Ads by Google Ads by Google

FAALAPOTOPOTOGA “LIMA FESOASOANI” I UOSIGITONE - “FAU, FESOOTA’I & FAAMANUIA”


Le vaega a le Lend a Hand [Lima Fesoasoani] sa auai fo’i i le fa’ataliga malaga a le vasega o uso ma tuagane sa malaga mai mai Amerika Samoa e faigaluega i le Taylor Farms Northwest Inc. i le setete o Uosinitone. l-r Fiapia Taito, Vicky Navarro, Daniel Lockhart Jennifer Lockhart. [ata: Leua Aiono Frost]

SEATTLE, Washington--I le taimi nei, ua i ai le fa’alapotopotoga na amatalia e nisi o alo o Amerika Samoa ma ua latou fa’alauiloa i latou o le “Fa’alapotopotoga o Lima Fesoasoani” - Lend a Hand Foundation - lea e fa’aautu a latou taumafaiga uma ina ia, “Fau, Fesoota’i ma Fa’amanuia” [Build, Bridge & Bless] atu i nisi uma o lo’o moomia lava le fesoasoani i soo se ala e mafai ai.

 

 

Pe fa’amalamalama atili le latou galuega fai ua manatu ina ia toe “Fausia Sootaga ma isi, Fesoota’i i ala uma e mafai ai ona avatu le fesoasoani, ma ia fa’amanuia atu ia i latou ina ia alofagia i latou uma e le Atua o Manuia.”

 

O le  auau o latou tautua e faifai pea, ua fa’amuamua e i latou le taumafaiga ina ia avatu se toomaga ma le fa’amoemoe maualuga ia fa’aauau ona fa’amanuiaina ai le vasega o i latou o loo maumausolo, ma ua le manatu e suia o latou olaga.

 

O le latou fa’anaunauta’iga, ina ia tofusia lava le mamalu o tagatanuu o le Setete o Washington o lo’o matele ina le amana’ia, ma ua maumau solo i latou, e leai ni o latou falenofo. Ua avea nofoaga faitele ma laufanua e fa’ato’a i ai latou fale’ie le tumau e nonofo ai.

 

Ona ua matauina ua fa’ateleina pea lea faitau aofai o sui nei e maumau solo i Matuisisifo o le Iunaite Setete, o lea ua fa’atutu ai a latou taumafaiga, “Ia fagaina lava i latou nei i so’o se taimi, aua nei oge mea taumafa ma vaiinu i latou.”

 

“I soo se taimi e tapena ai se matou tufatufaga o mea taumafa, e muamua lava auina atu Loli Tetele e fa’amautu i ai oloa uma ua foa’ia mai e tufa atu. O le sapalai atoa ua mae’a fa’atulaga mo le tufatufaga e foa’ia mai lea i matou pa’aga agalelei. O le a lisia mulimuli atu uma i latou na.”

 

Ua iloga mai o le tele o mea ua mae’a tufatufaina atu e le fa’alapotopotoga e aofia ai mea’ai, vaiinu suamalie, lavalava ma palanikeke, fa’apea ma oloa e fa’aaogaina e tausia lelei ai le tino ma le soifua maloloina lelei.

 

Ua tautuaina e le Lima Fesoasoani i latou uma o e alaala i le itu i matu i sisifo o le Iunaite setete,  ma ua matele ona latou tufatufaina atu pusa mea taumafa i Auburn ma Enumclaw, Parkland  ma Tacoma ae maise o Bremerton ma isi fo’i itu o le setete o Uosigitone e masani ona faapa’aga ma nisi fo’i fa’alapotopotoga e faatautaia nisi o fa’atasiga tetele, pe a oo lava ina fa’ateleina mea ua mafai ona foa’ia mai e tufaina atu i le lautele, o aiga o lo ua i ai le mana’omia.

 

I le tele o taimi ua faia lava foai i le King county, Pierce, Kitsap ma e aofia ai Auburn ma Tacoma faapea ma Bremerton, Puyallup, Lacey, Roy ma Federal Way, Enumclaw i nofoaga ua masani ai fo’i le mamalu lautele.

 

“O le tele o oloa e foa’ia mai e matou pa’aga ua aofia ai oloa e aoga mo le fanauiti lava se’ia oo i e matutua, ma ua le fa’avasegaina fo’i ituaiga o tagata lautele ua tufaina atu i ai. Ua fa’asolo atoa lava le tufatufaga mo e uma ua i ai le mana’omia. O lo ua mataituina lava le tulaga sili ona taua, o le foa’i le fa’atuaoia,” o se tala lea a le tamaitai o Fiapia Tasi Taito, o i laua ma lona to’alua Levi Taito sa amataina lea foi fa’alapotopotoga.

 

“Ua tu’ufa’atasia e i matou, oloa uma ua foa’ia mai i nisi o le aufaifa’ato’aga, faipisinisi tetele, ma tagata taito’atasi fo’i, o matou pa’aga, ona fa’atulaga loa lea o aso ma taimi e fa’alauiloa, e foa’ia atu ai, ma le le fa’atuaoia i le mamalu lautele. O nisi ua avea ma vae ma lima e fa’ao’o atu fesoasoani i nisi o aiga e le o mafai ona oo ane i le nofoaga ua fa’alauiloa. O oloa gaosia fo’i ua foa’ia mai, e le o ni oloa ua le toe aoga, ae ua silia ma le tausaga o totoe o le taimi atofa e tatau ona faaaogaina ai,” o se tala lea a Fiapia Taito.

