I lana saunoaga i le vaiaso ua te’a i le tauaofiaga a le Fono Faitulafono, sa fa’amalamalama ai e le afioga i le Kovana Sili, Lolo Matalasi Moliga, le tulaga o lo’o i ai le tamaoaiga o le malo o Amerika Samoa.

“O le talitonuga o e malamalama i tamaoaiga o faigmalo, e o fa’atasi le tamaoaiga ma ana tupe maua,” o se vaega lea o le saunoaga a le kovana. “A lelei le tamaoaiga, e tele tupe e maua.”

 Ae a “fa’aletonu le tamaoaiga, e fa’aletonu fo’i le tupe maua a lea faigamalo,” o a le kovana lea. “Ina ia silafia e le mamalu o le tatou atunu’u, o le tamaoaiga o le tatou atunuu, o lo’o faavae lea i pou tetele se lua.”

Saunoa le kovana o le poutu malosi muamua o kamupani ‘ia ma pisinisi e fesoota’i ma kamupani ‘ia. Ae o le poutu malosi lona lua, o le faigamalo lea ma ana galuega fai, lea e mafua ai ona maua tupe, lea e fa’agaoioi ai le malo.

“Talosia, ia vave mai se aso e tolu ai, pe fa, pe lima fo’i ni poutu malolosi e fa’avae ai le tatou tamaoaiga,” o le saunoaga lea a le kovana, ma ia fa’amalamalama e faapea, afai e “afaina le pou e tasi o pou ia, ona tatou iloa lea o le mea e aga’i i ai le tatou tamaoaiga.”

O se fa’amanatu a le kovana i le Fono Faitulafono, le tulaga ua i ai kamupani ‘ia. I le tausaga e 2009, sa tapunia ai le COS Samoa Packing ae o le tausaga e 2016 sa tapunia ai le Samoa Tuna Processors Inc.

“E le o se mea faigofie le atina’eina o le tamaoaiga. Aua a afaina le pou e tasi, ua afaina fo’i la ma le isi pou,” o se fa’amanatu lea a le kovana ma ia taua e na o le StarKist Samoa le kamupani ‘ia o lo’o totoe i le taimi lenei. “O le tatou tamaoaiga ua fa’aletonu ona ua toe tasi ma le afa le pou lea o lo’o fa’avae ai le tamaoaiga o le tatou atunu’u.”

Sa mafai fo’i ona fa’ailoa e le afioga i le kovana sili nisi fa’amaumauga e iloa ai le fa’aletonu o le tamaoaiga a le malo.

Fa’ailoa e le kovava e fa’apea i su’esuega, a e su’esu’e tamaoaiga o le atunuu, i le “tausaga 2016 na se’e ai i lalo le tatou tamaoaiga i le 2.9 pasene”.

“Tausaga e 2017, na se’e atili ai i lalo i le $5.3 miliona. O le mea lea tatou te iloa ai, ua pa’u le tatou tamaoaiga,” o se vaega lea o le saunoaga a le kovana, “ae o lo’o soifua lelei pea le tatou atunu’u ona e tele isi auala o lo’o maua ai pea tupe a le tatou malo ma le tatou atunuu e soifua lelei ai le tatou atunuu.”

Ma sa talosaga ai e le kovana le Fono Faitulafono, “o le a lava se malosi o le Fono Faitulafono, tatou galulue e fa’amalosi ma fa’amautu le tamaoaiga o le tatou atunuu.”