Pago Pago - AMERIKA SAMOA

O le aso Lua, Mati 26, 2024 na amata aloaia ai tauaofiaga faapitoa a le Maota Fono, e pei ona sa taloina e le afioga i le Kovana mo le toe iloiloina ma le pasiaina o le $36 miliona, “o tupe totoe mai i le tausaga tupe 2023, e faaopoopo i tupe a le malo ma galuega o lo’o fai ma isi foi galuega faaopoopo”, e pei ona sa tolaulauina i totonu o le Maota o le Senate.

Atoa ai ma le iloiloina o le $700,000, mai tupe e le’i fa’ailogaina ma e le’i fa’aaogaina mai i le tausaga tupe 2022, e faaopoopo i le tausaga tupe 2024.  Ma o lenei vaegatupe ua fa’amoemoe e fa’atupe ai le auai atu o taitai o le malo i le ‘13^th Pacific Arts Festival’  ma le vaiaso o le ‘Samoan Heritage’ lea ua fuafua e faia i Hawaii, i le masina o Iuni.

Faapea ai ma le pasiaina o nisi mo komiti fa’afoe a le malo, e aofia ai i latou na tolaulauina o latou suafa i totonu o le Maota o le Senate i le aso Lua, mo le Komiti Faafoe Lesitalaina Au Fuafanua faaPorofesa (Board of Registration for Professional Surveyors), na aofia ai William E. Spitzenberg II, Fa’afetai Wells ma Faipaua Mareko.

O le taeao o le aso Lua, sa fa’aleoina ai le uluai faitauga o le iugafono a le Senate mo le pasiaina o i latou nei.  Afai ae pasia ma fa’amaonia nei tofiga, o le umi e galulue ai, e tolu tausaga.

I le toe fa’aleoina e le afioga i le Peresetene o le Senate, ia Tuaolo M. Fruean o le talitalia e le maota maualuga o le pili mai i le Maota o Sui, ina ua le pasia e le Senate la latou pili mo le fa’asoasoaina o le $36 miliona, sa faapea ona tula’i le afioga i le Senatoa Soliai Tuipine Fuimaono, ma fa’aalia lona agaga fa’afetai i le taitai o le maota maualuga i le taliaina o le fanoga a le kovana e tusa ai ma lenei mataupu. 

Sa saunoa Soliai, “O le mea e te saunoa iai, e fulisia ai le maota.  E ui i le Maota o Sui, ae e pei o le tatou maota, o le taitai lea o le tatou malo”.  

Na ta’ua foi e Soliai i le aso Lua, ia le ‘faafofoga foi o le kovana, ma ua alu malie i le aso [Gafua], ina ua ioe lau afioga ma le afioga i le Fofoga Fetalai”.

Ae peitai, sa fa’aalia le ‘auai o le finagalo a le afioga i le Senatoa Malaepule Saite Moliga e tusa ai ma lona le ‘auai i le taunu’uga o lenei mataupu. 

E pei ona sa saunoa Malaepule, o lona finagalo, o le ‘aumai o le mataupu i totonu o le Maota, o fea e agai iai finagalo o le maota, o le faaiuga lea o le mataupu”.  Sa fa’aalia foi e Malaepule e faapea, “[E] le ‘au lo’u manatu e faapea ua pa’u le saunoaga a le Peresetene, ae tatau pea ona aloaia a tatou galuega i totonu o le Maota”.

O le tali mai e le afioga i le Peresetene i le fa’atu’i’ese a Malaepule, sa ia fesili mai ai e faapea, “O le a le tatou mea o le a toe fai?”

Na saunoa Tuaolo, “O lea mea lea na tali ai i le kovana, ona o le fonotaga sa faia i le aso Toonai.  Lea na fa’amalamalama atu i afioga le ‘Special Session’, ua talia e le maota, ona o lea ua tali mai le Kovana i le mea sa finagalo iai le maota, e tofia se loia faapitoa…[o le] mea tonu na tatou taofia ai le faamaonia o le tupe lenei”.

Sa toe saunoa le afioga i le Peresetene e faapea, “O le tupe ua fa’aaoga, a le pasia e tatou ma tapuni tusi i le masina nei, out e leiloa po o le a seisi mea e toe finagalo ai le tou Maota.  Lea ua ou tali ananafi, ona e fuafua i le fonotaga i le aso Toonai.  Lea ua tatou talia le $36 miliona lea ona o lea ua faamalieina le mea na atugalu ai tou afioga”.

Sa taumafai Malaepule e faamanino atili le mafua’aga o lona fa’atu’I’ese, e faapea, “Sa tatau i le Kovana ona saunoa sa’o mai lava po o le a le afaina o le Faigamalo pe a le pasia le $36 miliona.  E leai se me aua iai, ua uma na fa’aaoga.  Afai o le afaina lena pe afai ae le tapunia tusi, e tatau ona aumai sa’o e fa’afofoga le maota ma le atunu’u.  Ae le na ona talosaga mai e pasia le $36 miliona.  Aumai manino i luma o le maota po o le a tonu lava le mafua’aga e mana’o ai e pasia le $36 miliona.”

Na toe faamanino e Tuaolo e faapea, a le tapunia tusi (tala o le tupe o le tausaga tupe 2024), e tele lona afaina i le lumanai.  Sa ia toe fa’aleoina foi se tulaga na ia saunoa ai i le tatalaga aloaia o lenei Fonotaga Faapitoa, i le aso Gafua e faapea, “E le tumau ia la’ua ia i le nofoa o iai nei.  A mana’o la tatou i ni pone i le lumanai…” 

Na saunoa foi le Peresetene o le Senate, “E leai seisi tulaga, e na ona vaai mamao i nisi o le a soloai mai i nofoa nei i le lumanai.” 

I se fautuaga “fa’atoeaina” mai i le afioga i le Senatoa Muagututi’a Tauoa, na ia saunoa ai e faapea, “Aua tatou te toe talanoa i ni mea ua tuanai.  Ae tatou agai i le lumanai e manuia ai tatou.  Lea ua silafia e le kovana tulgaa ua iai, ae o lea ua tali le tatou taitai, o le Maota a lena.”

Sa faapea ona taliaina e le afioga Malaepule ia le fautuaga a le tama matua ia Muagututi’a, ae sa ia saunoa, “Afai ua silafia e le kovana le faafitauli e tupu mai ona o le mea lea, sa tatau ona saunoa sa’o mai i le Maota.  Ae ua saunoa mai lau afioga (Peresetene), i le mea na tatau ona saunoa iai le kovana”.

O le taeao ananafi sa faataunuuina ai foi le iloiloga a le Komiti Su’esu’e Filifilia a le Senate (SSIC).