Pago Pago - AMERIKA SAMOA

Ua fa’aalia e le toatele o le mamalu lautele ia lo latou fa’atu’i’ese e tusa ai ma fuafuaga mo le maina ina po o le eliina, o sami loloto, e le gata i ogasami o Amerika Samoa ae faapea foi ia ogasami lata mai i le teritori, talu ona fuafuaina e le malo feterale, po o le Ofisa o le Initeria, ia le fa’atauina atu i kamupani tutoatasi, ia lisi e mafai ai ona maina ia sami loloto.

O nisi o i latou ua fa’aleoina lo latou le ‘auai i lea fuafuaga, o lo’o aofia ai le tamaitai fomai ia Dr. Ruth Matagi-Tofiga, lea sa avea ma Faatonusili o Aoga ma le Matagaluega o Alagamanuia o le sami ma le vaomatua, faapea ai ma Faipule o Fagatogo, le susuga ia Malaeoletalu Melesio Gurr, lea o lo’o avea ma Taitaifono o le Komiti a le Maota o Sui, o uafu/malaevaalele ma femalagaiga.

Ae peitai, ua fa’alauiloa e le Failautusi o le Initeria, ia Doug Burgum i vaega faasalalau i le laumua i Uasigitone, e faapea, o lenei fuafuaga mo le faatauina o lisi e maina ai ogasami e tulata i Amerika Samoa, e le gata o se mataupu e aoga mo tagata uma (pisinisi ma tagata fa’atau), ae faapea ai foi ma le puipuiga o le saogalemu fa’avaomalo.

I lana saunoaga, sa ta’ua ai e Dr. Matagi-Tofiga, ia le loloto o le so’otaga o tagata Samoa ma ona ogasami, e pei ona fa’ata’atia mai e la tatou aganu’u tala fa’asolopito ma le fa’alagolago o tatou tagata i le alagamanuia o le sami, mo tatou soifuaga.

Na saunoa foi Dr. Matagi-Tofiga, le a’oa’oina o alo ma fanau o le atunu’u le taua o le puipuiga o ogasami ma le tausia o ona alagamanuia.  Sa ia ta’ua e faapea, e le na’o se lesona lenei tulaga, ae o se vaega taua i lo tatou faasinomaga, i le avea ai o tatou ma leoleo o le sami.

Ma sa ia ta’ua foi le tele o fa’afitauli e tula’i mai, e a’afia ai ‘amu, i’a ma figota o le sami, pe afai ai taunu’u le eliina po o le maina ina.  Aua ua fa’amautuina mai i su’esu’ega, le fa’aumatiaina o fa’agasologa faalenatura o le pito a lalo o le sami, i le faitau afe o tausaga i le lumanai.

Ua talitonu Dr. Matagi-Tofiga, e tatau ona o tatou puipuia le soifua maloloina o tatou sami faapea le lumanai o tatou motu, e ala lea i le tutu faatasi, e faasagatau i nei fuafuaga ua fa’ata’atia.

I le saunoaga a le afioga i le Faipule ia Malaeoletalu, sa ia fa’ailoa atu ai i tagata o Amerika Samoa, aemaise lona itumalo o Fagatogo #8, lona e lagolagoina o le fuafuaga a le malo feterale, mo tatou ogasami.  Ma e tatau ia Amerika Samoa ona puipuia ona siosiomaga mo alo ma fanau o le lumanai.

Na ta’ua e le afioga i le Faipule, le tele o nisi tulaga e le o malamalama ai e tusa ai ma a’afiaga i nei ituaiga gaioiga ma ia fa’aalia, le tatau ona aofia uma ma taitai faapea tagata o le teritori, i le soalaupuleina o so’o se fuafuaga ma faaiuga e faia, e a’afia ai ‘ele’ele ma sami o le teritori.

Ma o se tasi lea o mafua’aga ua na le lagolagoina ai lea fuafuaga.

Sa ia fa’aalia lona agaga faafetai i le mamalu o le atunu’u ua fa’apea ona fa’aleoina o latou manatu e tusa ai ma lenei mataupu, aemaise le afioga ia Lolo M. Moliga, mo lona tu malosi i lenei mataupu.  Faatasi ai ma se Faatonuga Aloaia 006-2024 a Lemanu P. S. Mauga, a’o avea o ia ma kovana, e faasaina ona maina ia ogasami a le teritori.

O le masina ua mavae sa lomia ai e le Samoa News se fa’aaliga mai i le afioga i le sui Faipule o Amerika Samoa i Uasigitone, ia Uifaatali Aumua Amata, e tusa ai ma lenei mataupu, lea sa ia ta’ua ai lona tu fa’atasi ma tagata o le atunu’u.

(tagai i le tala atoa i le saunoaga a Amata, i le Lali Iuni 6, 2025)

Sa ta’ua e Amata lona fesiligia o le Ofisa o le Initeria faapea lona Failautusi ia Doug Burgum, e faamanino mai a latou fuafuaga, faapea ai ma leisi la’asaga o soso’o, ma se aso e mafai ai ona feiloai ma taitai o Amerika Samoa.

Ae i se fa’aaliga mai i le afioga i le Kovana, Pulaalii N. Pula sa ia ta’ua ai le tele o tausaga, o saili e Amerika Samoa ni auala se tele e mafai ai ona faatupula’ia lona tamaoaiga, e ese mai i le fa’alagolago i le kamupani tu’u ‘apa i’a.

Ma i se talitonuga a le afioga i le Kovana, o se auala taua lenei e mafai ai ona saili se auala fou mo le atina’eina o le tamaoaiga mo le teritori.