Ads by Google Ads by Google

Faailoa e Faimealelei i le Maota o Sui e le o ia o se tagata fa’atauvaa


Le afioga i le alii Faipule mai le afioaga i Aua ia Faimealelei Anthony Fu’e Allen i le mae’a ai o le tauaofiaga a le Maota o Sui i le aso Gafua na te’a nei. [ata AF]
ausage@samoanews.com

Pago Pago, AMERIKA SAMOA
 

O le toe oo atu o le afioga i le alii Faipule mai le afioaga i Aua ia Faimealelei Anthony Fu’e Allen i totonu o le Maota o Sui i le aso Gafua o le vaiaso nei, i le mae’a ai lea o le 14 aso sa i ai o ia ma lona Faletua i le nofoaga e malu puipuia ai tagata e malaga mai i le atunuu ona o aafiaga o le gasegase o le KOVITI-19, e le gata sa ia teena malosi ai faamatalaga fai mai sa i ai le taimi na ia alu ese ai ma le potu na nofo ai, ae sa ia faailoa fo’i i le Maota o Sui e le o ia o se tagata fa’atauvaa e mafua ai ona ia faia nei ituaiga amioga.

 

Na siisii le si’ufofoga o Faimealelei i le taimi na ia faaleoina ai lona le fiafia e tusa ai o le mataupu na laga i totonu o le Maota, ma taua ai le vaaia o ia e se molimau o fealua’i i le taulaga i Fagatogo, i le taimi sa tatau ai ona i ai i totonu o le potu na nofo ai.

 

A o le i talanoa Faimealelei e faatatau i le mataupu, na ia faafetaia afioga i Faipule i upu faamalosi e ala i imeli ma telefoni na avatu ia te ia, a o toesea ai i atunuu i fafo ona o sailiga togafiti mo lona gasegase.

 

“Faafetai atu i le tapuaiga a le maota, faafetai fo’i mo talosaga aemaise ai o telefoni ma imeli na momoli atu mo a’u, ua tali le Atua i talosaga, o le mafua’aga lena ua tatou toe feiloa’i fiafia ai i totonu o le maota,” o le saunoaga lea a Faimealelei.

 

Na taua e Faimealelei lona faanoanoa tele i le mataupu e pei ona tu’uaia ai o ia i totonu o le maota, e mafua mai i se faamatalaga a se molimau na momoli atu e se sui Faipule ma faaleaga ai o ia.

 

Sa ia faailoa i le maota lona lagona o loo i ai, na te le toe manatu e amanaia faamatalaga sa faia e faatatau ia te ia, poo le muagagana fo’i a le atunuu fai mai, “Aua le amanaia le pola e motu i tua”.

 

“O le isi fo’i lagona na oo mai ia te a’u, afai e te ti’eti’e i le mea maualuga i galuega lelei ua e faia, e taumafai lava tagata e aumai oe i lalo, o faiga ia a le Tiapolo, ae o le musumusuga a le Agaga Paia o le Atua, o le ou le amanaiaina ai lenei mataupu,” o le saunoaga lea a Faimealelei.

 

Saunoa atili Faimealelei e faapea, o le itu e pito sili ona faanoanoa ai lona loto, o totonu o le Maota o Sui e malu puipuia ai afioga i Faipule i le va tuutuuu nonofo, ao lea ua afaina o ia ona o se faaletonu lava na afua mai i totonu o le Maota o Sui. Sa ia taua e faapea, e tumu o ia i lona ‘ava ma faaaloalo i lona Itumalo o loo tapua’i mai, ona ia manatu ai lea e faapea, o le a leai sana tali e uiga i lene mataupu, na te matua teena malosi fo’i lenei tu’uaiga ua faia faasaga ia te ia, ae se’i sau se aso toe maua lea o se isi feiloaiga.

 

Sa ia taua lona mana’o ina ia faatoese aloaia faalaua’itele le sui faipule na faia faamatalaga le sa’o faasaga ia te ia, ona o ana faamatalaga sa faalele e le gata ua aafia ai o ia, ae ua aafia ai lona to’alua, o lana fanau faapea ai ma lona itumalo.

 

“O lea ua ou talosaga atu ma le agaga o le loto maualalo, o oe o le Ta’ita’i o le Maota, ou te le taliaina tu’uaiga ua faia faasaga ia te ia, ae ou te musu ou te talanoa atu ona ou te puipu i le maota lenei ua leva ona ou tautua ai. Ae o tu’uaiga uma nei, e le moni, e le sa’o, e le faamaonia fo’i,” o le saunoaga lea a Faimealelei.

