Ua fa’aleaoga e le Fa’amasinoga Maualuga le avanoa sa mafai ai ona tatala le susuga a Elliott Siaumau Jr, ina ua talia e le Fa’amasinoga le talosaga a le malo, e fa’aleaoga le avanoa, e mafua mai i lona le usitaia o tuutuuga sa tatala ai o ia i tua.

O Siaumau Jr, na tatala i tua ina ua mae’a ona ia totogi tupe sa fa’atulaga e le fa’amasinoga e tatala ai o ia i tua, i lalo o tuutuuga faapitoa e ao ona ia usita’i i ai.

O nisi o ia tuutuuga e aofia ai le avea o ia le aua ne’i ona toe solia se tulafono a le malo i soo se taimi.

Na finau le loia a le malo ia Christy Dunn i luma o le Fa’amasinoga e fa’apea, o moliaga fou e pei ona faila e le malo fa’asaga ia Siaumau Jr i le vaiaso na te’a nei, ua atagia mai ai lona le usitaia o tuutuuga sa tatala ai o i i tua.

E 4 tagi eseese a le malo ua faia nei fa’asaga ia Siaumau Jr. O ia tagi eseese e aofia na amata mai lava i le faaiuga o le tausaga e 2017 seia oo mai lava i le masina lenei o Iulai.

O le aso Faraile na te’a nei na faia ai se iloiloga faapitoa a Siaumau Jr, ona o le talosaga a le malo e fa’aleaoga ai le avanoa sa tatala ai o ia i tua, atoa ai ma le tuuina atu o lana tali tete’e e tusa ai o tagi fou e 2 a le malo fa’asaga ia te ia.

Na faaleoina e le ali’i loia fautua lagolago ia Ryan Anderson le tali tete’e a Siaumau Jr faasaga i tagi fou a le malo, ma fa’atulaga ai loa lana ulua’i iloiloga e faia lea i le aso 4 o Oketopa o le tausaga nei.

I mataupu fou e lua ua faila e le malo, o lo o tu’uaia ai o ia i moliaga o le faaoolima ma le faaleaga meatotino, ae o le isi mataupu o lo o tu’uaia ai o ia i le umia fa’asolitulafono o vaega o fualaau fa’asaina.

TALOSAGA A LE MALO

Na taua e le loia a le malo ia Dunn e fa’apea, o le aso 17 o le masina lenei o Iulai na faila ai e le malo le talosaga e fa’aleaoga ai le avanoa o lo o tatala ai i tua ia Siaumau Jr, i le mae’a ai lea o le osofaiga sa faia e Leoleo i le aso 12 o Iulai, lea na pu’e fa’apagota mai ai loa Siaumau Jr ma se isi ali’i, ma molia i le umia fa’asolitulafono o fualaau fa’asaina.

Na faamanino e Dunn i le fa’amasinoga e fa’apea, e le o se taimi muamua lenei ua tu’uaia ai Siaumau i lona le usitaia o poloaiga o lo o tatala ai o ia i tua.

Na finau Dunn i le fa’amasinoga ina ia faia loa sana poloaiga e fa’aleaoga ai le avanoa o lo o tatala ai Siaumau Jr, ae poloaina loa o ia ina ia taofia loa i le toese i Tafuna e fa’atali ai le fa’aiuga o mataupu e pei ona tu’uaia ai o ia e le malo.

Na tete’e malosi le loia fautua a Siaumau Jr. Na taua e le ali’i loia ia Anderson e fa’apea, o tu’uaiga fa’asaga ia Siaumau Jr, ua na o ni tu’uaiga lava e le i fa’amaonia.

Na finau Anderson e fa’apea, e leai ma se mea e ono avea ai Siaumau Jr ma tagata e lamatia ai le saogalemu o le atunu’u, e le o ia fo’i o se tagata e ono sola ese ma Amerika Samoa pe afai ae fa’aauau pea ona tatala i tua.

O Siaumau Jr e pei ona taua e lana loia, o se tagatanu’u o Amerika Samoa na fanau mai ma nofo tumau ai pea i le atunu’u, o lona aiga lenei, e leai fo’i se isi lava nofoaga e ono alu i ai o ia.

