Pago Pago, AMERIKA SAMOA

O le mae’a ai ona filifilia o le afioga i le ali’i Senatoa, le Tofa a Tuaolo Manaia Eti Tuiletufuga Fruean e avea ma Peresetene fou o le Senate, na ia fa’ailoa ai loa i se faatalatalanoaga ma le Samoa News i le vaiaso nei nisi o ana fuafuaga vaai mamao mo le lumana’i.

O le mae’a ai ona filifilia o le Tofa a Tuaolo e fai ma Peresetene o le Senate mo le isi 4 tausaga, i le nofoaiga lona 37 a le Fono Faitulafono lea ua fa’amoemoe e tatala aloaia i le Aso Gafua o le vaiaso fou, Ianuari 11, 2021, sa ia fa’ailoa ai loa i le Samoa News nisi o fuafuaga ua ia manatu e tatau ona fa’ataunu’u i totonu o le taimi o lana nofoaiga.

O nisi o ia fuafuaga e aofia ai le faamae’aina lea o le Maota Fono fou lea ua tele tausaga o ta’atia e le i mae’a, faapea ai ma nisi o mataupu e fa’atatau i le lumana’i o le malo atoa ai ma le fa’aleleia o lona tamaoaiga.

Ina ua fesiligia i sona finagalo e tusa ai o le tofiga fou ua filifilia i ai o ia, na taua ai e Tuaolo lona lagona faagaeetia ina ua tasi le tofa a le Maota e avea o ia ma o latou Ta’ita’i. 

“E lagona lava le maualalo ma le fa’atauva’a ina ua tuuina mai le fa’atuatuaga atoa o le Maota ia te a’u e avea ma o latou Ta’ita’i,” o le saunoaga lea a Tuaolo i se faatalatalanoaga ma le Samoa News i lona Laoa i Pago Pago i le Aso Sa na te’a nei.

“O ai lava lo’u tagata fa’atauvaa ua liliu i ai le tofa a le Maota e fai ma o latou Ta’ita’i. O le viiga lava e fo’i i le Atua i lona fa’aaogaina o lana auauna fa’atauvaa i lenei tofiga.”

E ui i se lagona fiafia i le tofiga ua ia tauaveina, peita’i na taua e le Peresetene fou o le Maota Maualuga le i ai fo’i o lagona faanoanoa, poo le a faapefea ona ia tautua le Maota i ona tupu ma ona mamalu faaleaganu’u.

Saunoa Tuaolo, o lona malosi atoatoa ua foa’i mai e le Atua, o le a ia tautuaina ai le Maota Fono a le atunu’u. 

“O la’u tatalo i le Atua, ia faapoto mai a’u le tagata faatauva’a ma le vaivai, ma aumai ia te a’u le mafaufau tonu ou te faia ai faaiuga e tonu ma ammiotonu mo le manuia o le Fono Faitulafono faapea ai le atunu’u.”

O se tasi o mataupu o lo o laualuga i le finagalo o le Tofa a Tuaolo, o le faamae’aina lea o le galuega mo le fausiaina o se Fale Fono fou mo le atunu’u. Sa ia taua e faapea, o le tele o taimi e feafioa’i solo lava ma vaavaai i le tulaga pagatia o loo feagai ma afioga i Senatoa ma Faipule, i le leai lea o ni Ofisa e fa’atino ai a latou galuega.

“Ta te fealua’i solo lava ma lota maasiasi, ta te vaai alofa i afioga i Senatoa ma Faipule, o sui o itumalo taitasi, ae o loo feofeoa’i solo e tau saili ni fale e fa’atino ai a latou galuega, ona e le o i ai se Maota Fono mo i latou i le taimi nei,” o le saunoaga lea a Tuaolo. 

Sa ia taua atili e fa’apea, sa i ai lava lona manatu maualuga o le nofoaiga lona 36 a le Fono Faitulafono na faatoa mae’a atu nei, e faaulufale aloaia ai le galuega mo le Fale Fono fou ua tele tausaga o taumafai mai, peita’i o le itu e fa’anoanoa ai, e tapunia lava le nofoaiga e leai lava se vaega o le galuega ua fa’atinoina.

“O lea ua amata lenei tausaga ae le o vaaia lava se tulaga mautu mo le galuega o le Fale Fono fou. Ona i ai lea o se lagona vaivai, atonu o le isi lea tulaga o le a ou taumafai e una’i, ia i ai se Fale Fono mo sui o itumalo taitasi o le atunu’u,” o le saunoaga lea a Tuaolo.

“Afai o le finagalo lea o le Atua e pei ona filifilia ai a’u e avea ma Ta’ita’i, o la’u tatalo i le Atua, ia umi lo’u ola, ia tatala le Fale Fono fou ao le’i tapunia la’u nofoaiga i le nofoa o le Peresetene. E le matagofie ia te a’u le feofeoa’i solo o afioga i Senatoa ma Faipule e leai ni nofoaga e faamautu i ai a latou galuega fa’atino.”

