Ads by Google Ads by Google

Fa'afitafita USArmy maua i le COVID-19 Fort Benning Georgia


[ata: foa'i]

Fort Benning, GEORGIA - Ia Me 31, 2020 ua fa’ailoa ai i le tala tusia a le Nofoaga o lo’o a’otau ai fanau a le USArmy i Fort Benning, Georgia, e to’a 140 i latou ua fa’amaonia mai suega a le COVID-19, ua maua i lenei fa’ama’i pipisi.

 

O ali’i ma tama’ita’i fitafita nei, o lo ua nofo aoaoina ai i tomai fa’afitafita mo le ta’i tolu masina ona fa’ato’a pasia lea o i latou ina ia tautua i nisi nofoaga a le Army i so’o se itu o le lalolagi. 

 

Ua fa’ailoa fo’i e tusa ma le 640 o i latou na faia nei suega, ae 142 i latou ua fa’amaonia ua maua i le Coronavirus i le lua aso na fa’atautaia ai nei suega, ma ua fa’amaonia, e aofia i lea 142 o i latou ua maua i le COVID-19, e to’alua ta’ita’i o Satini ua aofia ai.

 

O le ulua’i taimi lenei ua mafai ai ona fa’ailoa e le Nofoaga Fa’apitoa mo a’oa’oga a le Army i Fort Benning se latou lipoti, ae o se isi lava mea e popole ai le agaga o le to’atele, aua o le nofoaga lea o lo’o gasolo atu fo’i i ai nisi o alo ma fanau a le tatou atunuu ina ia aotauina ai i a latou BCT, po’o tomai fa’apitoa e tautua ai i le USArmy.

Ua fa’ailoe e 615 i latou na fa’amaonia muamua mai ua maua i le COVID-19 i le amataga mai o le fa’ama’i lenei. Ma i le taunuu atu o nei fitafita e 640 i le nofoaga i Fort Benning sa faia fo’i a latou suega ma maua ane ai e to’afa i latou na maua mai suega e maua i le Coronavirus. 

 

Na atoa le 14 aso o nofoa va’ava’aia uma le aotelega o fanau nei e 640 ma ua fa’amaonia fo’i suega a le to’afa na maua i le Covid-19, ua toe manuia mai. Ona amata loa lea o latou koleniga masani, ae mataituina lava mea uma e tusa o le fa’asa.

 

Peita’i e to’atasi o lenei aotelega o fitafita o a’otau, sa toe ma’i ma ua va’aia ai auga o le Coronavirus, ma ua toe faia atoa suega mo le 640 o fanau o a’otauina, ae maua ane ai lea fa’aiuga, 142 o i latou ua maua i le Coronavirus i le aso Sa na te’a nei.

 

E na’o le tasi lava le vaiaso lea na va ai lenei faiga o suega, ae o lea ua 142 i latou ua maua i le fa’ama’i. O le vave lea ona toe a’afia o tagata talavou i le fa’ama’i, o nisi ua fa’amaonia o lo’o lava le malosi e a’oa’oina ai mo tiute faafitafita.

 

“I le taimi nei ua vave lava ona tu’u esea mai i latou ua fa’amaonia ua maua i le COVID-19, ua nonofo va’ava’aia i latou uma ma faia foi togafitiga e fesoasoani i o latou tino ina ia toe maua le malosi. Ua usita’ia uma lava fa’atonuga fa’atulaga mai e le CDC mo togafitiga fesoasoani ia i latou ua maua, ma ua fa’amamao ese mai fo’i le isi vasega atoa o le fanau o lo ua malolosi pea,” o se vaega lea o le tala mai lea nofoaga.

 

E ese mai lea ua fa’amamaina fa’asolo atoa nofoaga uma ale US Army o lo’o nonofo ma fa’aaogaina e le US Army mo a latou aoaoga fa’apitoa nei o autova’a atu i ai fanau ua tauto mo tiute fa’amiliteri. Ua le gata ai i fale ta’itasi nei, ae ua fa’ailoa mai le fa’amama atoa o nofoaga faitele, e masani ona uia e le fanau fitafita i so’o se mea e fa’atautaia i totonu o le Base i Fort Benning, Georgia.

 

E mautinoa o lo’o i ai foi alo ma fanau a le tatou atunuu o aofia i lenei to’atele o fanau ua a’otauina i Fort Benning i lenei vaitau, “Ia tatou nofo tatalo, ia toe manuia mai fanau.” 

 

Peitai ua le fa’ailoa mai lava suafa o nei fanau ua fa’amaonia o gasegase i le COVID-19.