamanuiaga e ala i le tautua alofa faamaoni ae faasilisili le faamoemoe i le Agaga o le Atua,” o le saunoaga lea a Uifaatali Amata.

Na taua e Amata le atunu’u i lo latou faatuatuaina faapea ai ma le talitonuina o ia na te toe nofoia le nofoa o le atunu’u mo le isi 2 tausaga. O le nofoaiga lona 4 lenei a Amata lea ua sauni atu nei i ai.

“O la outou auauna faatauva’a lenei ua outou toe filifilia e fai ma o outou sui mo le nofoaga o le atunu’u i le Konekeresi a le Iunaite Setete,” o le saunoaga lea a Amata.

“Mai le taele o lo’u agaga, ou te faafetai atu ai ia te oe Amerika Samoa, ina ua e fa’aalia lou finagalo e ala i lau palota, e pei ona toe filifilia ai a’u.”

Sa ia taua le faigata o le tau amataina mai o le faamoemoe, aemaise lava i le taimi na ia savalia ai afioaga, maota ma laoa o aiga mo le faailoaina atu o lona finagalo ina ia to mai la outou pule mo le isi 2 tausaga.

Na ia faafetaia le atunu’u i lo latou talisapaia ma le agaga fiafia o lona oo atu e faatalanoa le tulaga e tusa ai o lenei faamoemoe. Sa ia faafetaia le aao mafola o le atunuu atoa ai ma le alofa tula’i i taumafa, ae sili ai le faafetaia o le tofa ua sasa’a lea ua mafua ai ona toe filifilia o ia i le nofoa o le atunu’u.

“Se ua segia lo’u mauli. Ta te matamuli. O ai lava le tagata noa ma le faatauavaa ua e amanaia. Faafetai tele Amerika Samoa i lau tofa ua fa’aalia. O la outou pule lea,” o se vaega lea o le saunoaga a Amata.

Sa ia faafetaia fo’i le galuega faifai pea a sui vaaia o le Atua i soo se Fata Faitaulaga, o loo tulivae ma tatalo e le aunoa mo se manuia o le atunuu ma le lalolagi atoa. E le i faagaloina fo’i i lana faafetai tupu ma tamali’i o le atunu’u, o ta’ita’i ma e mautofi, ae le vaea ai le fala ooto i le tapuaiga mau a Tama ma Tina matutua, o i latou o lauao sinasina o loo tapuaia faiva i le ao ma le po, aemaise ai uo ma aiga ma le atunu’u atoa.

“Lau susuga Meleagi Suitonu-Chapman, lau susuga Oreta Mapu Crichton, a tuutuu i le loloto o gafa e tasi le tupuaga o i tatou uma. Malo le tausinio faafetai le taupati. Se leaga o le itupa e au lana inailau. E lelei le palei le tofi, ae sili ona taua lo tatou nonofo fealofani ma le fetausia’i.”

“Faafetai i le Atua ina ua a’e manuia le sailiga tofa a le atunu’u mo lenei tausaga. E iloa le tupu i ana aga faatupu, e mataalia tamalii i lana taalo faatamalii. Ia tofi mai e le Atua ni o tatou ta’ita’i mo le lumana’i.”

Na faapitoa fo’i le faafetai a Amata i le Ta’ita’i Komiti faapea ai sui uma o le Komiti sa gafa ma lenei faamoeoe, ona o le galuega fita sa latou faatinoina. 

O le taeao ananafi i le tuana’i ai o le faiga palota tele a le atunu’u i le aso Lua na te’a nei, na molimauina ai e le to’atele o le atunuu le tofa a Amata o loo talo talo lona aai i le nofoaga masani i Utulei, e faailoa ai lona faafetaia o le atunuu e tusa ai o le toe filifilia o ia mo le nofoa mo le isi 2 tausaga.

E pei ona silafia e le atunu’u, mai le aofai atoa o palota e 11,833 mo le nofoa i le laumua i Uosigitone, e 9,880 palota na manumalo ai Amata (83.5%); 1,704 palota na maua e le susuga a Oreta Tufaga-Mapu Crichton (14.4%), ae 249 palota na maua e le susuga a Meleagi Suitonu-Chapman.

O nisi o itumalo tetele i le atunuu na molimauina ai le mamao o le manumalo a Amata ao faagasolo le lauina mai o faaiuga o Fale Palota taitasi i le po o le aso Lua na te’a nei.

Mo se faataitaiga e pei o le Itumalo o Tualauta, mai le aofa’i o tagata palota e to’a 2,500, e 2,161 le aofa’i o palota na maua e Amata, 299 na maua e Crichton and 20 na maua e Suitonu-Chapman. 

O le Itumalo e sosoo i ai le to’atele o tagata palota o le Itumalo lea o Ituau. Mai le to’a 1,431 o tagata palota, e 1,188 palota na maua e Amata, 220 na maua e Crichton ae 23 na maua e Suitonu-Chapman. 

O le Itumalo o Fofo i le afioaga i Leone le itumalo lona 3 e sosoo atu i ai le to’atele o tagata palota na faamauina i le aofaiga e 911. E 724 palota na maua e Amata, 170 na maua e Crichton ae 17 na maua e Suitonu-Chapman. 

Na maua le avanoa e fesiligia ai e le Samoa News ni isi o le au palota a le atunu’u i le tulaga o le latou palota, atoa ai ma le mafua’aga ua latou toe filifilia ai le tofa a Uifaatali Amata na te tauaveina le nofoa o le atunu’u i le Konekeresi.

Na taua e ni isi o i latou lo latou talitonuina o galuega ua mae’a ona faatinoina e le tofa a Uifaatali, e ala i le finauina lea o alaga tupe fesoasoani mai le feterale e fesoasoani ai i le atina’eina o le malo o Amerika Samoa.

O se tasi o faataitaiga sili lava o vaega tupe ta’i miliona lea na faamanuiaina ai le atunuu i le tausaga lenei mo le faama’i o le COVID-19.

Na taua e le Tama matua ia Filiga Alema o le afioaga o Pago Pago e faapea, o vaega tupe e tele na mafai ona faamatuu mai e le malo tele o Amerika mo Amerika Samoa, na mafai ina ua galulue faatasi Amata ma taitai o le Konekeresi.

“E agava’a uma lava sui tauva e to’atolu na tausinio mo le nofoaga i le Konekeresi, ae ou te iloa ua lava ma totoe galuega ua fa’atinoina e Amata e lagolagoina ai o ia e le atunu’u atoa mo le isi nofoaiga o loo mulimuli mai,” o le saunoaga lea a le Tama matua ia Alema.

O se faiga palota to’a filemu na alo atu i ai le atunuu i le aso Lua o le vaiaso nei, e aunoa ma se fa’alavelave na tula’i mai e ono ma’imau ai se soifua o se tasi, e pei ona faamaonia mai e le Ofisa o Leoleo. 

Na tatala Fale Palota i le itula e 6:00 i le taeao ae na toe tapunia i le itula e 6:00 i le afiafi, e aunoa ma se faalavelave na ripotia atu i le Ofisa o Leoleo. 

E i ai ni isi na taofia faapagota i le po o le aso Lua na te’a nei ma tu’uaia i soltulafono mama, peita’i o ia faalavelave e le fesoota’i ma le faiga palota tele a le atunu’u na alo atu i ai i lenei vaiaso.