E ese mai i le galuega o le Fale Fono fou, o nisi o mataupu na oo i ai le saunoaga a le Tofa a Tuaolo, o le toe iloiloina lea o nisi o tulafono o loo i totonu o le Tusi Tulafono a le malo. Na taua e Tuaolo e faapea, e tatau ona toe silasila le Fono Faitulafono i nisi o tulafono ua leva ma ua le toe aoga.

“O le isi lea mataupu taua e tatau ona auiliili, afai e i ai ni tulafono e tatau ona toe teuteu ma faafou, o le isi lena galuega e tatau ona fai, ae afai fo’i e i ai ni tulafono e le o toe aoga ma ua tatau ona aveese, e tatau fo’i ona faatino le tulaga lena. E le o se galuega faigofie, ae tatau lava ona silasila toto’a i ai le Fono Faitulafono ina ia faatino lea tulaga.”

I le tulaga o le tamaoaiga o le malo, saunoa Tuaolo e faapea, e tatau fo’i i le Fono Faitulafono ona silasila i auala e faamalosia ai le tamaoaiga o le malo, ma fesoasoani ai i le faigamalo a Lemanu ma Talauega o lea fa’atoa tau amata. Sa ia taua atili e faapea, soo se faigamalo lava i le lalolagi, e tatau lava ona malosi lona tamaoaiga, o le ivi tu lea o le manuia o ana fuafuaga fai.

A mae’a le sauniga e tatala aloaia ai le Fono Faitulafono i le vaiaso fou, ona tapena loa lea o maota e lua mo le faamaoniaina o tofiga a le Kovana ma Faatonusili o Matagaluega ma Ofisa Tumaoti a le malo o le a auina atu i luma o le Fono mo le faamaoniaina.

O se tasi o mataupu na fesiligia ai se finagalo o Tuaolo, o le mataupu lea na saunoa i ai le afioga i le ali’i Senatoa, le susuga i le Tama Matua ia Tuiagamoa Tavai, i le tatau lea ona ave le faamuamua i Faasuaga ma Tamali’i i totonu o le maota mo le filifilia o se Peresetene o le Senate. Na taua e Tuiagamoa i lana saunoaga, afai o le auala o lo o filifilia ai afioga i Senatoa, o le filifilia mai lea i Faasuaga ma Tamali’i o le atunu’u, e tatau fo’i ona faapena le sailia o se Ta’ita’i o le maota.

Na taua e Tuaolo lona fa’aaloalogia o le finagalo o Tuiagamoa, peita’i i lona talitonuga, e leai se vaega faapena o i totonu o le Faavae o Amerika Samoa, e ave ai le faamuamua i Faasuaga ma Tamali’i mo le filifilia o se Ta’ita’i o le maota. 

Na taua e Tuaolo, o itu uma ia na oo i ai lana tapenaga ao foufou lona Sa e fia tamo’e mo le tofi Peresetene o le Senate. I lona taofi, soo se tasi lava e filifili mai ai se Ta’ita’i o le Senate.

Sa ia taua e faapea, o le faamoeome e fia avea ma Peresetene o le Senate, e le o se faamoemoe na faatoa tapena nei, ae o se tasi lea o mataupu sa vaavaai mai i ai i le 4 tausaga ua mavae. Sa ia taua e faapea, o lana tala sa fai i lona aiga, afai ae tafa le finagalo o lona afioaga i Pago Pago ae toe filifilia o ia i le nofoa Senatoa, o le a ia taumafai loa e tamo’e faa peresetene o le Senate.

“O le finagalo fo’i lea o lo’u afioaga, ia ou taumafai mo le tofi Peresetene, o le mafua’aga fo’i lena o le faamalo’ulo’u atu o lo’u nu’u e lagolago lo’u faamoemoe i le aso o le faatautoga, ona o lo latou faanaunauga lea,” o le saunoaga lea a Tuaolo. Sa ia faafetaia le mamalu o le afioaga i le latou lagolago.

I le tulaga o le toe faatulaga lea o se Fono o le Faavae, na saunoa ai Tuaolo e faapea, o le isi lea mataupu e tatau ia Lemanu ma Talauega ona toe silasila toto’a i ai. Ua tele tulafono ua pasia mai e le Konekeresi ua aafia ai tulaga manuia o Amerika Samoa ma ona tagata. O nisi o ia mataupu e aofia ai le tulaga o le sitiseni faapea ai ma le tulafono i ogasami e mafai ona fagota e Amerika Samoa.

Na taua e Tuaolo e faapea, e le tatau ona tupu le tulaga lea i le atunu’u, o le fai mai e le malo tele o tulafono ma faaiuga e aunoa ma le fesiligia o se finagalo o Amerika Samoa. I lona taofi, o iinei lava e tatau ona afua atu ai faaiuga mo le manuia o Amerika Samoa, ae le o le afua mai i fafo i le malo tele.