 

Saunoa atili Faimealelei e faapea, sa i ai loa manatu na te le toe lagaina lenei mataupu, ae talu ai o totonu o le maota lea na laga ai e le sui faipule tuuaiga e faatatau ia te ia, o le mafua’aga lena ua ia manatu ai e tatau lava ona pa’i i ai sana faamatalaga e uiga i lenei mataupu.

 

“E le o a’u o se tagata faatauva’a, o a’u o se tagata aloaia, ua uma fo’i ona faauu a’u i le suauu o le Agaga Paia,” o le saunoaga lea a Faimealelei.

 

Na faauilavea le Sui Fofoga Fetalai sa taitaia galuega a le maota ma ia faaoloolomaau ia Faimealelei ina ia lava pea lona onosa’i e uiga i lenei mataupu. Na fautua Fetu Fetui Jr ia Faimealelei ina ia silasila alofa i le mamalu o le maota, aemaise ai o lo o i ai sui o le Vaega Faasalalau i totonu o le maota.

 

“O le itu taua i lo’u mafaufau, o lea ua e toe fo’i manuia mai i totonu o le maota, talu mai le taimi na toesea ai lau afioga ona o sailiga fofo i atunuu i fafo. Sa matou nonofo tatalo ma tapua’i ina ia i’u manuia lou faamoemoe,” o le saunoaga lea a Fetui Jr

 

Saunoa atili Fetui Jr e faapea, na te le faamalosia se finagalo o se faipule e uiga i lenei mataupu, ae i lona lava talitonuga, manaia ae saili lelei se laolao mo i laua la te faasoa ma soalaupule ai lenei mataupu, ina ia maua ai le nonofo fealofani ma le nofo lelei i lo la va.

 

Na tula’i le afioga i le alii Faipule mai le afioaga i Pago Pago ia Vesiai Poyer Samuelu ma ia saunoa e faapea, sa i ai lona manatu e le toe talanoaina lenei mataupu i luma o le maota, ae ua mafua ona toe laga sona leo ona o lea ua to’atama’i le alii Faipule e tusa ai o se molimau sa ia faailoa atu ia te ia le moni sa tupu.

 

Saunoa Vesiai e faapea, na te le i aumaia le mataupu i luma o le Maota ona o sona ita pe tau faaleaga fo’i i lona uso a faipule, ae o le mea na tupu, o le molimau na ia faailoa atu ia te ia le faalavelave na tula’i mai, lea na mafua ai ona ia tula’i ma faaleo le mataupu.

 

Saunoa atili Vesiai e faapea, na mafua ona filifilia sui mamalu o le maota e o latou itumalo, ina ia galulue e puipui le ola manuia ma le soifua saogalemu o le atunuu atoa i ni faalavelave e ono tutupu mai.

 

Sa ia teena le finagalo o Faimealelei fai mai ua mafua ona faailoa lenei mataupu faasaga ia te ia ona o le taumafai e faaleaga galuega lelei ua ia faia.

 

“E le faapena ni o’u lagona ae le matai fo’i ona ou natia se mea pi’opi’o e tatau ona fa’ailoa. Ou te le taliaina lau saunoaga ua tuu mai ona e le faapena lo’u tagata,” o le saunoaga lea a Vesiai.

 

E taumafai loa Vesiai e faailoa ia Faimealelei le igoa o le molimau lea na ia faailoa atu ia te ia le mea sa tupu, ae faauilavea loa le Sui Fofoga Fetalai ma talosaga i afioga i ali’i Faipule, ina ia faafilemu le mataupu ae puipui le maota.

 

“Lau afioga Faimealelei, aua nei faatagaina le tiapolo na te pulea o tatou loto, o lea ua toe 4 masina ona tatou aulia lea o le faiga palota. Tatou tapena ma sauni mo lea faamoemoe taua, ae faagalo ia na faaletonu,” o le fautuaga lea a Fetui Jr.

 

Sa molimauina e le Samoa News le afioga a Faimealelei ma le afioga a Vesiai o talanoa to’alua na o i laua i fafo o le Maota Fono mo se taimi. I le faaiuga o le la talanoaga, na vaaia ai e le Samoa News le lulu aao o afioga i alii Faipule.

 

O le mataupu lenei na tofu atu i luma o le Maota o Sui i le 2 vaiaso talu ai ona ua faailoa e Vesiai se faamatalaga a se molimau e faatatau i lona vaaia o Faimealelei i le taulaga i Fagatogo, ae o le taimi lea sa tatau ai ona i ai Faimealelei i totonu o le potu sa taofia ai o ia ma lona faletua mo le 14 aso.

 

E tusa ai ma le saunoaga a Vesiai i luma o le maota, e to’alua molimau na talanoa atu e faatatau i lo la vaaia o Faimealelei i le taulaga i Fagatogo.