Na taua e Anderson e fa’apea, o tagi uma e 4 ua faila e le malo fa’asaga ia Siaumau Jr, ua na o ni tu’uaiga lava e le i mafai ona fa’amaonia.

Na toe finau Dunn ma ia fa’ailoa i le Fa’amasinoga e fa’apea, o tagi fou e pei ona faia fa’asaga ia Siaumau Jr, o lo o lagolagoina i ripoti ma fa’amaumauga ua mae’a ona tu’u atu i le Fa’amasinoga latou te iloiloina.

MATAUPU E 4 O LO O MOLIA AI SIAUMAU JR

E pei ona taua e Dunn i le Faamasinoga, e 4 tagi eseese ua mae’a ona faila e le malo fa’asaga ia Siaumau Jr. O ia uma mataupu o lo o taoto pea lava i luma o le Fa’amasinoga Maualuga e le i faia i ai se fa’aiuga mautu.

O le tagi muamua na alia’e mai i le masina o Tesema o le tausaga e 2017, ina ua molia Siaumau Jr i le moliaga mamafa o le faaoolima i le tulaga lua, e mafua mai i le fa’alavelave lea na tu’uaia ai o ia i lona fa’aoolima lea i se isi tagata.

E $5,000 le tupe na fa’atulaga e le Fa’amasinoga e totogi ona fa’atoa mafai lea ona tatala le ua molia i tua, i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe soli se tulafono, ma ia auai i taimi uma e valaau ai ana mataupu.

A o tatala ai i tua Siaumau Jr, na toe aafia ai fo’i le ua molia i le tulafono ma pu’e fa’apagota ai loa o ia e Leoleo i le aso 12 o Mati o le tausaga nei, ona o tu’uaiga i lona fa’aoolima lea i se tasi o lona aiga, e ala i lona titina o ia ma fasi, ma fao faamalosi lana tupe e $30.

O moliaga o loo tu’uaia ai le ua molia i le mataupu lona lua lenei e aofia ai le faomea i le tulaga muamua, o le vaega B o solitulafono mamafa, ma le moliaga mama o le gaoi.

E $50,000 na fa’atulaga e tatala ai le ua molia i tua e fa’atali ai taualumaga o lana mataupu, i lalo o tuutuuga e ao ona ia usita’i i ai, e aofia ai le aua lea ne’i ona toe solia se tulafono, ma ia auai i soo se taimi e valaau ai lana mataupu.

A o tatala ai i tua Siaumau Jr, na toe aafia fo’i o ia i le tulafono, ma mafua ai loa ona toe pu’e fa’apagota o ia e Leoleo i le aso 12 o Iulai o le tausaga nei, ma tu’uaia i lona umia fa’asolitulafono o fualaau fa’asaina.

E $50,000 le tupe ua fa’atulaga e le Fa’amasinoga e tatala ai Siaumau Jr i tua mai le toese i Tafuna i le mataupu lea.

O le taimi lava fo’i lea ina ua mae’a ona pu’e fa’apagota o ia e Leoleo, na faila ai loa e le malo le latou tagi lona 4 fa’asaga ia Siaumau Jr, ona o tu’uaiga i lona faaoolima lea i se isi tagata ma faaleaga ana meatotino. E $5,000 lea tupe lea ua fa’atulaga e tatala ai o ia i tua mai le mataupu fou lenei.

FAAIUGA A LE FA’AMASINOGA

I le mae’a ai ona iloilo e le Fa’amasinoga o le talosaga a le malo, atoa ai ma fa’amatalaga uma e uiga i tagi ua molia ai le ua molia, na talia ai loa e le afioga i le ali’i Fa’amasino Sili ia Michael Kruse le talosaga ina ia fa’aleaoga loa tuutuuga sa tatala ai Siaumau Jr i tua mai ana ulua’i mataupu e 2.

Lona uiga i se isi faaupuga, o lea ua taofia nei Siaumau Jr i le toese e aunoa ma se tupe e faatulaga mo ana ulua’i mataupu, e fa’atalitali ai se faaiuga a le fa’amasinoga i ana mataupu ia e 2.