Ads by Google Ads by Google

Fa’ailoga fa’apitoa mo fanau fa’au’u Faga’itua High 2018


O se vaaiga i le toatele o le aiga mo se tasi o fanau fa’au’u a le Aoga Maualuga a Fagaitua i le aso Lua. [ata: Leua Aiono Frost]

Peresitene o le Komiti o le Fa'ailogaina o le 50 Tausaga o Fagaitua High, Tuimavave T. Laupola, i le taimi na taua'aoina ai le meaalofa tupe e $3,000 mai tama ma teine tuai o le aoga e fesoasoani i nisi o mea e fa’alelei i lea aoga maualuga. [ata: Leua Aiono Frost]

I le fa'au'uga a le A'oga Maualuga a Fagaitua i le taeao o le aso Lua o le vaiaso lenei, sa maua ai le avanoa e le Fa'atonusili o A'oga Dr Ruth Matagi-Tofiga e tolaulauina ai i latou ua maua avanoa fa'asikolasipi a le tatou Malo.

 

O i latou nei e aofia ai: Olyvia Senia Ta'ase; Sauiluma Afusia; Kordell Tamatane A. Velega; Kilisi PJ Satele; Angelo Micah Mayer; Onti Fusi Va'a; Darin Joseph Grey ma Aniva B. Simanu. O le to'atele o i latou nei e sailia tusi pasi muamua i le Kolisi Tu'ufa'atasi a Amerika Samoa e fa'aaoga i ai le sikolasipi lenei.

 

Sa maua fo'i le avanoa o le Peresetene o le Komiti o le Fa'ailogaina o le 50 Tausaga o Fagaitua High, Fa'atonusili o le Televise KVZKTV Tuimavave T. Laupola na te taua'aoina ai se meaalofa Tupe e amata saili ai le A'oga Maualuga i Fagaitua ma latou tama ma teine Tuai, ina ia faaleleia mea ua fa'atonuina e faaleleia mo le a'oga a'o loma le isi asiasiga mai a le WASC e pasia lea a'oga maualuga i le lumana'i.

 

O le aofaiga o lea meaalofa e $3,000 mail le Asosi a Tama ma Teine Tuai a Fagaitua High. Ua fa'ailoa fo'i e Kovana Lolo Moliga, o le fa'aiuga o le masina lenei, e suaina ai le eleele mo le fa'atuina o le fale tele e tapena ai lava mo lea asiasiga a le WASC, ae ua faia patino lava lea mo le vasega fa'au'u 2018 i Fagaitua.

 

O lo'o ua fa'atulaga fo'i le fa'ailogaina o le 50 tausaga o Fagaitua High i le aso 1 Iulai se'ia o'o i le aso 8, 2018, ma o le a fa'alauiloa fo'i lea polokalama fa'ataoto ua mae'a ona tapena e le Asosi ma le Komiti a Tama ma Teine Tuai mo lea fa'amoemoe.

 

I fa'ailoga ua mae'a taua'aoina i le fa'atasiga e tufatufa ai fa'ailoga a le vasega fa'aiuaso, ua taua'aoina ai le fa'ailoga mo le Togisilia i le Vasega Fa'au'u i le tama'ita'i o Selaina Tuatoo. O le fa'ailoga o le tulaga lua sa tutusa ai tama'ita'i e to'alua o Sauiluma Afusia ma Tiara So'otaga.

 

O le fa'ailoga mo le Togisilia i Su'ega SAT ma ACT na tapena lea e le susuga le Faipule o Sa'ole, Kitara Vai'au ma le PTA; na taua'aoina lea i le tama'ita'i o Olyvia Senia Ta'ase i lona togi na maua 1110 SAT, ae 20 le ACT. O Angelo Micah Mayer na maua le fa'ailoga mo le ACT 19 ma na tutusa lelei ma togi fo'i o Kilisi PJ Satele.

 

O le fa'ailoga na tapena e le Auaiga o Tammy Malae e fa'amauina ai lona soifua tautua o se tama'ita'i faia'oga sogasoga tele, ma taua'aoina lea mo le sui e sili ona maka po'o togi i le Mataupu o le Gagana Fa'aperetania po'o le Igilisi, lea sa mauaina lea e Olyvia Senia Ta'ase.

 

O fa'ailoga fa'apitoa saunia e le Komiti o le Fa'ailogaina o le 50 Tausaga o Fagaitua High na taua'aoina lea i le to'alima maualuluga togi ua papasi ai i lenei tausaga: E ta'i $500 nei sikolasipi: Sauiluma Afusia; Alaseuimanu Faumuina; Tiara So'otaga; Kordell Velega ma Angelo Mayer.

 

O fa'ailoga fo'i ua tapena e le Alumni mo le totogia o tusi a'oga mo nisi o le vasega fa'aiuaso ua agava'a ai, e ta'i $100 ia fa'ailoga na taua'aoina lea ia : Aniva Seumanu; Kilisi Satele; Rienara Talo; Darin Velega ma Jacinta Tavita.

 

O le fa'ailoga a le Rotary Club of Pago Pago ua taua'aoina lea ia Angelo Mayer. O le fa'ailoga o le Amio Lelei ua mauaina lea e Angelo Mayer. O le fa'ailoga fa'apitoa mo le Ta'ita'i Agava'a ua mauaina e Jerry Sauni.

 

O le tama'ita'i Ta'alo Lelei i lenei tausaga ua tauaaoina ia Olyvia Senia Ta'ase ma le Tama ta'alo lelei o le 2018 ua taua'aoina lea ia Vitolino Kitiona.