 

Sui o le fa’alapotopotoga: Levi & Taito o Totino Fa’avae ma ua avea ma Peresetene; tamaitai Filipino o Vicky Navarro o le Sui Peresetene, o Sanele Lino o le Operation Officer e va’aiga le fa’agaoioiga atoa o tufatufaga.

 

O Carrie Scott, o le fesoasoani sili lea i le taumafaiga i ana tufatufaga: O Gretchen Worden le tasi fo’i o fesoasoani taua i le fa’atinoga o galuega uma a le Lima Fesoasoani: O Jennifer Nina o le Failautusi a le Lima Fesoasoani; O Maria Aparicio o se tasi o fesoasoani malosi a le Lima Fesoasoani;  O Daniel Lockhart o se tasi e fa’amoemoe i ai le fa’atautaiga o le tufatufaga i taimi uma;  O Debbie Solven latou te va’aia le faagasologa o ta’avale i luga o le alatele ma Julia & Merafuentes, o se tasi e va’aia patino fa’amaumauga mo le vasega o tagata Volenitia ma oloa fo’i o lo’o tufatufaina, ia mausali le aofai o mea ua tufatufaina atu.

 

O fa’amaumauga fa’amautu a le fa’alapotopotoga mai a latou galuega fa’atino i Matua i Sisifo o le Setete o Uosigitone, ua fa’ailoa mai ai:

 

“Talu mai Aukuso 2020 seia oo ia Tesema 2020; ua mae’a tufatufaina atu e le LAH 10-12 Loli tetele o pusa mea’ai tetele ua mae’a pasia lelei e le USDA i vaiaso ta’itasi ma ua fagaina ai le aotelega e tusa ma le 255,000 o aiga ua latou mana’omia lea fesoasoani taua.”

 

“E ese mai lea ua latou tufatufaina atu fo’i le 1,000 o Turkey i aiga e to’a 1,000 ma ua fa’amanuiaina fo’i a latou fanau i le anoanoa’i o mea ta’alo mo i latou e tusa ma le 5,000+ i le vaitau o le Kerisimasi i le tausaga lava lea,” o le tala lea a Fiapia Taito.

 

“Ona o lenei fa’alapotopotoga na fa’atula’ia e nei alo o Amerika Samoa, ua agaga lava fa’asamoa lona fa’atautaiga o foa’i. Ua fa’asoloatoa ma fa’asalafa le fa’atautaiga o nei foa’i, aua o oloa fo’i ua foa’ia mai ia i latou mai a matou paaga ina ia fa’amanuiaina ai nisi o lo’o i ai le mana’omia i totonu o latou aiga, i tulaga o mea taumafa, ma isi sapalai o oloa e fa’aaoga mo le tausiga lelei o le tino ma le soifua maloloina lelei. O mea fo’i nei ua fa’atigipusa ma fa’atagapepa, ma avatua uma i e maumausolo, ua le nonofo i ni fale mautu i so’o se magaala ua nonofo ai i totonu o lenei setete,” se toe fa’aopoopo mai lea a Fiapia Taito.

 

O nisi ua fa’apa’aga a le fa’alapotopotoga e aofia ai le Washington State Dept. of Agriculture [WSDA], Cascadia Produce, lea e fa’aaogaina e i latou loli tetele e fela’ua’i uta o Oloa mai fa’ato’aga ma faleoloa tetele, ma ua fa’amalosia atili ai le Lima Fesoasoani i ana galuega fai mo le tufatufaga o mea’ai uma nei ua taulimaina. O le galuega tufatufa atu e ao ina faia ia lelei ma ia vave.

 

I le taimi nei, e tusa ma le 343 o tagata ua galulue fa’avolenitia i taimi lava o tufatufaga latou. O le isi lea mea e afua ai ona matou fa’atalau’ula atu i le vasega o tuagaina ma uso mai Kalapu Ta’avale i totonu o le Setete ina ia fa’apa’aga ma i matou i a matou galuega tufatufa atu o oloa tau mea’ai, lavalava o so’o se ituaiga ma oloa mo le tausiga o aiga, pe a oo i taimi e faia ai.

 

O Fiapia Tasi Taito, o se tasi sa soifua a’e ma a’oa’oina i Amerika Samoa. Na mae’a ana a’oga maualuga a Leone, i le tausaga 2000, ma alu ese mai loa e tausailia se lumana’i manuia.

 

Na sailia ona fa’ailoga maualuluga i le Kolisi i aoaoga tau Pisinisi Fa’avaomalo ma ua amatalia ai le la’ua pisinisi ma lona to’alua, o le ZAAF Trucking LLC i Uosigitone nei.

 

E to’atolu o laua alo o Zion 18 tausaga, Anaiah 16 tausaga ma Abrielle 15 tausaga. 

 

Na amata fa’atula’ia le Lend a Hand Foundation ia Aperila 2018, ae na fa’ato’a maua lona laisene o se Sosaiete e fa’atula’ia e le maua ai ni tupe fa’asili, Non Profit Organization ia Aperila 2019.

 

O vaiaso ta’itasi uma lava e fa’atino ai le tautua lenei ina ia tufatufaina atu Oloa tau mea’ai ma isi uma mo le mamalu lautele.

 

O le tufatufaga o lenei vaiaso o le a faia ia Setema 3, 2021 mai le itula e 9-1:00 i lumafale o le Arts of Love Gift Shop; ma toe fa’aauau lea i le 10:30am  - 1:00pm mo le tufatufaga o mea’ai i le Church for All Nations 111-112th Street, Tacoma, Washington, 98445.