Ads by Google Ads by Google

Faailoa e le Taitaifono Komiti Faafoe Femalagaaiga lu’itau o le galuega


[ata: foa'i]
ausage@samoanews.com

Pago Pago, AMERIKA SAMOA

 

O le iloiloga e faamaonia ai le toe filifilia o ia e fai ma sui o le Komiti Faafoe o le Ofisa o Femalagaaiga a le malo i le vaiaso na te’a nei, na faamanino ai e le Taitaifono nisi o faafitauli ma lu’itau o lo o fetaia’i ma le galuega.

 

O le afioga a Fanene Edda Wyberski na molimau i luma o le Komiti o Mataupu Tau Faamasinoga a le Maota o Sui, mo le iloiloina o tofiga a le afioga i le ali’i Kovana ia Lemanu Peleti S. Mauga e toe avea ai o ia ma sui o le Komiti Faafoe o Femalagaaiga. O le taimi nei, o Fanene o lo o avea ma Taitaifono o le Komiti Faafoe, lea e tofia e le afioga i le alii Kovana ona totino e toa 5, ae o isi sui e toalua e filifilia mai e le Senate ma le Maota o Sui.

 

Na faamalo le Sui Fofoga Fetalai, afioga Fetu Fetui Jr i le afioga a Fanene e tusa ai o lana tautua i le Komiti Faafoe, Na taua e Fetu e faapea, ua tele faafitauli e alia’e mai i le Ofisa o Femalagaaiga, atoa ai ma le tele o faasea mai le atunuu i le leaga o le auala o lo o tautua ai le atunu’u. 

 

“O le a sau silasila i le galuega a le Ofisa o Femalagaaiga i le 4 tausaga talu ona avea oe ma Taitaifono o le Komiti Faafoe”, o le fesili lea a le afioga i le Sui Fofoga Fetalai. Sa ia toe taua e faapea, e i ai mataupu a alia’e mai i le Ofisa o Femalagaaiga i tausaga ua mavae, e aofia ai le mataupu faasaga i tagata mai fafo e lei leva ona aumau i le atunu’u ae maua mulimuli ane ua maua o latou pepa nofomau ta’i 3 tausaga.

 

Na toe faamanino atili e le afioga i le Sui Fofoga Fetalai ia Fetu lana saunoaga ma ia taua ai e faapea, e le o le Komiti Faafoe lea e mafuli i ai lana tautalaga, ae o le Ofisa o Femalagaaiga i lona puleaina atoa ai ma le aufaigaluega.

 

Saunoa Fanene e faapea, o le tulaga i le galuega ma le va feagai o le Komiti Faafoe faapea ai le Ofisa o Femalagaaiga i tausaga e 4 ua mavae, e le o se tulaga faigofie, ona e tele naua faafitauli ma lu’itau sa feagai ai ma le Komiti Faafoe i le faatinoina o ana galuega masani e pei ona faatonu mai e le tulafono. 

 

E manino lava tiute tauave a le Komiti Faafoe i lalo o le Tulafono e pei ona saunoa Fanene e faamanino i le Komiti. E le gata e iloilo talosaga mo nofomau, ae iloilo fo’i talosaga mo le suia o le sponsor, faapea ai ma tagata faigaluega e auala mai i lalo o le vaega o le tulafono lea e sponsor ai e pisinisi ma kamupani tagata mai fafo e aumai e galulue i Amerika Samoa.

 

O le faafitauli o loo tupu, e i ai nisi o mataupu e le o mafai ona oo atu i luma o le Komiti Faafoe mo le faatinoina ai o lana tautua masani, ae ua faaui lava i tua ma faa saini ai e aunoa ma le silafia e le Komiti Faafoe. O nisi o nei mataupu e aofia ai talosaga mo le faamaonia ma le pasia o talosaga mo nofomau, atoa ai ma talosaga e sui ai sponsor. 

 

“O le tele o nei talosaga i taimi ua mavae, e faatumu nana lava e le aufaigaluega ma faamaonia e aunoa ma le oo mai i luma o le Komiti Faafoe matou te vaavaai ma iloiloina, o le mafua’aga lena o la’u molimau, e fai lava si faigata o le galuega, ae o lo o taumafai lava i le mea sili e gata ai le mafai ona ia foia nai faafitauli ia,” o le saunoaga lea a Fanene. 

 

Saunoa atili Fanene e faapea, o lo o galulue malosi lava sui o le Komiti Faafoe o Femalagaaiga e faatino auala uma ina ia mautinoa e leai se vaega o le tulafono e le faamalosia pe faatauagavale fo’i i ai, a ia faia mea uma e tusa ma le Tulafono.

 

“O se tasi foi o auala o lo o galulue malosi ai le Komiti Faafoe, o le fesoasoani lea i tagata o lo o faaaoga i auala ma faiga sese i tulaga o galuega,” o le isi lea saunoaga a Fanene.

 

E le’i faalaua’itele e le afioga i le Taitaifono i lana molimau tulaga tonu lava e faatatau i pepa faatumu ma faamaumauga na faatumu faanana lava e le aufaigaluega e aunoa ma le tuuina atu i luma o le Komiti Faafoe mo la latou galuega. 

 

 

“Na e logoina le Loia Sili e tusa ai o faafitauli e pei ona e taua i lau saunoaga”, o le fesili lea a Fetu. Na tali Fanene, sa ia logoina le Loia Sili ma ua mae’a fo’i ona ia silafia tulaga uma e tusa ai o faafitauli o loo tula’i mai i le Ofisa o Femalagaaiga.

 

Na faafetaia e Fetu le afioga a Fanene i lana tautua aemaise ai o le faatinoina o ona tiute ma le faamaoni.

 

“E le o totino uma o le Komiti Faafoe o Femalagaaiga e faamaoni i le galuega, ae faamalo atu ma faafetai i lau tautua,” o le saunoaga lea a Fetu, ma ia fautuaina ai Fanene ina ia silasila toto’a i aia tatau o tagata soifua o le atunu’u o lo o autova’a atu e fa’aaoga le auaunaga a le Ofisa ma le Komiti Faafofe o Femalagaaiga. 

 

Sa ia taua e faapea, e to’atele tagata o le atunu’u ua valaau atu i lona Ofisa e faaali atu o latou lagona le fiafia ma le faasea, ona o le leaga o le auala o lo o faia e le aufaigaluega faasaga ia te i latou. 

 

Na fesili le afioga i le alii Faipule ia Avagafono Vaimaga Maiava i le aoga o le polokalame lea na faatula’i e le afioga i le ali’i Kovana ia Lolo Matalasi Moliga i nai tausaga ua tuana’i atu, e faaleleia ai pepa nofomau a tagata mai fafo ua tele tausaga o nonofo faasolitulafono i le atunu’u. 

 

I le talitonuga o le afioga i le ali’i Faipule, ua maitauina le faaitiitia o le faitau aofa’i o tagata o le atunuu, ae atonu o le isi toatele o loo nonofo faasolitulafono lava iinei e lei faia ni pepa nofomau, ma ua tatau ai ona toe silasila i se isi polokalame o le Amnesty ina ia faaleleia ai pepa nofomau a le to’atele.

 

Saunoa Fanene, e taua le polokalame o le Amnesty mo tagata mai fafo, ae i lana vaavaai i le polokalame mulimuli lea na faia i le 2 tausaga talu ai, e tau le toatele ni tagata mai Samoa na lesitala ina ai, ae o le to’atele lava o tagata mai Asia. 

 

O le itu na nunumi i lona mafaufau e pei ona saunoa Fanene, ua silia ma le tausaga talu ona tapunia malaga a va’alele ona o le faama’i, ae sosoo loa ma le polokalame o le Amnesty, ae na faateia o ia i le toatele o tagata mai Asia na lesitala i le polokalame lea, ae le o iloa lelei pe na faapefea ona ulufale mai i le atunu’u, ae poo ai fo’i na faatumuina a latou talosaga .

 

O le toatele o tagata mai Asia na lesitala ma agavaa i le lalo o le polokalame a le Amnesty, o lea ua amata ona toe gasolo uma atu e faila a latou talosaga ina ia sui ai a latou sponsor. O le to’atele o i latou na o atu lava ma latou pepa o faamatalaga faamaonia faaletulafono (affidavit), e faamaonia atu ai ua le toe i ai se sponsor, ua le iloa fo’i poo fea ua malaga i ai le sponsor. 

 

Saunoa le afioga i le alii Faipule ia Vailiuama Steve Leasiolagi e faapea, e i ai lona talitonuga maualuga e mafua ona ulufale mai le toatele o tagata mai fafo ma lolofi mai i Amerika Samoa, ona o le susu ma le meli e ala i faamanuiaga o lo o sasa’a mai e le malo tele mo Amerika Samoa.

 

I lona talitonuga, e le tatau ona toe faia ni pemita e ulufale mai ai tagata mai fafo i Amerika Samoa, ma le tele ai o galuega ma le au overstayer, ae saili ai loa le tatala o le ulufale mai i le atunu’u ina ia faa faigofie ai auala uma ma galuega faatino.

 

O le taimi nei, o lo o maua e totino o le Komiti Faafoe o Femalagaaiga nai taui tupe mo le latou tautua. 

 

Ina ua fesiligia e Vailiuama, na saunoa ai Fanene, e $125 e maua e le Totino o le Komiti Faafoe i le Fonotaga e tasi, ae 4 Fonotaga i le masina, tusa lea e $5,000 le faamanuiaga tupe i le tausaga.

 

Saunoa Vailiuama, e le taitai lava lea tupe mo le Komiti Faafoe, e tatau ona faatulafono le $1,000 mo le Fonotaga e tasi i le vaiaso, tusa lea e $4,000 i le masina, tusa lea e $48,000 i le tausaga.